ന്യൂഡൽഹി : ബംഗ്ലാദേശിൽ നിന്നുള്ള ചില ഉൽപ്പന്നങ്ങളുടെ ഇറക്കുമതിക്ക് നിയന്ത്രണങ്ങൾ ഏർപ്പെടുത്തി കേന്ദ്രസർക്കാർ . ഈ നിയന്ത്രണങ്ങൾ പ്രകാരം, വസ്ത്രങ്ങൾ (റെഡിമെയ്ഡ് വസ്ത്രങ്ങൾ), ബിസ്കറ്റുകൾ, ലഘുഭക്ഷണങ്ങൾ, പാനീയങ്ങൾ, പ്ലാസ്റ്റിക്, മര ഉൽപ്പന്നങ്ങൾ, പെയിന്റുകൾ, സംസ്കരിച്ച ഭക്ഷ്യ ഉൽപ്പന്നങ്ങൾ എന്നിവ തിരഞ്ഞെടുത്ത കടൽ തുറമുഖങ്ങൾ വഴി മാത്രമേ ഇന്ത്യയിലേക്ക് കൊണ്ടുവരാൻ അനുവാദമുള്ളൂ.
വാണിജ്യ മന്ത്രാലയത്തിന് കീഴിലുള്ള ഡയറക്ടറേറ്റ് ജനറൽ ഓഫ് ഫോറിൻ ട്രേഡ് (ഡിജിഎഫ്ടി) ഇതുസംബന്ധിച്ച വിജ്ഞാപനം പുറപ്പെടുവിച്ചു . വിജ്ഞാപനമനുസരിച്ച്, ബംഗ്ലാദേശിൽ നിന്നുള്ള റെഡിമെയ്ഡ് വസ്ത്രങ്ങൾ ഇപ്പോൾ ഒരു തുറമുഖത്തുനിന്നും ഇറക്കുമതി ചെയ്യാൻ കഴിയില്ല. മുംബൈയിലെ നവ ഷേവ, കൊൽക്കത്ത തുറമുഖങ്ങളിൽ നിന്ന് മാത്രമേ ഈ ഇറക്കുമതി സാധ്യമാകൂ.
കൂടാതെ, അസം, മേഘാലയ, ത്രിപുര, മിസോറം, പശ്ചിമ ബംഗാൾ എന്നിവിടങ്ങളിലെ അതിർത്തി പോസ്റ്റുകളിൽ നിന്ന് പഴങ്ങൾ, സുഗന്ധദ്രവ്യങ്ങളും കാർബണേറ്റഡ് പാനീയങ്ങളും, സംസ്കരിച്ച ഭക്ഷ്യവസ്തുക്കൾ, പ്ലാസ്റ്റിക് ഉൽപ്പന്നങ്ങൾ, തടി ഫർണിച്ചറുകൾ, കോട്ടൺ നൂൽ തുടങ്ങിയവയുടെ ഇറക്കുമതി നിരോധിച്ചു.
എന്നാൽ ബംഗ്ലാദേശ് വഴി നേപ്പാളിലേക്കും ഭൂട്ടാനിലേക്കും കൊണ്ടുപോകുന്ന ചരക്കുകൾക്ക് ഈ നിയന്ത്രണം ബാധകമല്ല. കൂടാതെ, മത്സ്യം, എൽപിജി, ഭക്ഷ്യ എണ്ണ, മറ്റ് ഉൽപ്പന്നങ്ങൾ എന്നിവയുടെ ഇറക്കുമതിയെ ഈ നിയന്ത്രണങ്ങളിൽ നിന്ന് ഒഴിവാക്കിയിട്ടുണ്ട്.ഇന്ത്യ-ബംഗ്ലാദേശ് ബന്ധത്തിൽ അടുത്തിടെയുണ്ടായ സംഘർഷങ്ങളെ തുടർന്നാണ് തീരുമാനം. ഏപ്രിൽ 9 ന്, ബംഗ്ലാദേശിന് അനുവദിച്ച ട്രാൻസ്ഷിപ്പ്മെന്റ് സൗകര്യം ഇന്ത്യ പിൻവലിച്ചിരുന്നു.
