തിരുവനന്തപുരം: എംഎൽഎ രാഹുൽ മാങ്കൂട്ടത്തിലിനെതിരായ ലൈംഗിക പീഡന കേസിന്റെ കൂടുതൽ വിശദാംശങ്ങൾ പുറത്ത്. പരാതിക്കാരി പോലീസിൽ നൽകിയ പരാതിയിൽ ഗുരുതരമായ ആരോപണങ്ങളാണ് ഉന്നയിച്ചിരിക്കുന്നത് . ഗർഭത്തിൻറെ രണ്ടാം മാസത്തിൽ താൻ ഗർഭഛിദ്രത്തിന് വിധേയയായെന്നും പിന്നീട് മാനസികമായി തളർന്നുപോയെന്നും യുവതി പരാതിയിൽ പറയുന്നു.
കഴിഞ്ഞ ദിവസം അന്വേഷണ സംഘം മെഡിക്കൽ രേഖകൾ ശേഖരിച്ചിരുന്നു. മെയ് 30 ന് ഗർഭഛിദ്ര ഗുളികകൾ കഴിച്ചതായും തുടർന്ന് കടുത്ത രക്തസ്രാവം അനുഭവപ്പെട്ടതായും രേഖകൾ പറയുന്നു. ഗർഭഛിദ്രത്തിനായി രണ്ട് മരുന്നുകൾ സ്വീകരിച്ചിരുന്നു. രക്തസ്രാവത്തെ തുടർന്ന്, അവർ സർക്കാർ ആശുപത്രിയിലും സ്വകാര്യ ആശുപത്രിയിലും ചികിത്സ തേടി.യുവതിയ്ക്ക് നൽകിയ മരുന്നുകൾ സുരക്ഷിതമല്ലെന്ന് ചികിത്സിച്ച ഡോക്ടർമാരും പറയുന്നുണ്ട്.
അതേസമയം, പരാതി നൽകിയതിനുപിന്നാലെ ഒളിവിൽ പോയ രാഹുലിനും സുഹൃത്ത് ജോബിൻ ജോസഫിനും വേണ്ടിയുള്ള തിരച്ചിൽ ഊർജിതമാക്കിയിട്ടുണ്ട്. ഇവരെ അറസ്റ്റ് ചെയ്യുന്നതിനുള്ള നടപടികൾ പോലീസ് ആരംഭിച്ചിട്ടുണ്ട്. എംഎൽഎയുടെ മുൻകൂർ ജാമ്യാപേക്ഷ അറസ്റ്റ് തടയുന്നില്ലെന്ന് ഉദ്യോഗസ്ഥർ വ്യക്തമാക്കി. രാഹുൽ മാങ്കൂട്ടത്തിൽ കഴിഞ്ഞ ദിവസം വഞ്ചിയൂരിലെത്തി അഭിഭാഷകന്റെ മുമ്പാകെ രേഖകളിൽ ഒപ്പിട്ടിരുന്നുവെന്ന റിപ്പോർട്ടുകൾ പോലീസ് നിഷേധിച്ചു.
വിശദമായ അന്വേഷണം നടത്താൻ ക്രമസമാധാന ചുമതലയുള്ള എഡിജിപി എല്ലാ ജില്ലകൾക്കും നിർദ്ദേശം നൽകിയിട്ടുണ്ട്. യുവതിയ്ക്ക് പോലീസ് സംരക്ഷണം നൽകിയിട്ടുണ്ട്. ആക്രമണം നടന്നതായി ആരോപിക്കപ്പെടുന്ന ഫ്ലാറ്റ് അന്വേഷകർ സന്ദർശിച്ച് മഹസർ തയ്യാറാക്കി. കൂടുതൽ സാക്ഷികളുടെ മൊഴി ഇന്ന് രേഖപ്പെടുത്തുമെന്ന് പ്രതീക്ഷിക്കുന്നു.
യുവതിയുടെ മൊഴി പ്രകാരം, ആദ്യ വിവാഹം അവസാനിച്ചതിന് ശേഷമാണ് രാഹുൽ മാംകൂട്ടത്തിലിനെ കണ്ടത്. നിയമപരമായി രജിസ്റ്റർ ചെയ്തിട്ടില്ലെങ്കിലും 2024 ഓഗസ്റ്റ് 22 ന് ഒരു ക്ഷേത്രത്തിൽ വച്ച് വിവാഹം കഴിച്ചതായി അവർ പറഞ്ഞു. നാല് ദിവസം മാത്രമേ ഒരുമിച്ച് താമസിച്ചിരുന്നുള്ളൂ, ഒരു മാസത്തിനുള്ളിൽ ബന്ധം അവസാനിച്ചു. ആദ്യ വിവാഹം അവസാനിച്ചതിന് അഞ്ച് മാസത്തിന് ശേഷമാണ് താൻ രാഹുലിനെ കണ്ടതെന്നും അവർ പറഞ്ഞു.
