വാട്ടർഫോർഡ്: വാട്ടർഫോർഡിൽ ഉണ്ടായ വാഹനാപകടത്തിൽ ഒരു മരണം. 40 വയസ്സുകാരനാണ് അപകടത്തിൽ അതിദാരുണമായി കൊല്ലപ്പെട്ടത്. സംഭവത്തിൽ പോലീസ് അന്വേഷണം ആരംഭിച്ചു.
ശനിയാഴ്ച ഉച്ചയോടെയായിരുന്നു സംഭവം. വാട്ടർഫോർഡ് സിറ്റിയിലെ വില്യംസ്ടൗണിൽ ആയിരുന്നു അപകടം ഉണ്ടായത്. ഒരു മണിയോടെയാണ് അപകടം സംബന്ധിച്ച വിവരം പോലീസിന് ലഭിച്ചത്. ഉടനെ അടിയന്തിര സേവനങ്ങൾ സംഭവ സ്ഥലത്ത് എത്തുകയായിരുന്നു. 40 കാരൻ അപകട സ്ഥലത്ത് തന്നെ മരിച്ചതായി സ്ഥിരീകരിച്ചു. അദ്ദേഹത്തിന്റെ ഇരുചക്രവാഹനം കാറുമായി കൂട്ടിയിടിക്കുകയായിരുന്നു.
യുവാവിന്റെ മൃതദേഹം യൂണിവേഴ്സിറ്റി ഹോസ്പിറ്റൽ വാട്ടർഫോർഡിൽ സൂക്ഷിച്ചിരിക്കുകയാണ്. അപകടത്തിന്റെ ദൃക്സാക്ഷികൾ ഉടൻ ബന്ധപ്പെടണമെന്ന് പോലീസ് അറിയിച്ചു.
Discussion about this post
