ന്യൂഡൽഹി : ഇന്ത്യയും പാകിസ്ഥാനും തമ്മിലുള്ള വെടിനിർത്തൽ കരാറിനെച്ചൊല്ലിയുള്ള രാഷ്ട്രീയ തർക്കം രൂക്ഷമായി. 1971-ൽ മുൻ പ്രധാനമന്ത്രി ഇന്ദിരാഗാന്ധിയുടെ നേതൃത്വത്തെ ഉയർത്തിക്കാട്ടി മോദി സർക്കാരിന്റെ യുദ്ധനയത്തെ കോൺഗ്രസ് വിമർശിച്ചപ്പോൾ, കോൺഗ്രസ് എംപി ശശി തരൂർ സന്തുലിതമായ നിലപാട് സ്വീകരിച്ചു. 1971 ലും 2025 ലും സ്ഥിതിഗതികൾ തികച്ചും വ്യത്യസ്തമായിരുന്നുവെന്നും നിലവിൽ ഇന്ത്യയുടെ പ്രാഥമിക ലക്ഷ്യം സമാധാനവും സ്ഥിരതയുമാണെന്നും അദ്ദേഹം വ്യക്തമാക്കി.
ഇപ്പോൾ ഇന്ത്യയും പാകിസ്ഥാനും തമ്മിലുള്ള ഈ വെടിനിർത്തലിനെ 1971 ലെ ഇന്ത്യ-പാകിസ്ഥാൻ യുദ്ധവുമായി താരതമ്യം ചെയ്യുന്നു. എന്നാൽ ഈ താരതമ്യം ആവശ്യമില്ലെന്നും ശശി തരൂർ പറഞ്ഞു.
‘ അനാവശ്യമായി സംഘർഷങ്ങൾ നിയന്ത്രണാതീതമാകുന്ന ഒരു ഘട്ടത്തിലെത്തി.. സമാധാനമാണ് നമുക്ക് പ്രധാനം. 1971 ലെ അവസ്ഥയല്ല 2025 ലെ എന്നതാണ് സത്യം. വ്യത്യാസങ്ങളുണ്ട്. ഇത് തുടരാൻ ഞങ്ങൾ ആഗ്രഹിച്ച ഒരു യുദ്ധമായിരുന്നില്ല, തീവ്രവാദികളെ ഒരു പാഠം പഠിപ്പിക്കാനാണ് ഞങ്ങൾ ആഗ്രഹിച്ചത്, ആ പാഠം പഠിപ്പിച്ചു കഴിഞ്ഞു.പഹൽഗാമിൽ അതിക്രമം നടത്തിയ വ്യക്തികളെ തിരിച്ചറിയാനും കണ്ടെത്താനും സർക്കാർ തുടർന്നും ശ്രമിക്കുമെന്ന് എനിക്ക് ഉറപ്പുണ്ട്. ഇന്ത്യയുടെ ഇപ്പോഴത്തെ പ്രാഥമിക ലക്ഷ്യം സമാധാനവും സ്ഥിരതയുമാണ്.
1971 ലെ യുദ്ധത്തിന് ഒരു ധാർമ്മിക ലക്ഷ്യമുണ്ടായിരുന്നു. . ബംഗ്ലാദേശിന്റെ സ്വാതന്ത്ര്യത്തിനായി അന്ന് പോരാടി. ആ സമയത്ത്, ഇന്ത്യ തങ്ങളുടെ ജനങ്ങൾക്ക് സ്വാതന്ത്ര്യം നൽകുന്നതിനുള്ള ധാർമ്മിക ലക്ഷ്യത്തിനുവേണ്ടി പോരാടുകയായിരുന്നു. ഇന്നത്തെ സ്ഥിതി വ്യത്യസ്തമാണ്.പാകിസ്ഥാന്റെ സൈനിക നിലപാട്, സാങ്കേതിക ശേഷി, തന്ത്രപരമായ ചിന്ത എന്നിവ മാറിയിരിക്കുന്നു. ഇന്നത്തെ ഇന്ത്യ പ്രതികാരം മാത്രമല്ല, സ്ഥിരതയാണ് ആഗ്രഹിക്കുന്നതെന്നും അദ്ദേഹം പറഞ്ഞു.
