കൊല്ലം: മഞ്ഞപ്പിത്തം ബാധിച്ച് ചികിത്സയിലായിരുന്ന സഹോദരങ്ങളിൽ ഒരാൾ കൂടി മരിച്ചു . കണ്ണനല്ലൂർ ചേരിക്കോണം സ്വദേശി നീതു (17) ആണ് മരിച്ചത്. തിരുവനന്തപുരം മെഡിക്കൽ കോളേജ് ആശുപത്രിയിൽ ചികിത്സയിലായിരുന്നു . നീതുവിന്റെ സഹോദരി മീനാക്ഷി രണ്ട് ദിവസം മുൻപ് മരണപ്പെട്ടിരുന്നു
.മഞ്ഞപ്പിത്തം ബാധിച്ച സഹോദരൻ അമ്പാടി കൊല്ലത്തെ സ്വകാര്യ ആശുപത്രിയിൽ ചികിത്സയിലാണ്.മൂന്ന് കുട്ടികളുടെയും രോഗലക്ഷണങ്ങളെക്കുറിച്ച് കുടുംബം പഞ്ചായത്ത് അധികൃതരെ അറിയിച്ചിട്ടില്ലെന്ന് തൃക്കോവിൽവട്ടം ഗ്രാമപഞ്ചായത്ത് പ്രസിഡന്റ് സിന്ധു പറഞ്ഞു. “ഏപ്രിൽ 24 ന് രോഗിയെ ഇ.എസ്.ഐ ആശുപത്രിയിൽ കൊണ്ടുപോയി, രോഗം സ്ഥിരീകരിച്ചു. അപ്പോഴാണ് ഞങ്ങൾക്ക് വിവരം ലഭിച്ചത്,” സിന്ധു പറഞ്ഞു.
പ്രദേശത്ത് 10-12 പേർക്ക് രോഗലക്ഷണങ്ങൾ കണ്ടുതുടങ്ങിയിട്ടുണ്ടെന്നും അവരിൽ ഭൂരിഭാഗവും ചേരിക്കോണം വാർഡിലാണെന്നും പഞ്ചായത്ത് പ്രസിഡന്റ് പറഞ്ഞു. “അവർ പരിശോധനയ്ക്ക് വിധേയരാകാൻ തയ്യാറല്ല, പരമ്പരാഗത ചികിത്സയാണ് തിരഞ്ഞെടുക്കുന്നത്, രണ്ട് സഹോദരിമാരുടെയും മരണത്തെത്തുടർന്ന്, പഞ്ചായത്ത് അധികൃതർ പ്രദേശത്ത് ക്ലോറിനേഷനും മറ്റ് സുരക്ഷാ നടപടികളും ശക്തിപ്പെടുത്തിയിട്ടുണ്ട്. മെയ് 20 ന് ഞങ്ങൾ ഒരു രക്ത സാമ്പിൾ ശേഖരണ ക്യാമ്പ് സംഘടിപ്പിക്കുന്നു. അടുത്ത രണ്ട് മാസത്തേക്ക് സുരക്ഷാ നടപടികൾ തുടരും, – പഞ്ചായത്ത് പ്രസിഡന്റ് വ്യക്തമാക്കി.
