ബെയ്ജിങ് : ലോകത്തെ ഏറ്റവും വേഗമേറിയ ബുള്ളറ്റ് ട്രെയിന്‍ പുറത്തിറക്കി ചൈന. CR450 EMU (ഇലക്‌ട്രിക് മൾട്ടിപ്പിൾ യൂണിറ്റുകൾ) മോഡൽ ട്രെയിനുകളാണ് പുറത്തിറക്കിയത് .മണിക്കൂറിൽ 450 കിലോമീറ്റർ വേഗത്തിൽ സഞ്ചരിക്കാനാകുന്ന ട്രെയിനാണിത് .
നേരത്തേയിറക്കിയ CR400 മോഡലായിരുന്നു ഇതുവരെ ഏറ്റവും വേഗമേറിയ ബുള്ളറ്റ് ട്രെയിന്‍. മണിക്കൂറില്‍ 350 കിലോമീറ്ററായിരുന്നു ഇതിന്റെ വേഗപരിധി.ചൈന സ്റ്റേറ്റ് റെയിൽവേ ഗ്രൂപ്പ് കമ്പനിയാണ് ഈ ട്രെയിൻ തയ്യാറാക്കിയിരിക്കുന്നത്. ഈ ട്രെയിൻ യാത്രാ സമയം കുറയ്ക്കുകയും കണക്റ്റിവിറ്റി മെച്ചപ്പെടുത്തുകയും രാജ്യത്തെ യാത്രക്കാർക്ക് സൗകര്യപ്രദമായ യാത്ര പ്രദാനം ചെയ്യുമെന്നുമാണ് വാഗ്ദാനം.
CR450 ഞായറാഴ്ചയാണ് പുറത്തിറക്കിയത്. പരിശോധനയോട്ടത്തില്‍ മണിക്കൂറില്‍ 450 കിലോമീറ്റര്‍ വേഗത്തില്‍ സഞ്ചരിക്കാനായെന്ന് അധികൃതര്‍ അറിയിച്ചു. ചൈന ഹൈസ്പീഡ് ബുള്ളറ്റ് ട്രെയിനുകള്‍ കൂടുതലായി ഇറക്കുന്നുണ്ടെങ്കിലും ബെയ്ജിങ്-ഷാങ്ഹായ് ട്രെയിന്‍ സര്‍വീസ് മാത്രമാണ് ലാഭകരമായി ഓടുന്നത്. മറ്റു നെറ്റ്‌വര്‍ക്കുകള്‍ ഇതുവരെ ലാഭകരമായിട്ടില്ല.
