ടെഹ്റാൻ : ഇറാൻ-ഇസ്രായേൽ സംഘർഷം മൂന്നാം ദിനത്തിലേയ്ക്ക് . . ഇസ്രായേലും അമേരിക്കയും ഇറാനിൽ കനത്ത ബോംബാക്രമണം നടത്തുമ്പോൾ, ഇസ്രായേലിലെയും മറ്റ് രാജ്യങ്ങളിലെയും യുഎസ് താവളങ്ങളെ ഇറാൻ ലക്ഷ്യമിടുന്നു. അമേരിക്കൻ എഫ്-15 യുദ്ധവിമാനം കുവൈത്തിൽ തകർന്നുവീണതായും റിപ്പോർട്ടുണ്ട്. അപകടത്തിന്റെ വീഡിയോയും പുറത്തുവന്നിട്ടുണ്ട്. ലോകത്തിലെ ഏറ്റവും മാരകവും ആധുനികവുമായ വിമാനങ്ങളിൽ ഒന്നായാണ് എഫ്-15 നെ കണക്കാക്കുന്നത്.
കുവൈത്തിൽ തകർന്നുവീണ യുഎസ് എഫ്-15 യുദ്ധവിമാനം വെടിവച്ചിട്ടതാണെന്ന് ഇറാനുമായി ബന്ധപ്പെട്ട നിരവധി ഏജൻസികൾ അവകാശപ്പെട്ടിട്ടുണ്ട്. വിമാനം ആകാശത്ത് വെച്ച് തീപിടിക്കുന്നത് വീഡിയോയിൽ കാണാം. പിന്നീട് വിമാനം ദീർഘനേരം കറങ്ങിയ ശേഷമാണ് തകർന്നുവീണത് . പൈലറ്റ് സുരക്ഷിതനാണെന്നും റിപ്പോർട്ടുണ്ട്. എന്നാൽ യുഎസ് സൈന്യമോ കുവൈറ്റ് സൈന്യമോ ഈ വാർത്ത സ്ഥിരീകരിച്ചിട്ടില്ല. സംഭവത്തിന്റെ കാരണം അന്വേഷിച്ചുകൊണ്ടിരിക്കുകയാണ്.
ഇറാനിലെ സൈനിക താവളങ്ങൾക്ക് നേരെയുള്ള യുഎസ് ആക്രമണം തുടരുകയാണ്. ആക്രമണങ്ങളുടെ വീഡിയോകളും യുഎസ് സൈന്യം പുറത്തുവിടുന്നുണ്ട്, അതിൽ ഇറാനിയൻ സൈനിക താവളങ്ങൾ മിസൈലുകളും ബോംബുകളും ഉപയോഗിച്ച് നശിപ്പിക്കുന്നത് കാണാം. കഴിഞ്ഞ രണ്ട് ദിവസത്തിനുള്ളിൽ ഇറാനുള്ളിലെ 2,000-ത്തിലധികം ലക്ഷ്യങ്ങൾ യുഎസും ഇസ്രായേലും ആക്രമിച്ചു. ഖമേനിയുടെ ഓഫീസ് കോമ്പൗണ്ടിന് പുറമെ, മിസൈൽ കേന്ദ്രങ്ങൾ , വ്യോമ പ്രതിരോധ സംവിധാനങ്ങൾ, നാവിക താവളങ്ങൾ , പ്രധാനപ്പെട്ട സൈനിക അടിസ്ഥാന സൗകര്യങ്ങൾ എന്നിവ ഈ ആക്രമണങ്ങളിൽ ലക്ഷ്യമിടുന്നുണ്ട്.
ജറുസലേം, ടെൽ അവീവ്, കിര്യത്ത് ഓനോ എന്നിവിടങ്ങളിൽ ഇറാൻ ആക്രമണം നടത്തിയപ്പോൾ, ഇന്നലെ രാത്രി ടെഹ്റാനിൽ ഇസ്രായേൽ വൻ ബോംബാക്രമണം നടത്തി. ടെഹ്റാനിലെ ഇറാന്റെ സ്റ്റേറ്റ് ടിവി ഓഫീസും ആക്രമിക്കപ്പെട്ടു.
