ന്യൂഡൽഹി : പഹൽഗാം ഭീകരാക്രമണത്തെ അപലപിച്ച് ഷാങ്ഹായ് സഹകരണ സംഘടന . ഭീകരതയെക്കുറിച്ചുള്ള “ഇരട്ടനിലപാടുകൾ” സ്വീകാര്യമല്ലെന്ന് ഷാങ്ഹായ് സഹകരണ സംഘടന അംഗരാജ്യങ്ങൾ ഒരേ സ്വരത്തിൽ പറയണമെന്ന പ്രധാനമന്ത്രി നരേന്ദ്ര മോദിയുടെ പരാമർശത്തിന് പിന്നാലെയാണ് പഹൽഗാം ഭീകരാക്രമണത്തെ അപലപിച്ച് ഷാങ്ഹായി സഹകരണ പ്രഖ്യാപനം. ഇന്ത്യയുടെ നിലപാടിന് അംഗീകാരമാണിത്. ഉച്ചകോടി പ്രഖ്യാപനത്തിൽ ഇന്ത്യയുടെ നിലപാട് പ്രതിധ്വനിക്കുകയും ചെയ്തു.
നയതന്ത്രപരമായി, ഇത് ഇന്ത്യയ്ക്ക് വലിയ വിജയമാണ്. ഇന്ത്യൻ മണ്ണിലെ ഭീകരതയെ വളരെക്കാലമായി പിന്തുണച്ചിരുന്ന പാകിസ്ഥാൻ പ്രധാനമന്ത്രി ഷെഹ്ബാസ് ഷെരീഫ് ഉച്ചകോടിയിൽ പങ്കെടുക്കുന്നതിനിടെയാണ് പഹൽഗാം ഭീകരാക്രമണത്തെ കുറിച്ചുള്ള പരാമർശം.
പഹൽഗാമിൽ 26 നിരപരാധികളുടെ മരണത്തിനിടയാക്കിയ ഭീകരാക്രമണത്തെ അംഗരാജ്യങ്ങൾ ശക്തമായി അപലപിച്ചു. കൂടാതെ “മരിച്ചവരുടെയും പരിക്കേറ്റവരുടെയും കുടുംബങ്ങൾക്ക് സഹതാപവും അനുശോചനവും” അറിയിച്ചു. അത്തരം ആക്രമണങ്ങളുടെ കുറ്റവാളികളെയും സംഘാടകരെയും സ്പോൺസർമാരെയും നിയമത്തിന് മുന്നിൽ കൊണ്ടുവരണമെന്ന് അംഗരാജ്യങ്ങൾ പറഞ്ഞു.
ഭീകര, വിഘടനവാദ, തീവ്രവാദ ഗ്രൂപ്പുകളെ സ്വന്തം ആവശ്യങ്ങൾക്കായി ഉപയോഗിക്കാനുള്ള ശ്രമങ്ങൾ സ്വീകാര്യമല്ലെന്നും അംഗരാജ്യങ്ങൾ വ്യക്തമാക്കി . എല്ലാ രൂപങ്ങളിലുമുള്ള ഭീകരതയെ എസ്സിഒ ശക്തമായി അപലപിക്കുകയും ഭീകരതയ്ക്കെതിരായ പോരാട്ടത്തിൽ “ഇരട്ടനിലപാടുകൾ” “അസ്വീകാര്യമാണ്” എന്ന് വ്യക്തമാക്കുകയും ചെയ്തു. ഭീകരരുടെ അതിർത്തി കടന്നുള്ള നീക്കം ഉൾപ്പെടെയുള്ള ഭീകരവാദത്തിനെതിരെ പോരാടാൻ അവർ അന്താരാഷ്ട്ര സമൂഹത്തോട് ആഹ്വാനം ചെയ്തു.
“സമീപകാലത്ത്, പഹൽഗാമിൽ വളരെ വൃത്തികെട്ട ഒരു ഭീകരത നാം കണ്ടു. ഈ പ്രതിസന്ധിയിൽ ഞങ്ങളോടൊപ്പം നിന്ന സുഹൃത്തുക്കൾക്ക് ഞാൻ നന്ദി പറയുന്നു. ഇത് ഇന്ത്യയുടെ ആത്മാവിനു നേരെയുള്ള ആക്രമണം മാത്രമല്ല, മനുഷ്യത്വത്തിൽ വിശ്വസിക്കുന്ന ഓരോ രാജ്യത്തിനും നേരെയുള്ള തുറന്ന വെല്ലുവിളിയായിരുന്നു. അപ്പോൾ ഒരു ചോദ്യം ഉയർന്നുവരുന്നു, ചില രാജ്യങ്ങൾ ഭീകരതയ്ക്ക് തുറന്ന പിന്തുണ നൽകുന്നത് സ്വീകാര്യമാണോ?”എന്നാണ് നരേന്ദ്രമോദി പഹൽഗാം ഭീകരാക്രമണത്തെ കുറിച്ച് ഉച്ചകോടിയിൽ പറഞ്ഞത് .
സുരക്ഷ, സമാധാനം, സ്ഥിരത എന്നിവ ഓരോ രാജ്യത്തിന്റെയും വികസനത്തിന് നിർണായകമാണെന്ന് പ്രധാനമന്ത്രി പറഞ്ഞു. “ഭീകരത, വിഘടനവാദം, തീവ്രവാദം എന്നിവ ഈ പാതയിലെ വലിയ വെല്ലുവിളികളാണ്. ഭീകരത ഒരു രാജ്യത്തിനും പ്രധാനമല്ല, മറിച്ച് എല്ലാ മനുഷ്യരാശിക്കും വെല്ലുവിളിയാണ്. അതുകൊണ്ടാണ് ഭീകരതയ്ക്കെതിരായ യുദ്ധത്തിൽ ഇന്ത്യ ഐക്യത്തിന് ഊന്നൽ നൽകിയത്,” അദ്ദേഹം പറഞ്ഞു.
“ഭീകരതയ്ക്കെതിരെ ഇരട്ടത്താപ്പ് സ്വീകാര്യമല്ലെന്ന് നാം വ്യക്തമായും ഒരേ സ്വരത്തിലും പറയണം. തീവ്രവാദത്തെ അതിന്റെ എല്ലാ നിറങ്ങളിലും രൂപങ്ങളിലും നാം എതിർക്കേണ്ടതുണ്ട്. ഇത് മനുഷ്യത്വത്തോടുള്ള നമ്മുടെ ഉത്തരവാദിത്തമാണ്,” അദ്ദേഹം പറഞ്ഞു. .
എസ്സിഒ ഉച്ചകോടിയിൽ ഇന്ത്യ, റഷ്യ, ചൈന എന്നിവ ശക്തിയുടെയും ഐക്യത്തിന്റെയും പര്യായമായി മാറി. പ്രധാനമന്ത്രി മോദിയും റഷ്യൻ പ്രസിഡന്റ് വ്ളാഡിമിർ പുടിനും ചൈനീസ് പ്രധാനമന്ത്രി ഷി ജിൻപിങ്ങും പുഞ്ചിരികളും ആലിംഗനങ്ങളും ഹസ്തദാനങ്ങളും കൈമാറുന്നതിന്റെ ദൃശ്യങ്ങളും അത് കണ്ട് നിൽക്കുന്ന പാക് പ്രധാനമന്ത്രിയുടെ ദൃശ്യങ്ങളും വൈറലായി കഴിഞ്ഞു.
