പ്രകൃതി നൽകുന്ന അമൃതാണ് കരിക്കിൻവെള്ളം എന്നതിൽ സംശയമില്ല. ഇത് ആരോഗ്യത്തിന് വളരെ നല്ലതുമാണ്. കലോറി കുറവും ഇലക്ട്രോലൈറ്റുകളാൽ സമ്പുഷ്ടവുമാണ് കരിക്കിൻവെള്ളം. അതിനാൽ വ്യായാമത്തിന് ശേഷം കരിക്കിൻ വെള്ളം കുടിക്കുന്നതാണ് ഉചിതം . ഇത് ശരീരത്തിലെ ജലാംശം വർധിക്കാൻ സഹായിക്കുന്നു. മാത്രമല്ല, ചർമ്മത്തിന്റെ തിളക്കം വർദ്ധിപ്പിക്കുന്നത് മുതൽ ദഹനം വരെ, ഇതിന്റെ ആരോഗ്യ ഗുണങ്ങൾ നിരവധിയാണ്.
എന്നാൽ അമൃതിന്റെ ഗുണങ്ങളുള്ള ഈ പാനീയം എല്ലാവർക്കും അനുയോജ്യമല്ല. . വിദഗ്ദ്ധോപദേശത്തിന്റെയും വൈദ്യശാസ്ത്ര ഗവേഷണത്തിന്റെയും അടിസ്ഥാനത്തിൽ, ചില ആളുകളുടെ ആരോഗ്യസ്ഥിതികൾക്ക് തേങ്ങാവെള്ളം അനുയോജ്യമല്ലെന്ന് പറയപ്പെടുന്നു.
കരിക്കിൻവെള്ളത്തിൽ സ്വാഭാവിക പഞ്ചസാര അടങ്ങിയിരിക്കുന്നതാൽ ഇത് പ്രമേഹ രോഗികൾക്ക് നല്ലതല്ല . ഒരു ചെറിയ ഗ്ലാസ് (200 മില്ലി) കരിക്കിൻവെള്ളത്തിൽ ഏകദേശം 6 മുതൽ 7 ഗ്രാം വരെ പഞ്ചസാര അടങ്ങിയിരിക്കുന്നു. ഇത് പഴച്ചാറുകളെ അപേക്ഷിച്ച് കുറവാണ്, എങ്കിലും ഇത് ചിലപ്പോൾ രക്തത്തിലെ പഞ്ചസാരയുടെ അളവ് വർദ്ധിപ്പിക്കും.
ചിലരിൽ കരിക്കിൻവെള്ളം കുടിച്ച ഉടനെ ചൊറിച്ചിൽ, തിണർപ്പ്, വീക്കം അല്ലെങ്കിൽ ചർമ്മത്തിൽ ചുവപ്പ് എന്നിവ അനുഭവപ്പെടുന്നു. ചില സന്ദർഭങ്ങളിൽ, ഇത് ശ്വസന പ്രശ്നങ്ങൾക്കും കാരണമാകും. കുട്ടികൾക്ക് കരിക്കിൻവെള്ളത്തിന് അലർജി ഉണ്ടാകാനുള്ള സാധ്യത കൂടുതലാണെന്ന് പഠനങ്ങൾ തെളിയിച്ചിട്ടുണ്ട്. കരിക്കിൻവെള്ളം കുടിച്ചതിന് ശേഷം എന്തെങ്കിലും അസാധാരണമായ ലക്ഷണങ്ങൾ അനുഭവപ്പെടുകയാണെങ്കിൽ, അത് കുടിക്കരുത്, ഉടൻ തന്നെ വൈദ്യസഹായം തേടുക.
വൃക്ക സംബന്ധമായ പ്രശ്നങ്ങൾ ഉള്ളവർക്ക് കരിക്കിൻവെള്ളം നല്ലതല്ല. തേങ്ങാവെള്ളത്തിൽ പൊട്ടാസ്യം അടങ്ങിയിട്ടുണ്ട്. വൃക്ക സംബന്ധമായ പ്രശ്നങ്ങൾ ഉള്ളവർക്ക് ഇത് അപകടകരമാണ്. കേടായ വൃക്കകൾക്ക് അധിക പൊട്ടാസ്യം പുറന്തള്ളാൻ ഏറെ ബുദ്ധിമുട്ടാണ് . ഇത് പിന്നീട് നിങ്ങളുടെ രക്തത്തിൽ അടിഞ്ഞുകൂടും. ഇത് പേശികളെയും ഹൃദയത്തെയും ബാധിക്കുന്ന ഒരു അവസ്ഥയായ ഹൈപ്പർകലീമിയയിലേക്കും നയിച്ചേക്കാം. ബലഹീനത, ഓക്കാനം, കഠിനമായ കേസുകളിൽ ക്രമരഹിതമായ ഹൃദയമിടിപ്പ് എന്നിവയാണ് ഇതിന്റെ ലക്ഷണങ്ങൾ.
കരിക്കിൻവെള്ളത്തിൽ പൊട്ടാസ്യം അടങ്ങിയിരിക്കുന്നതിനാൽ രക്തസമ്മർദ്ദം കുറയ്ക്കാൻ സഹായിക്കുമെന്ന് പറയപ്പെടുന്നു. രക്തസമ്മർദ്ദ മരുന്നുകൾ കഴിക്കുന്ന ആളുകൾക്ക്, പ്രത്യേകിച്ച് എസിഇ ഇൻഹിബിറ്ററുകൾ അല്ലെങ്കിൽ പൊട്ടാസ്യം-സ്പാറിംഗ് ഡൈയൂററ്റിക്സ് കഴിക്കുന്നവർക്ക് കരിക്കിൻവെള്ളം അപകടകരമാണ്. ഈ മരുന്നുകൾ പൊട്ടാസ്യത്തിന്റെ അളവ് വർദ്ധിപ്പിക്കും. ഹൃദയ, വൃക്ക പ്രശ്നങ്ങൾ കാരണം ചില ആളുകളോട് കുറഞ്ഞ ഇലക്ട്രോലൈറ്റ് ഭക്ഷണക്രമം പിന്തുടരാൻ പറയാറുണ്ട്. എന്നാൽ പൊട്ടാസ്യം, സോഡിയം, മഗ്നീഷ്യം എന്നിവയുടെ മിശ്രിതമായ തേങ്ങാവെള്ളം ഇതിനെ തടസ്സപ്പെടുത്തും. ഈ ധാതുക്കളുടെ അമിത അളവ് ക്ഷീണം, മലബന്ധം, ഹൃദയ താള പ്രശ്നങ്ങൾ എന്നിവയ്ക്ക് കാരണമാകും
