Author: sreejithakvijayan

കെറി: കൗണ്ടി കെറിയിൽ യുവതിയെ കൊലപ്പെടുത്താൻ ശ്രമിച്ച യുക്രയ്ൻ പൗരൻ കുറ്റക്കാരനെന്ന് കോടതി. 49 കാരനായ ഹ്രിഹോരി ഷ്രിയോടെങ്കോയാണ് കേസിലെ പ്രതി. കഴിഞ്ഞ വർഷം ആയിരുന്നു കെറിയിലെ ഒരു അവധിക്കാല വസതിയിൽവച്ച് ഇയാൾ പെൺകുട്ടിയെ കൊലപ്പെടുത്താൻ ശ്രമിച്ചത്. ലിമെറിക്കിലെ സെൻട്രൽ ക്രിമിനൽ കോടതിയാണ് കേസ് പരിഗണിച്ചത്. വിചാരണയ്ക്കിടെ താൻ കൊലപ്പെടുത്താൻ ശ്രമിച്ചെന്ന കാര്യം ഇയാൾ കോടതി മുൻപാകെ സമ്മതിച്ചു. ഇയാൾക്കുള്ള ശിക്ഷ പിന്നീട് കോടതി വിധിക്കും. അറസ്റ്റിലായതിന് ശേഷം ഇയാൾ പോലീസ് കസ്റ്റഡിയിലാണ്. 2024 ജനുവരി 13 ന് ആയിരുന്നു ഹ്രിഹോരി യുവതിയെ കൊലപ്പെടുത്താൻ ശ്രമിച്ചത്.

ഡബ്ലിൻ: ഡബ്ലിൻ നഗരത്തിലെ ഉപേക്ഷിക്കപ്പെട്ട കെട്ടിടങ്ങളെ കോസ്റ്റ് റെന്റൽ ഹോമുകളാക്കാൻ തീരുമാനം. ഡബ്ലിൻ സിറ്റി കൗൺസിലാണ് ഇത് സംബന്ധിച്ച പദ്ധതി ആവിഷ്‌കരിച്ചിരിക്കുന്നത്. ഉപേക്ഷിക്കപ്പെട്ട കെട്ടിടങ്ങൾ അവശ്യ തൊഴിലാളികൾക്കുള്ള കോസ്റ്റ് റെന്റൽ ഹോമുകാളായി പരിവർത്തനം ചെയ്യാനാണ് തീരുമാനം. ലോർഡ് മേയർ റേ മക് ആഡമാണ് പദ്ധതി പ്രഖ്യാപിച്ചത്. ഗാർഡകൾ, അദ്ധ്യാപകർ, നഴ്‌സുമാർ, സുപ്പർമാർക്കറ്റ് ജീവനക്കാരെപ്പോലുള്ള പ്രൊഫഷണൽസ് എന്നിവരെയാണ് കൗൺസിൽ അവശ്യതൊഴിലാളികളായി കണക്കാക്കുന്നത്. ഇവർക്ക് ആവശ്യമുള്ള താമസസൗകര്യം ഉറപ്പുവരുത്തുകയാണ് ലക്ഷ്യം. ഇത് സംബന്ധിച്ച് ഭവന, തദ്ദേശ സ്വയംഭരണ വകുപ്പുമായും ചർച്ചകൾ നടത്തും.

