തിരുവനന്തപുരം: പരീക്ഷാ ക്രമക്കേട് ആരോപണങ്ങളുടെ പശ്ചാത്തലത്തില് പിഎസ്സി സെക്രട്ടറിയെ ലോക്ഭവനിലേക്ക് വിളിച്ചുവരുത്തി വിശദീകരണം തേടി ഗവര്ണര് രാജേന്ദ്ര വിശ്വനാഥ് ആര്ലേക്കര്. ഇന്നലെ വൈകീട്ടാണ് സാജു ജോര്ജിനെ വിളിച്ചുവരുത്തി വിശദീകരണം തേടിയത്. ഭരണഘടനാ സ്ഥാപനമായ പിഎസ്സിയില് ഇടപെടാനുള്ള സ്വന്തം അധികാരം ഉപയോഗിച്ചാണ് ഗവര്ണറുടെ ഈ നടപടി.
പരീക്ഷാ ക്രമക്കേടുമായി ബന്ധപ്പെട്ട് ഇതുവരെ സ്വീകരിച്ച നടപടികള് അടക്കം ഗവര്ണര് പിഎസ്സി സെക്രട്ടറിയോട് ചോദിച്ചറിഞ്ഞു എന്നാണ് വിവരം.അന്വേഷണത്തിന്റെ പുരോഗതിയും ചോദിച്ചറിഞ്ഞു.കേസ് അന്വേഷണവുമായി പിഎസ്സി പൂര്ണമായും സഹകരിക്കുന്നുണ്ടെന്നാണ് സെക്രട്ടറി അറിയിച്ചിരിക്കുന്നത്.
പിഎസ്സി പരീക്ഷാ നടത്തിപ്പുമായി ബന്ധപ്പെട്ട് ആക്ഷേപങ്ങളുയര്ന്നാല് പിഎസ്സിയുടെ ആഭ്യന്തര വിജിലന്സ് സംവിധാനം അത് പരിശോധിച്ച് നടപടിയെടുക്കുന്നതാണ് പതിവ് രീതി. ഉദ്യോഗസ്ഥരെ ലോക്ഭവനിലേക്ക് വിളിപ്പിച്ച് വിശദീകരണം തേടുന്നത് വരും ദിവസങ്ങളിലും വലിയ രാഷ്ട്രീയ വിവാദങ്ങള്ക്ക് വഴിവക്കുമെന്നാണ് സൂചന. ഉദ്യോഗസ്ഥരെ വിളിപ്പിക്കാന് തനിക്ക് അധികാരമുണ്ടെന്ന നിലപാടില് ഉറച്ച് നില്ക്കുകയാണ് ഗവര്ണര്.
സര്ക്കാരിന്റെ അറിവില്ലാതെ കഴിഞ്ഞ ദിവസം ഗവര്ണര് ഡിജിപിയെ വിളിച്ചുവരുത്തിയിരുന്നു. ഇതിൽ മുഖ്യമന്ത്രി വി ഡി സതീശന് പരസ്യമായി അതൃപ്തി പ്രകടിപ്പിക്കുകയും ചെയ്തിരുന്നു. ഇക്കാര്യത്തില് പ്രതിപക്ഷവും വിമര്ശനം ഉന്നയിച്ചിരുന്നു.
