പട്ന: ബീഹാർ നിയമസഭാ തിരഞ്ഞെടുപ്പിനുള്ള പ്രകടന പത്രിക എൻഡിഎ പുറത്തിറക്കി. സംസ്ഥാനത്തെ ഒരു കോടിയിലധികം യുവാക്കൾക്ക് സർക്കാർ ജോലികൾ വാഗ്ദാനം ചെയ്താണ് പത്രിക പുറത്തിറക്കിയിരിക്കുന്നത്. അഞ്ച് വർഷത്തിനുള്ളിൽ വെള്ളപ്പൊക്ക രഹിത ബീഹാർ ഉറപ്പാക്കുമെന്നും സഖ്യം ഉറപ്പുനൽകി.
സ്ത്രീ ശാക്തീകരണ പദ്ധതികളിൽ പ്രത്യേക ശ്രദ്ധ കേന്ദ്രീകരിച്ചാണ് പത്രിക തയ്യാറാക്കിയിരിക്കുന്നത് . കോടിക്കണക്കിന് സ്ത്രീകളെ ‘ലക്ഷപതി ദീദി’കളാക്കി മാറ്റുക എന്ന അഭിലാഷകരമായ ലക്ഷ്യം, ബീഹാറിൽ നാല് അന്താരാഷ്ട്ര വിമാനത്താവളങ്ങളുടെയും ഏഴ് എക്സ്പ്രസ് വേകളുടെയും നിർമ്മാണം ഉൾപ്പെടുന്ന ഒരു പ്രധാന അടിസ്ഥാന സൗകര്യ വികസനം എന്നിവയും പത്രികയിൽ പറയുന്നു.
കേന്ദ്ര മന്ത്രിയും ബിജെപി പ്രസിഡന്റുമായ ജെ പി നദ്ദ, മുഖ്യമന്ത്രി നിതീഷ് കുമാർ, കേന്ദ്ര മന്ത്രിയും ഹിന്ദുസ്ഥാനി അവാം മോർച്ച (മതേതര) ജിതൻ റാം മാഞ്ചി, കേന്ദ്ര മന്ത്രിയും എൽജെപി (ആർവി) പ്രസിഡന്റുമായ ചിരാഗ് പാസ്വാൻ, ആർഎൽഎം പ്രസിഡന്റ് ഉപേന്ദ്ര കുശ്വാഹ എന്നിവർ ചടങ്ങിൽ പങ്കെടുത്തു. ബിജെപി, ജനതാദൾ യുണൈറ്റഡ് (ജെഡിയു), ലോക് ജനശക്തി പാർട്ടി-റാം വിലാസ്, (എൽജെപി-ആർവി), ഹിന്ദുസ്ഥാനി അവാം മോർച്ച സെക്കുലർ (എച്ച്എഎം-എസ്), രാഷ്ട്രീയ ലോക് മോർച്ച (ആർഎൽഎം) എന്നിവ എൻഡിഎ സഖ്യത്തിൽ ഉൾപ്പെടുന്നു.
‘ബീഹാർ കാ തേജസ്വി പ്രാണ’ എന്ന പേരിൽ ചൊവ്വാഴ്ച മഹാസഖ്യത്തിന്റെ പ്രകടനപത്രിക പുറത്തിറങ്ങിയിരുന്നു . സർക്കാർ രൂപീകരിച്ച് 20 ദിവസത്തിനുള്ളിൽ സംസ്ഥാനത്തെ ഓരോ കുടുംബത്തിലെയും ഒരാൾക്ക് സർക്കാർ ജോലി നൽകുന്നതിനുള്ള നിയമം പാസാക്കുമെന്ന് മഹാസഖ്യം വാഗ്ദാനം ചെയ്യുന്നു. 243 സീറ്റുകളുള്ള ബീഹാർ നിയമസഭയിലേക്കുള്ള വോട്ടെടുപ്പ് നവംബർ 6 നും 11 നും രണ്ട് ഘട്ടങ്ങളായി നടക്കും. കൂടാതെ, ഏഴ് സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും എട്ട് സീറ്റുകളിലേക്കുള്ള ഉപതിരഞ്ഞെടുപ്പ് നവംബർ 11 ന് നടക്കും. രണ്ട് തിരഞ്ഞെടുപ്പുകളുടെയും ഫലം നവംബർ 14 ന് പ്രഖ്യാപിക്കും.
