മലപ്പുറം: കുറ്റിപ്പുറത്ത് ഭക്ഷ്യവിഷബാധയേറ്റ് ആശുപത്രിയിലേക്ക് കൊണ്ടുവന്ന ഏഴുവയസ്സുകാരി കുഴഞ്ഞുവീണ് മരിച്ചു. എടച്ചാലം കരിമ്പനക്കൽ സ്വദേശി ഹക്കീമിന്റെ മകൾ ലസ്നയാണ് മരിച്ചത്. ഇന്നലെ ഉച്ചകഴിഞ്ഞ് 3 മണിയോടെ പൂക്കാട്ടിരിയിലെ സ്വകാര്യ ആശുപത്രിയിൽ വച്ചായിരുന്നു അന്ത്യം . വയറിളക്കവും ഛർദ്ദിയും അനുഭവപ്പെട്ടതിനെ തുടർന്ന് ലസ്നയ്ക്കൊപ്പം അമ്മ ഷഹല, സഹോദരി മിൻസ, ഹക്കീമിന്റെ മാതാപിതാക്കൾ, സഹോദരി എന്നിവരെയും ചികിത്സയ്ക്കായി അതേ ആശുപത്രിയിൽ പ്രവേശിപ്പിച്ചിരുന്നു.
ഗർഭിണിയായ ഷഹലയ്ക്കും മിൻസയ്ക്കും വളരെ ക്ഷീണം തോന്നിയതിനാൽ ഡ്രിപ്പ് നൽകി. മറ്റുള്ളവർക്കും ചികിത്സ നൽകി. ഇതിനിടയിൽ ലസ്ന കുഴഞ്ഞുവീണ് മരിക്കുകയായിരുന്നു . മറ്റുള്ളവരെ പിന്നീട് കോട്ടക്കലിലെ ഒരു സ്വകാര്യ ആശുപത്രിയിലേക്ക് മാറ്റി. കുട്ടിയുടെ മരണത്തിന് കാരണം ഭക്ഷ്യവിഷബാധയാണെന്ന് സംശയിക്കുന്നു. വീട്ടിൽ ഉണ്ടാക്കിയ ഭക്ഷണമാണ് കുടുംബം കഴിച്ചതെന്നും അതിന്റെ സാമ്പിളുകൾ എടുത്ത് പരിശോധനയ്ക്ക് അയച്ചിട്ടുണ്ടെന്നും ആരോഗ്യ വകുപ്പ് ഉദ്യോഗസ്ഥർ പറഞ്ഞു. ഫ്രിഡ്ജിൽ സൂക്ഷിച്ച ഭക്ഷണമാണ് അവർ കഴിച്ചത്. കുട്ടിയുടെ പോസ്റ്റ്മോർട്ടം റിപ്പോർട്ട് ലഭിച്ചതിന് ശേഷമേ മരണകാരണം വ്യക്തമാകൂ.
