Author: sreejithakvijayan

വെക്‌സ്‌ഫോർഡ്: കൗണ്ടി വെക്‌സ്‌ഫോർഡിൽ കുതിരയെ വളർത്തുന്ന കേന്ദ്രത്തിൽ തീപിടിത്തം. കുതിര ചത്തു. മറ്റ് കുതിരകളെ കേന്ദ്രത്തിൽ നിന്നും മാറ്റിപ്പാർപ്പിച്ചു. മേഖലയിൽ തീ അണയ്ക്കാനുള്ള ശ്രമങ്ങൾ പുരോഗമിക്കുകയാണ്. ന്യൂ റോസിൽ നിന്ന് എട്ട് കിലോമീറ്റർ അകലെയായുള്ള ബാലിക്കെല്ലിയിലെ കേന്ദ്രത്തിലാണ് തീപിടിത്തം ഉണ്ടായത്. രാത്രി 9 മണിയോടെയായിരുന്നു സംഭവം. രണ്ട് യൂണിറ്റ് ഫയർഫോഴ്‌സ് എത്തിയാണ് തീ അണയ്ക്കാനുള്ള ശ്രമം നടത്തുന്നത്. വൈക്കോലിൽ നിന്നാണ് തീ പടർന്നത് എന്നാണ് അധികൃതർ വ്യക്തമാക്കുന്നത്. സംഭവത്തിൽ അന്വേഷണം ആരംഭിച്ചു. തീപിടിത്തത്തിന്റെ കാരണം കണ്ടെത്താനുള്ള അന്വേഷണം പ്രാരംഭഘട്ടത്തിൽ ആണെന്നും നിലവിൽ ദുരൂഹത സംശയിക്കുന്നില്ലെന്നും അന്വേഷണസംഘം അറിയിച്ചു .

ലൗത്ത്: കൗണ്ടി ലൗത്തിൽ കാറുകൾ കൂട്ടിയിടിച്ച് ഉണ്ടായ അപകടത്തിൽ ഒരു മരണം. 60 വയസ്സുള്ള വ്യക്തിയാണ് മരിച്ചത്. ഡണ്ടാൽക്കിനടുത്തള്ള റസ്സാനിലെ എൻ53 ൽ ആയിരുന്നു സംഭവം. അപകടത്തിൽ പോലീസ് അന്വേഷണം ആരംഭിച്ചിട്ടുണ്ട്. ഇന്നലെ രാത്രി പത്തേകാലോടെയായിരുന്നു അപകടം ഉണ്ടായത്. കൂട്ടിയിടിച്ച കാറുകളിൽ ഒന്ന് ഓടിച്ചിരുന്നത് 60 കാരനാണ്. അപകടത്തിൽ 20 വയസ്സുള്ള യുവതിയ്ക്ക് പരിക്കേറ്റിട്ടുണ്ട്. ഇവരുടെ പരിക്കുകൾ ജീവന് ഭീഷണിയുള്ളതല്ല. അവർ ലേഡി ഓഫ് ലൂർദ് ആശുപത്രിയിലാണ് യുവതി ചികിത്സയിൽ കഴിയുന്നത്. 60 കാരന്റെ മൃതദേഹം പോസ്റ്റ്‌മോർട്ടത്തിന് ശേഷം ബന്ധുക്കൾക്ക് കൈമാറും.

ഡബ്ലിൻ: അയർലൻഡിൽ വരും ദിവസങ്ങളിൽ അസ്ഥിര കാലാവസ്ഥ അനുഭവപ്പെടുമെന്ന് മെറ്റ് ഐറാൻ. മഴയും വെയിലും ലഭിക്കും. ഇടിമിന്നലിനും സാധ്യതയുണ്ടെന്നും മെറ്റ് ഐറാൻ അറിയിച്ചു. കഴിഞ്ഞ ദിവസങ്ങളെ അപേക്ഷിച്ച് രാജ്യത്ത് അന്തരീക്ഷ താപനില ഉയരും. ഇന്ന് 17 ഡിഗ്രി സെൽഷ്യസ് വരെ അന്തരീക്ഷ താപനില ഉയരാൻ സാധ്യതയുണ്ട്. ഇന്ന് പകൽ വരണ്ട കാലാവസ്ഥ അനുഭവപ്പെടും. കിഴക്ക് ഭാഗത്ത് വെയിലുള്ള കാലാവസ്ഥ അനുഭവപ്പെടും. പടിഞ്ഞാറ് ഭാഗത്ത് മേഘാവൃതമായ അന്തരീക്ഷം ആയിരിക്കും അനുഭവപ്പെടുക. പടിഞ്ഞാറൻ തീരമേഖലകളിൽ ചാറ്റൽ മഴയും അനുഭവപ്പെടും.

