തിരുവനന്തപുരം: കവടിയാർ കൊട്ടാരത്തിലെ കോടികളുടെ സ്വർണ്ണ മോഷണവുമായി ബന്ധപ്പെട്ട അന്വേഷണത്തിൽ രാജകുടുംബം സഹകരിക്കുന്നില്ലെന്ന് സൂചന. കൊട്ടാരവുമായി ബന്ധപ്പെട്ട ചിലരുടെ സാമ്പത്തിക ഇടപാടുകൾ പോലീസ് പരിശോധിച്ചിരുന്നു. ഇവരെ ചോദ്യം ചെയ്തതിനെ തുടർന്നാണ് അന്വേഷണത്തിൽ രാജകുടുംബം നിസ്സഹകരണം കാട്ടിത്തുടങ്ങിയത് . പോലീസ് തങ്ങളെ പീഡിപ്പിക്കുന്നുവെന്ന് ആരോപിച്ച് രാജകുടുംബം ഉന്നത ഉദ്യോഗസ്ഥർക്ക് പരാതി നൽകി.
കവടിയാർ കൊട്ടാരത്തിൽ നിന്ന് കോടികൾ വില മതിക്കുന്ന സ്വർണ്ണാഭരണങ്ങളാണ് മോഷണം പോയത്. അലമാരയിൽ സൂക്ഷിച്ചിരുന്ന രണ്ട് കോടി രൂപയുടെ സ്വർണാഭരണങ്ങൾ മോഷ്ടിക്കപ്പെട്ടുവെന്നായിരുന്നു പരാതി . അശ്വതി തിരുനാൾ ഗൗരി ലക്ഷ്മി ബായി നൽകിയ പരാതിയിൽ പേരൂർക്കട പോലീസ് കേസെടുത്തു. 2025 ഒക്ടോബർ-നവംബർ മാസങ്ങളിൽ മോഷണം ശ്രദ്ധയിൽപ്പെട്ടെങ്കിലും, നാല് മാസങ്ങൾക്ക് ശേഷമാണ് പോലീസിന് പരാതി ലഭിച്ചത്.
ബെംഗളൂരുവിലേക്ക് പോകുന്നതിന് മുമ്പ് അലമാര തുറന്നപ്പോൾ ആഭരണങ്ങൾ നഷ്ടപ്പെട്ടതായി കണ്ടെത്തിയതായി പരാതിയിൽ പറയുന്നു. പത്ത് ദിവസം മുമ്പ് വരെ ആഭരണങ്ങൾ അവിടെ ഉണ്ടായിരുന്നുവെന്നും പരാതിയിൽ പറയുന്നു. കൊട്ടാരത്തിലുള്ളവരാണ് ആഭരണങ്ങൾ കൊണ്ടുപോയതെന്ന് കരുതി കുടുംബാംഗങ്ങൾ അന്വേഷണം നടത്തിയെങ്കിലും ഫലമുണ്ടായില്ല.
കൊട്ടാരത്തിൽ നടത്തിയ പരിശോധനയിൽ അസാധാരണമായ ഒന്നും പോലീസിന് കണ്ടെത്താനായില്ല. വിശദമായ പരിശോധന നടത്തിയിട്ടും സംശയാസ്പദമായ വിരലടയാളങ്ങളൊന്നും കണ്ടെത്തിയില്ല. ദക്ഷിണേന്ത്യൻ നഗരങ്ങളായ ചെന്നൈ, ബെംഗളൂരു എന്നിവിടങ്ങൾ കേന്ദ്രീകരിച്ച് പുരാതന ആഭരണങ്ങൾ വിൽക്കുകയും വാങ്ങുകയും ചെയ്യുന്ന സംഘങ്ങളെ കുറിച്ച് അന്വേഷിക്കാൻ നീക്കമുണ്ട്. അതുപോലെ, പുരാതന ആഭരണങ്ങളുടെ മോഷണവുമായി ബന്ധപ്പെട്ടവരെ പറ്റിയും വിശദാംശങ്ങൾ തേടിക്കൊണ്ടിരിക്കുകയാണ്. കൊട്ടാരവുമായി ബന്ധപ്പെട്ടവരുടെ മൊബൈൽ ഫോൺ വിശദാംശങ്ങൾ പരിശോധിക്കാൻ സൈബർ സംഘത്തിന് ഇതിനകം നിർദ്ദേശം നൽകിയിട്ടുണ്ട്.
