മലപ്പുറം ; പൊലീസിനെ പരസ്യമായി ആക്രമിച്ച ശേഷം ഒളിവിൽ പോയ പ്രതിയെ പിടികൂടി വിലങ്ങുവച്ച് അതേ റോഡിലൂടെ നടത്തിച്ച് പൊലീസ്. മലപ്പുറം വൈലത്തൂരിൽ വാഹനപരിശോധനയ്ക്കിടെ പൊലീസിനെ അതിക്രമിച്ച് കടന്നു കളഞ്ഞ കേസിലെ മുഖ്യപ്രതി തിരൂർ പൂക്കയിൽ കുളങ്ങരകത്ത് മുഹമ്മദ് സഫ്‌വാനെ (26) ആലപ്പുഴയിൽ നിന്നാണ് പിടികൂടിയത്.
മദ്യലഹരിയിൽ ഹെൽമറ്റും, ലൈസൻസുമില്ലാതെ ഇരുചക്രവാഹനം ഓടിക്കുന്നത് തടഞ്ഞതിനെ തുടർന്നായിരുന്നു യുവാക്കൾ പൊലീസിനെ ആക്രമിച്ചത് . അസിസ്റ്റന്റ് സബ് ഇൻസ്പെക്ടർ രാമചന്ദ്രനും, സീനിയർ സിവിൽ പൊലീസ് ഓഫീസർ സുധീഷിനും പരിക്കേറ്റിരുന്നു. മൂക്കിനും, ചുണ്ടിനും പരിക്കേറ്റ രാമചന്ദ്രനെ കോട്ടയ്ക്കലിലെ സ്വകാര്യ ആശുപത്രിയിൽ പ്രവേശിപ്പിച്ചു.
സംഭവത്തിൽ തലക്കടത്തൂർ അരീക്കാട് സ്വദേശി കിഴക്കേപുറത്ത് ദിൽഷാദിനെ (22) സംഭവ ദിവസം തന്നെ പൊലീസ് കസ്റ്റഡിലെടുത്തിരുന്നു. സ്വന്തം വീട്ടിൽ നിന്ന് 45 പവൻ സ്വർണ്ണാഭരണം മോഷ്ടിച്ച കേസിലും എം ഡി എം എ പിടികൂടിയ കേസിലും സഫ്‍‍വാൻ പ്രതിയാണ്. എം ഡി എം എ കേസിൽ യു എ ഇ യിലും ഇയാൾ ജയിൽശിക്ഷ അനുഭവിച്ചതായും പൊലീസ് പറഞ്ഞു.