ഡബ്ലിൻ: മുൻ ഫിൻ ഗെയ്ൽ മന്ത്രിയും സെയ്ൻ കോംഹെയറുമായ സീൻ ബാരറ്റ് അന്തരിച്ചു. 81 വയസ്സായിരുന്നു. വാർധക്യസഹജമായ ആരോഗ്യപ്രശ്‌നങ്ങളെ തുടർന്നായിരുന്നു അദ്ദേഹത്തിന്റെ വിയോഗം. 34 വർഷക്കാലം ഡൺ വാലോഘെയർ ടിഡിയായി അദ്ദേഹം സേവനം അനുഷ്ഠിച്ചിട്ടുണ്ട്. 1981 ൽ ആയിരുന്നു ബാരറ്റ് ടിഡിയായി തിരഞ്ഞെടുക്കപ്പെട്ടത്. രണ്ട് തവണ സർക്കാരിന്റെ ചീഫ് വിപ്പ് ആയിരുന്നു അദ്ദേഹം. 2011 മുതൽ 2016 വരെ സിഇഎൻ കോംഹെയർ ആയിരുന്നു. പ്രതിരോധ മന്ത്രിയുടെയും വിദ്യാഭ്യാസ മന്ത്രിയുടെയും ചുമതല അദ്ദേഹം വഹിച്ചിട്ടുണ്ട്.

ഡെറി: ഡെറിയിലെ റീസൈക്കിൾ സൈറ്റിൽ തീപിടിത്തം. പ്രദേശത്ത് തീ അണയ്ക്കുന്നതിനുള്ള രക്ഷാപ്രവർത്തനങ്ങൾ പുരോഗമിക്കുന്നു. 51 ഫയർ ഫോഴ്‌സ് ഉദ്യോഗസ്ഥർ എത്തിയാണ് രക്ഷാപ്രവർത്തനങ്ങൾ നടത്തുന്നത്. ക്ലൂണി റോഡിലെ സൈറ്റിൽ ആയിരുന്നു തീപിടിത്തം ഉണ്ടായത്. നോർതേൺ അയർലൻഡ് ഫയർ ആൻഡ് റെസ്‌ക്യൂ സർവ്വീസിന്റെ ആറ് ഫയർ എൻജിനുകൾ സ്ഥലത്ത് എത്തിയിട്ടുണ്ട്. ഏകദേശം 700 മുതൽ 800 ടൺവരെയുള്ള മാലിന്യങ്ങളാണ് ഇവിടെയുള്ളത്. അതിനാൽ രൂക്ഷമായ തീപിടിത്തമാണ് ഉണ്ടായത് എന്നാണ് ഉദ്യോഗസ്ഥർ വ്യക്തമാക്കുന്നത്.

ഡബ്ലിൻ: ഇന്ധനവിലയിൽ പ്രതിഷേധിച്ച് അയർലൻഡിൽ ആഹ്വാനം ചെയ്ത സമരം ആരംഭിച്ചു. ദി പീപ്പിൾ എഗൈൻസ്റ്റ് ഫ്യുവൽ പ്രൈസ് എന്ന സംഘടനയുടെ സമരമാണ് ഇന്ന് രാവിലെ ആറ് മണി മുതൽ ആരംഭിച്ചത്. അതേസമയം സമരം ആരംഭിച്ച പശ്ചാത്തലത്തിൽ വാഹന യാത്രികർക്ക് മുന്നറിയിപ്പുണ്ട്. രാജ്യത്തിന്റെ വിവിധ ഭാഗങ്ങളിൽ പ്രതിഷേധക്കാർ സമ്മേളിക്കും. വാഹന റാലികളും ഉണ്ടായിരിക്കും. വിവിധയിടങ്ങളിൽ നിന്നുള്ള റാലികൾ ഡബ്ലിനിൽ ഒത്തുചേരും. എം1 ഉൾപ്പെടെ പ്രതിഷേധക്കാരുടെ അസംബ്ലി പോയിന്റുകൾ ആണ്. അതിനാൽ വാഹന യാത്രികർ ഗതാഗത തടസ്സം നേരിട്ടേക്കാമെന്ന് സംഘാടകർ അറിയിച്ചു.