ഡബ്ലിൻ: അഫ്ഗാനിസ്ഥാൻകാരെ പുറത്താക്കാനുള്ള നടപടി വേണമെന്ന ആവശ്യവുമായി അയർലൻഡടക്കമുള്ള 20 യൂറോപ്യൻ രാജ്യങ്ങൾ. ഇക്കാര്യം ചൂണ്ടിക്കാട്ടി ഇയു കമ്മീഷന്റെ ആഭ്യന്തര കാര്യ, മൈഗ്രേഷൻ കമ്മീഷണർ മാഗ്നസ് ബ്രണ്ണർക്ക് രാജ്യങ്ങൾ ചേർന്ന് കത്ത് നൽകിയത്. 19 യൂറോപ്യൻ രാജ്യങ്ങളും നോർവേയുമാണ് കത്ത് നൽകിയിരിക്കുന്നത്. രാജ്യത്ത് നിയമവിരുദ്ധമായി താമസിക്കുന്നവരെയും കുറ്റകൃത്യങ്ങളിൽ ഉൾപ്പെട്ടവരെയും രാജ്യത്ത് നിന്നും പുറത്താക്കണം എന്നാണ് ഇവരുടെ ആവശ്യം. നിലവിൽ രാജ്യത്ത് ഈ നിലയിൽ തങ്ങുന്നവർ സ്വമേധയാ രാജ്യം വിട്ട് പോകേണ്ടതാണ്. അല്ലാത്തപക്ഷം നടപടികളിലൂടെ ഇവരെ പുറത്താക്കണമെന്നും കത്തിൽ ആവശ്യപ്പെടുന്നു. 2021 ൽ താലിബാൻ അധികാരത്തിൽ വന്ന ശേഷം അഫ്ഗാനിസ്ഥാനുമായി ഫോർമൽ റിട്ടേൺ കരാർ നിലവിലില്ല. അതിനാൽ ഗുരുതര കുറ്റകൃത്യങ്ങളിൽ ഉൾപ്പെട്ടവരെ പേലും നാടുകടത്താൻ യൂറോപ്യൻ രാജ്യങ്ങൾക്ക് കഴിയുന്നില്ല.

ഡബ്ലിൻ: അയർലൻഡ് സർക്കാരിന് കഴിഞ്ഞ വർഷത്തെ മിച്ചമായി രേഖപ്പെടുത്തിയത് റെക്കോർഡ് തുക. 22. 6 ബില്യൺ യൂറോയുടെ മിച്ചമാണ് 2024 ൽ രേഖപ്പെടുത്തിയത്. രാജ്യത്തിന്റെ ജിഡിപിയുടെ നാല് ശതമാനമാണ് ഇത്. ജനറൽ ഗവൺമെന്റ് ബാലൻസ് സംബന്ധിച്ച കണക്കുകൾ പുറത്തുവരുമ്പോൾ 22.6 ബില്യൺ യൂറോയുടെ മിച്ചമാണ് കാണിക്കുന്നത്. 2023 ലെ മിച്ചത്തെക്കാൾ മൂന്നിരട്ടി കൂടുതലാണ് ഇത്. 2023 ൽ 7.2 ബില്യൺ യൂറോയുടെ മിച്ചമാണ് ഉണ്ടായത്. കഴിഞ്ഞ വർഷം മൊത്തം സർക്കാർ വരുമാനം 148 ബില്യൺ യൂറോയാണ്. മുൻ വർഷത്തെ അപേക്ഷിച്ച് 24.8 ബില്യൺ യൂറോയുടെ വർധനവാണ് കഴിഞ്ഞ വർഷം ഉണ്ടായിരിക്കുന്നത്.

ഡബ്ലിൻ: ലൈംഗിക പീഡന കേസിൽ മുൻ ഡിയുപി ലീഡർ ജെഫ്രി ഡൊണാൾഡ്‌സണിന്റെയും ഭാര്യ എലേനർ ഡൊണാൾഡ്‌സണിന്റെയും വിചാരണ തിയതി വീണ്ടും നീട്ടി. ന്യൂറി ക്രൗൺ കോടതി ഇക്കാര്യം സ്ഥിരീകരിച്ചു. എലേനറിന്റെ ആരോഗ്യം സംബന്ധിച്ച് ആശങ്കകൾ ഉയർന്നതിന് പിന്നാലെയാണ് നടപടി. കേസിൽ ഇന്ന് കോടതി വാദം കേട്ടിരുന്നു. ഇതിനിടെ എലേനറുടെ ആരോഗ്യാവസ്ഥ സംബന്ധിച്ച് പുതിയ വിവരങ്ങൾ കോടതിയ്ക്ക് മുൻപാകെ ലഭിക്കുകയായിരുന്നു. ഇത് പരിഗണിച്ചാണ് ജഡ്ജി പോൾ റാംസി വിചാരണ നീട്ടിയത്. കേസിൽ വിചാരണ അടുത്ത മാസം മൂന്നിന് ആരംഭിക്കുമെന്നതാണ് പുതിയ വിവരം. കേസിൽ ഈ വർഷം മാർച്ചിൽ വിചാരണ ആരംഭിക്കേണ്ടതായിരുന്നു. എന്നാൽ എലേനറുടെ ആരോഗ്യസ്ഥിതി കാരണം വിചാരണ നീട്ടുകയായിരുന്നു.

