ന്യൂഡൽഹി : ബിഹാർ തിരഞ്ഞെടുപ്പിൽ കോൺഗ്രസിന് നേരിടേണ്ടിവന്ന തിരിച്ചടിയുടെ കാരണങ്ങൾ വിശദമായി പഠിക്കാൻ പാർട്ടിക്ക് ഉത്തരവാദിത്വമുണ്ടെന്ന് ശശി തരൂർ എംപി. സഖ്യത്തിലെ പ്രധാന പങ്കാളി തങ്ങളായിരുന്നില്ലെന്നും ആർജെഡിയും അവരുടെ പ്രകടനം ശ്രദ്ധാപൂർവ്വം വിലയിരുത്തേണ്ടതുണ്ടെന്നും അദ്ദേഹം പറഞ്ഞു.
‘ തിരഞ്ഞെടുപ്പ് ഫലങ്ങൾ നിരവധി ഘടകങ്ങളെ ആശ്രയിച്ചിരിക്കുന്നു എന്ന് തരൂർ പറഞ്ഞു. ജനകീയ വികാരമുണ്ട്. സംഘടനയുടെ ശക്തി, ദൗർബല്യങ്ങൾ എന്നിവയെക്കുറിച്ച് ചോദ്യങ്ങളുണ്ട്. സന്ദേശം നൽകുന്നതിലെ ചോദ്യങ്ങളുണ്ട്. ഈ വിഷയങ്ങളെല്ലാം പരിശോധിക്കേണ്ടിവരും ‘ .
ബീഹാർ പ്രചാരണത്തിൽ താൻ പങ്കെടുത്തിട്ടില്ലെന്ന് അദ്ദേഹം ആവർത്തിച്ചു. “ഞാൻ അവിടെ ഉണ്ടായിരുന്നില്ല, ബീഹാറിൽ പ്രചാരണം നടത്താൻ എന്നെ ക്ഷണിച്ചിട്ടുമില്ല. അതിനാൽ വ്യക്തിപരമായ അനുഭവത്തിൽ നിന്ന് എനിക്ക് കൂടുതൽ ഒന്നും പറയാൻ കഴിയില്ല. അവിടെയുണ്ടായിരുന്നവർ തീർച്ചയായും ഫലം പഠിക്കും,” അദ്ദേഹം പറഞ്ഞു.