ടൈറോൺ: കൗണ്ടി ടൈറോണിൽ ഉടമയെ ആക്രമിച്ച് വീട് കൊള്ളയടിച്ചു. ഞായറാഴ്ച ആയിരുന്നു സംഭവം. ഡംഗനനിലെ വൈറ്റ്ബ്രിഡ്ജ് റോഡിലെ വീടായിരുന്നു കൊള്ളയടിച്ചത്. കള്ളന്മാരുടെ ആക്രമണത്തിൽ പരിക്കേറ്റ ഉടമയെ ആശുപത്രിയിൽ പ്രവേശിപ്പിച്ചു. രാത്രി 9.30 ഓടെ ആയിരുന്നു സംഭവം. രണ്ടംഗ സംഘമാണ് വീട് കൊള്ളയടിച്ചത്. മോഷണശ്രമം ചെറുത്ത വീട്ടുടമയെ ചവിട്ടിവീഴ്ത്തുകയായിരുന്നു. തുടർന്ന് നിലത്തിട്ട് ചവിട്ടുകയും ബേസ്‌ബോൾ ബാറ്റ് കൊണ്ട് അടിയ്ക്കുകയും ചെയ്തു. ശേഷം അദ്ദേഹത്തിന്റെ വാനും വീടും കൊള്ളയടിക്കുകയായിരുന്നു.

ഡബ്ലിൻ: ഐറിഷ് കവിയും എഴുത്തുകാരനുമായ ഗബ്രിയേൽ റോസെൻസ്‌റ്റോക്ക് അന്തരിച്ചു. 72 വയസ്സായിരുന്നു. കുടുംബമാണ് മരണ വിവരം പങ്കുവച്ചത്. ഐറിഷ് കവികളിൽ പ്രധാനപ്പെട്ട സ്ഥാനമാണ് അദ്ദേഹത്തിനുള്ളത്. ഏറെ നാളായി കാൻസർ ബാധിതൻ ആയിരുന്നു. ഇതേ തുടർന്നുള്ള ശാരീരികബുദ്ധിമുട്ടുകളെ തുടർന്നായിരുന്നു മരണം. 1949 ൽ കൗണ്ടി ലിമെറിക്കിലെ കിൽഫിനേനിൽ ആയിരുന്നു റോസൻസ്‌റ്റോക്ക് ജനിച്ചത്. റോസൻസ്‌റ്റോക്കിന്റെ നിര്യാണത്തിൽ നിരവധിപേർ അനുശോചനം അറിയിച്ചു.

ഡെറി: കൗണ്ടി ഡെറിയിൽ വാർഷിക ഈസ്റ്റർ മൺഡേ പരേഡ് നടന്നു. ക്രെഗനിലെ സെൻട്രൽ ഡ്രൈവ് ഏരിയയിൽ നിന്നാണ് പരേഡ് ആരംഭിച്ചത്. 1916ൽ ഡബ്ലിനിൽ ബ്രിട്ടീഷ് ഭരണത്തിനെതിരായ ഈസ്റ്റർ പ്രക്ഷോഭത്തിന്റെ പ്രതീകമായാണ് വർഷാവർഷം ഈസ്റ്റർ മൺഡേ പരേഡ് നടത്തുന്നത്. മുഖംമൂടികളും സൺഗ്ലാസുകളും അർദ്ധസൈനിക ശൈലിയിലുള്ള വസ്ത്രങ്ങളും ധരിച്ചായിരുന്നു ആളുകൾ പരേഡിൽ പങ്കെടുത്തത്. ഐറിഷ് പതാകയും റിപ്പബ്ലിക്കൻ പതാകകളും ഇവർ കയ്യിൽ കരുതിയിരുന്നു. സിറ്റി സെമിത്തേരിയിലേക്ക് ആയിരുന്നു പരേഡ്. നൂറ് കണക്കിന് ആളുകളാണ് പരേഡിൽ പങ്കുകൊണ്ടത്.

കോർക്ക്: കോർക്കിൽ വാഹനാപകടം. 50 കാരൻ മരിച്ചു. കാസിൽടൗൺറോച്ചെയിൽ ഇന്നലെ ഉച്ചയ്ക്ക് 12.50 ഓടെ ആയിരുന്നു സംഭവം. 50 കാരന്റെ മൃതദേഹം പോസ്റ്റ്‌മോർട്ടത്തിനായി ആശുപത്രിയിൽ സൂക്ഷിച്ചിരിക്കുകയാണ്. 50 കാരൻ സഞ്ചരിച്ച വാഹനം നിയന്ത്രണം വിട്ട് അപകടത്തിൽപ്പെടുകയായിരുന്നു. സാരമായി പരിക്കേറ്റ അദ്ദേഹം സംഭവ സ്ഥലത്ത് തന്നെ മരിച്ചു. സംഭവത്തിൽ പോലീസ് അന്വേഷണം ആരംഭിച്ചു. ഫോറൻസിക് സംഘം എത്തി സ്ഥലത്ത് പരിശോധന നടത്തി. സംഭവത്തിന്റെ ദൃക്‌സാക്ഷികളോട് ബന്ധപ്പെടാൻ പോലീസ് ആവശ്യപ്പെട്ടു.