മീത്ത്: കൗണ്ടി മീത്തിൽ മാൻ കുറുകെ ചാടി അപകടം. സംഭവത്തിൽ 49 വയസ്സുള്ള ഇരുചക്രവാഹന യാത്രികന് പരിക്കേറ്റു. അതേസമയം വളരെ അത്ഭുതകരമായിട്ടാണ് അദ്ദേഹത്തിന് ജീവൻ തിരിച്ചുകിട്ടിയത്. നാവൻ സ്വദേശി കേതൽ ഫിനെഗൻ ആണ് അപകടത്തിൽപ്പെട്ടത്. ഇക്കഴിഞ്ഞ വ്യാഴാഴ്ച വൈകീട്ട് ആറ് മണിയ്ക്കായിരുന്നു സംഭവം. നാവനിൽ നന്നും ഡൺഷോഫ്‌ലിനിലേക്ക് പോകുകയായിരുന്നു കേതൽ. ഇതിനിടെയായിരുന്നു അപകടം ഉണ്ടായത്. അപകടത്തിൽ സാരമായ പരിക്കുകൾ ഒന്നും ഉണ്ടാകാതിരുന്നത് ഭാഗ്യമായി.

ലിമെറിക്ക്: കള്ളപ്പണം വെളുപ്പിക്കൽ കേസിൽ യുവാവിന് തടവ് ശിക്ഷ. 37 കാരനായ റിച്ചാർഡ് ട്രെസിയാണ് പ്രതി. രണ്ട് വർഷവും എട്ട് മാസവുമാണ് യുവാവിന് തടവ് ശിക്ഷയായി വിധിച്ചത്. പ്രത്യേകിച്ച് വരുമാനമൊന്നും ഇല്ലാത്ത വ്യക്തിയാണ് റിച്ചാർഡ്. എന്നാൽ ഇയാൾ 1 ലക്ഷം യൂറോയ്ക്ക് പങ്കാളിയുമൊത്ത് താമസിക്കുന്ന വീട് പുതുക്കിപ്പണിഞ്ഞിരുന്നു. ഇതിന് പിന്നാലെ പണം കേന്ദ്രീകരിച്ചുള്ള അന്വേഷണത്തിലാണ് കള്ളപ്പണം വെളുപ്പിച്ചതായി വ്യക്തമായത്.

