ആലപ്പുഴ: വണ്ടാനം ഗവൺമെന്റ് മെഡിക്കൽ കോളേജിലെ ശസ്ത്രക്രിയാ പിഴവുമായി ബന്ധപ്പെട്ട് നടപടിയുമായി ആരോഗ്യ വകുപ്പ് . ശസ്ത്രക്രിയ നടത്തിയ ഡോക്ടർ ഡോ. ജെ. ഷാഹിദ, നഴ്സ് പി.എസ്. ധന്യ എന്നിവരെ അന്വേഷണവിധേയമായി സസ്പെൻഡ് ചെയ്തു.
മെഡിക്കൽ കോളേജ് പ്രിൻസിപ്പൽ സമർപ്പിച്ച പ്രാഥമിക അന്വേഷണ റിപ്പോർട്ടിന്റെ അടിസ്ഥാനത്തിലാണ് നടപടി. ശസ്ത്രക്രിയാ പിഴവിന് ഉത്തരവാദികളായവർക്കെതിരെ കർശന നടപടി സ്വീകരിക്കുമെന്ന് ആരോഗ്യ മന്ത്രി വീണ ജോർജ് നേരത്തെ വ്യക്തമാക്കിയിരുന്നു. സംഭവത്തെക്കുറിച്ച് അന്വേഷിക്കാൻ വിദഗ്ധ സമിതിയെ നിയമിച്ചിട്ടുണ്ട്. അന്വേഷണ സംഘത്തിൽ ഗൈനക്കോളജി പ്രൊഫസർ, ഫോറൻസിക് വിഭാഗം മേധാവി, തിരുവനന്തപുരം മെഡിക്കൽ കോളേജിലെ സർജറി വിഭാഗത്തിലെ പ്രൊഫസർ എന്നിവർ ഉൾപ്പെടുന്നു.
അഞ്ച് വർഷം മുമ്പ് ആലപ്പുഴ മെഡിക്കൽ കോളേജ് ആശുപത്രിയിൽ ശസ്ത്രക്രിയയ്ക്ക് വിധേയയായ 59 കാരിയായ ഉഷ ജോസഫിന്റെ വയറിനുള്ളിലാണ് കത്രിക കണ്ടെത്തിയത് . നിലവിൽ ഉഷയെ വിദഗ്ധ ചികിത്സയ്ക്കായി എറണാകുളത്തെ അമൃത ആശുപത്രിയിലേക്ക് മാറ്റിയിരിക്കുകയാണ് . വിശദമായ വൈദ്യപരിശോധനകൾക്ക് ശേഷം കത്രിക നീക്കം ചെയ്യാനുള്ള ശസ്ത്രക്രിയയുടെ തീയതി തീരുമാനിക്കും.
2021 മെയ് 10 നാണ് ഗർഭാശയത്തിൽ ഉഷയ്ക്ക് ശസ്ത്രക്രിയ നടത്തിയത് . വീട്ടിലേക്ക് മടങ്ങിയ ശേഷം കടുത്ത വേദനയും തുടർച്ചയായ രക്തസ്രാവവും അനുഭവപ്പെട്ടു. നിരവധി ഡോക്ടർമാരിൽ നിന്ന് ചികിത്സ ലഭിച്ചെങ്കിലും അവരുടെ നില മെച്ചപ്പെട്ടില്ല. വർഷങ്ങളോളം അവർ കുത്തിവയ്പ്പുകളും മരുന്നുകളും എടുത്തു .
പിന്നീട് മെഡിക്കൽ കോളേജ് ആശുപത്രിയിൽ ചികിത്സ തേടിയപ്പോൾ മൂത്രത്തിൽ കല്ലാണെന്ന് പറഞ്ഞ് തിരിച്ചയച്ചു. അടുത്തിടെ, ഒരു യൂറോളജി ഡോക്ടറെ സമീപിച്ചപ്പോൾ, എക്സ്-റേ ഉൾപ്പെടെയുള്ള പരിശോധനകൾ നിർദ്ദേശിക്കപ്പെട്ടു. എക്സ്-റേ പരിശോധനയ്ക്കിടെയാണ് വയറിനുള്ളിലെ കത്രിക കണ്ടെത്തിയത്. തുടർന്നാണ് ആശുപത്രിയിലെ അനാസ്ഥയുടെ വിവരം പുറത്ത് വന്നത്.
