ഡബ്ലിന്: നവാഭിഷിക്തനായ ബലേസിയോസ് ജോസഫ് കാതോലിക്കാ ബാവ അയര്ലന്ഡ് സന്ദര്ശിക്കും. അടുത്ത മാസം 19 മുതല് 24 വരെയാണ് സന്ദര്ശനം. അദ്ദേഹത്തെ അയര്ലന്ഡ് ഭദ്രാസന മെത്രാപ്പോലീത്ത അഭി. തോമസ് മോര് അലക്സന്ത്രയോസ് തിരുമേനി, ഭദ്രാസന വൈസ് പ്രസിഡന്റ് ജിനോ ജോസഫ് അച്ചന്, സെക്രട്ടറി ഡോക്ടര് ജോബി സ്കറിയ അച്ചന് , ട്രഷറര് സുനില് എബ്രഹാം എന്നിവരുടെ നേതൃത്വത്തില് ഭദ്രാസന ഭാരവാഹികളും, ഭദ്രാസന കൗണ്സില് അംഗങ്ങളും, ഭക്ത സംഘടനാ ഭാരവാഹികളും ചേര്ന്ന് സ്വീകരിക്കും.
19ന് വൈകുന്നേരം ഗാല്വെ ജോര്ജ്ജ് യാക്കോബായ സുറിയാനിപ്പള്ളിയില് എത്തിച്ചേരുന്ന ബാവ തിരുമേനിക്കു സ്വികരണം നല്കും. തുടര്ന്നുള്ള പ്രാര്ത്ഥനയ്ക്ക് അദ്ദേഹം കാര്മികത്വം വഹിക്കും. 20 ന് മരിയന് തീര്ത്ഥാടന കേന്ദ്രമായ നോക്കില് വച്ച്
ബാവ തിരുമേനിയുടെ മുഖ്യകാര്മ്മികത്വത്തിലും, അഭി. തോമസ് മോര് അലക്സന്ത്രയോസ് തിരുമേനിയുടെ സഹകാര്മ്മികത്വത്തിലും വി. കുര്ബ്ബാന നടക്കും. 21 ന് ഡബ്ലിന് സെന്റ് ഗ്രീഗോറിയോസ് യാക്കോബായ സുറിയാനിപ്പള്ളിയുടെ ഇരുപതാമത് വാര്ഷീകാഘോഷപരിപാടികളില് പങ്കെടുക്കും. തുടര്ന്ന് ഡബ്ലിന് സെന്റ് ഗ്രീഗോറിയോസ് പള്ളി പുതുതായി വാങ്ങിയ സ്ഥലത്തിന്റെ കൂദാശ ബാവാതിരുമേനി നിര്വ്വഹിക്കും.
22ന് വാട്ടര്ഫോര്ഡ് സെന്റ് മേരീസ് പള്ളിയില് സന്ധ്യാപ്രാര്ത്ഥനയ്ക്ക് ശ്രേഷ്ഠ ബാവാതിരുമേനി നേതൃത്വം വഹിക്കും. 23 ന് ബാവാതിരുമേനി കത്തോലിക്കാ സഭയുടെ വാട്ടര്ഫോര്ഡ് ബിഷപ്പായി അല്ഫോന്സാസ് കല്ലിനാനെ സന്ദര്ശിക്കും.കോര്ക്ക് സെന്റ് പീറ്റേഴ്സ് യാക്കോബായ സുറിയാനി പള്ളിയില് സന്ധ്യാ പ്രാര്ത്ഥനയ്ക്കും സ്വീകരണത്തിനും പിന്നാലെ 24 ന് അദ്ദേഹം മടങ്ങും.