ഡബ്ലിൻ: യൂറോപ്പിലെ ഏറ്റവും കുറ്റകൃത്യങ്ങൾ നിറഞ്ഞ നഗരങ്ങളുടെ പട്ടികയിൽ ഐറിഷ് നഗരവും. ദ്രോഗെഡയാണ് പട്ടികയിൽ ഇടം പിടിച്ചിരിക്കുന്നത്. യൂറോപ്യൻ നഗരങ്ങളുടെ പട്ടികയിൽ 31ാം സ്ഥാനമാണ് ദ്രോഗെഡയ്ക്ക്. കുറ്റകൃത്യഭീതി ഏറ്റവും കൂടുതലുള്ള നഗരമാണ് ദ്രോഗെഡയെന്നാണ് പട്ടികയിൽ നിന്നും വ്യക്തമാകുന്നത്. നംബിയോ യൂറോപ്യൻ ക്രൈം ഇൻഡക്‌സ് പ്രകാരം ഉള്ള റാങ്കിംഗിന്റെ വിവരങ്ങളാണ് പുറത്തുവന്നിരിക്കുന്നത്. യൂറോപ്പിലെ മറ്റ് പ്രധാന നഗരങ്ങൾ ദ്രോഗെഡയ്ക്ക് പിന്നിൽ ആണെന്ന് പട്ടികയിൽ നിന്നും വ്യക്തമാണ്. അയർലൻഡിലെ ഏറ്റവും പ്രധാനപ്പെട്ട നഗരങ്ങളിൽ ഒന്നാണ് ദ്രോഗെഡ. ഈ നഗരത്തിൽ കുറ്റകൃത്യങ്ങൾ വർധിച്ചത് വലിയ ചർച്ചയ്ക്കാണ് വഴിവച്ചിരിക്കുന്നത്.

ബെൽഫാസ്റ്റ്: പുതുതായി രൂപീകരിച്ച നോർതേൺ അയർലൻഡ് ബെൽഫാസ്റ്റ് പ്രൊവിൻസിന്റെ പ്രവർത്തനോദ്ഘാടനം നാളെ. വൈകീട്ട് അഞ്ച് മണിയ്ക്ക് ബാലി ഹാക്കമോർ സെന്റ് കോൾമിസിൽ ഇടവക ഹാളിലാണ് പരിപാടി. വേൾഡ് മലയാളി കൗൺസിലിന്റെ ആഭിമുഖ്യത്തിൽ രൂപീകരിച്ച പ്രവർത്തന സമിതിയാണ് നോർതേൺ അയർലൻഡ് ബെൽഫാസ്റ്റ് പ്രൊവിൻസ്. ഉദ്ഘാടനത്തോട് അനുബന്ധിച്ച് വിവിധ കലാ മേളകൾ സംഘടിപ്പിക്കുന്നുണ്ട്. കലാഭവൻ ദിലീപ് അവതരിപ്പിക്കുന്ന കോമഡി ഷോ, നന്ദന സന്തോഷിന്റെ നൃത്തം, ഡിജെ എന്നിവ ഉണ്ടാകും. പരിപാടിയിൽ പങ്കെടുക്കുന്നവർക്ക് ഭക്ഷണവും ഉണ്ടാകും. പരിപാടിയിലേക്ക് എല്ലാവരെയും സ്വാഗതം ചെയ്യുന്നതായി ബന്ധപ്പെട്ടവർ അറിയിച്ചു.

ഡെറി: കൗണ്ടി ഡെറിയിലെ മാഗരഫെൽറ്റ് റോഡ് അടച്ചു. വാഹനാപകടത്തിന് പിന്നാലെയാണ് റോഡ് അടച്ചത്. വാഹനായാത്രികർ നടപടിയോട് സഹകരിക്കണമെന്ന് അധികൃതർ അറിയിച്ചു. ഇന്ന് രാവിലെയോടെയായിരുന്നു അപകടം ഉണ്ടായത്. വിവരം അറിഞ്ഞയുടൻ പോലീസ് സ്ഥലത്ത് എത്തി രക്ഷാപ്രവർത്തനങ്ങൾ ആരംഭിക്കുകയായിരുന്നു. ടൂംബ്രിഡ്ജിൽ നിന്നുള്ള കാസിൽഡോസൺ റൗണ്ട്എബൗട്ടിന് സമീപമാണ് അടച്ചിടൽ എന്ന് പിഎസ്എൻഐ പ്രസ്താവനയിൽ പറയുന്നു. അപകടത്തിൽ മൂന്ന് പേർക്ക് സാരമായി പരിക്കേറ്റിട്ടുണ്ട്. ഇവരെ ആശുപത്രിയിൽ പ്രവേശിപ്പിച്ചിരിക്കുകയാണ്.