തിരുവനന്തപുരം: കേരളത്തെ അതിദാരിദ്ര്യമുക്ത സംസ്ഥാനമായി പ്രഖ്യാപിച്ച് മുഖ്യമന്ത്രി പിണറായി വിജയൻ . പ്രത്യേക നിയമസഭാ സമ്മേളനത്തില് ചട്ടം 300 പ്രകാരമാണ് പ്രഖ്യാപനം നടത്തിയത്. മുഖ്യമന്ത്രിക്ക് പ്രഖ്യാപനം നടത്താന് നിയമസഭാ ചട്ടങ്ങള് ലംഘിച്ചെന്ന് ആരോപിച്ച് പ്രതിപക്ഷം സഭ വിട്ടിരുന്നു. 2021ല് പുതിയ മന്ത്രിസഭയുടെ സത്യപ്രതിജ്ഞയ്ക്കുശേഷം ചേര്ന്ന ആദ്യ മന്ത്രിസഭാ യോഗത്തില് എടുത്ത പ്രധാന തീരുമാനമായിരുന്നു അതിദാരിദ്ര്യ നിര്മാര്ജ്ജനമെന്ന് മുഖ്യമന്ത്രി പറഞ്ഞു.
ഓരോ കേരളപ്പിറവി ദിനവും നമ്മള് ആഘോഷിക്കാറുണ്ടെന്നും എന്നാല് ഈ കേരളപ്പിറവി ഒരു പുതുയുഗത്തിന്റെ പിറവിയാണെന്നും മുഖ്യമന്ത്രി പറഞ്ഞു.കേരളത്തെ അതിദാരിദ്ര്യമുക്ത സംസ്ഥാനമാക്കുമെന്നത് തെരഞ്ഞെടുപ്പില് നല്കിയ വ് വാഗ്ദാനമായിരുന്നുവെന്നും അത് നടപ്പിലാക്കിയെന്നും മുഖ്യമന്ത്രി പറഞ്ഞു.
മുഖ്യമന്ത്രിക്ക് റൂള് 300 സ്റ്റേറ്റ്മെന്റ് അവതരിപ്പിക്കുന്നതിന് വേണ്ടി നിയമസഭാ ചട്ടങ്ങള് ലംഘിച്ചുവെന്ന് കോൺഗ്രസ് നേതാവ് വി ഡി സതീശന് പറഞ്ഞു. കേരളം അതീവദരിദ്രരഹിത സംസ്ഥാനമാണെന്നുള്ളത് ശുദ്ധ തട്ടിപ്പാണ്. അതാണ് റൂള് 300 സ്റ്റേറ്റ്മെന്റിലൂടെ നല്കുന്നത്. അതിനോട് കൂട്ടുനില്ക്കാന് തങ്ങളില്ലെന്നും സഭാനടപടികള് ബഹിഷ്കരിക്കുകയാണെന്നും വി ഡി സതീശന് പറഞ്ഞു.
ഇതിന് പിന്നാലെ പ്രതിപക്ഷം സഭ വിടുകയായിരുന്നു. കേരളത്തിന്റെ നേട്ടത്തില് അഭിമാനിക്കുന്നതിന് പകരം അത് സഹിക്കവയ്യാതെ ഇറങ്ങിപ്പോകുന്ന പ്രതിപക്ഷത്തെ ജനം വിലയിരുത്തുമെന്ന് മന്ത്രി എം ബി രാജേഷ് പറഞ്ഞു. അതിദാരിദ്ര്യ നിര്ണയം പൈലറ്റ് അടിസ്ഥാനത്തില് വടക്കാഞ്ചേരി മുനിസിപ്പാലിറ്റിയിലും അഞ്ചുതെങ്ങ്, തിരുനെല്ലി ഗ്രാമപഞ്ചായത്തുകളിലും നടപ്പിലാക്കി. പിന്നീട് ഇത് സംസ്ഥാനത്തെമ്പാടും വ്യാപിപ്പിക്കുകയായിരുന്നു.
