തുടർച്ചയായ തെരഞ്ഞെടുപ്പ് പരാജയങ്ങളുടെ പേരിൽ വിമർശനങ്ങൾ ഉയരുന്നതിനിടെ ജപ്പാൻ പ്രധാനമന്ത്രി ഷിഗെരു ഇഷിബ രാജിവച്ചു. ഭരണകക്ഷിയായ ലിബറൽ ഡെമോക്രാറ്റിക് പാർട്ടിയെ പ്രക്ഷുബ്ധമായ സമയത്ത് നേതൃത്വ പോരാട്ടത്തിലേക്ക് തള്ളിവിടുന്നതാണ് അദ്ദേഹത്തിന്റെ രാജി എന്നാണ് റിപ്പോർട്ട്.
“ലിബറൽ ഡെമോക്രാറ്റിക് പാർട്ടിയുടെ പ്രസിഡന്റ് സ്ഥാനത്ത് നിന്ന് ഞാൻ രാജിവയ്ക്കാൻ തീരുമാനിച്ചു,” ഇഷിബ പത്രസമ്മേളനത്തിൽ പറഞ്ഞു. “ഒരു പ്രസിഡന്റ് തിരഞ്ഞെടുപ്പിനുള്ള നടപടിക്രമങ്ങൾ നടപ്പിലാക്കാൻ ഞാൻ സെക്രട്ടറി ജനറൽ മോറിയാമയോട് പറഞ്ഞിട്ടുണ്ട്… പുതിയ പ്രസിഡന്റിനെ തിരഞ്ഞെടുക്കുന്നതിനുള്ള പ്രക്രിയ അദ്ദേഹം ആരംഭിക്കണമെന്ന് ഞാൻ ആഗ്രഹിക്കുന്നു.” എന്നും അദ്ദേഹം കൂട്ടിച്ചേർത്തു.
കഴിഞ്ഞ ഒക്ടോബറിൽ അധികാരമേറ്റ 68 കാരനായ ഷിഗെരു ഇഷിബ ആഴ്ചകളോളം രാജിവയ്ക്കാനുള്ള ആവശ്യങ്ങളെ പുറം തള്ളിയിരുന്നു. ജപ്പാൻ “വലിയ വെല്ലുവിളികൾ” നേരിടുന്ന സമയത്ത് – യുഎസ് താരിഫുകൾ, വിലക്കയറ്റം, അരി നയ പരിഷ്കാരങ്ങൾ, വർദ്ധിച്ചുവരുന്ന പ്രാദേശിക സംഘർഷങ്ങൾ എന്നിവയുൾപ്പെടെ ഉണ്ടാകുന്ന സമയത്ത് രാജിവയ്ക്കുന്നത് രാഷ്ട്രീയ ശൂന്യത സൃഷ്ടിക്കുമെന്ന് രാഷ്ട്രീയ വിദഗ്ധരും മുന്നറിയിപ്പ് നൽകി.
എന്നാൽ തുടർച്ചയായ തിരഞ്ഞെടുപ്പ് പരാജയങ്ങൾക്ക് ശേഷം ഇഷിബയുടെ സ്ഥാനം ദുർബലമായി, അദ്ദേഹത്തിന്റെ ഭരണ സഖ്യത്തിന് പാർലമെന്റിന്റെ ഇരുസഭകളിലും ഭൂരിപക്ഷം നഷ്ടപ്പെട്ടു. യാഥാസ്ഥിതിക മുതിർന്ന നേതാവ് ടാരോ അസോയും നിരവധി കാബിനറ്റ് മന്ത്രിമാരും ഉൾപ്പെടെയുള്ള പാർട്ടി ഭാരവാഹികൾ അദ്ദേഹത്തിന്റെ രാജി പരസ്യമായി ആവശ്യപ്പെട്ടിരുന്നു. ശനിയാഴ്ച, കൃഷി മന്ത്രി ഷിൻജിറോ കൊയിസുമിയെയും മുൻ പ്രധാനമന്ത്രി യോഷിഹിഡെ സുഗയെയും ഇഷിബ കണ്ടു, ഇരുവരും വോട്ടെടുപ്പിന് മുമ്പ് മാറിനിൽക്കാൻ അദ്ദേഹത്തോട് പ്രേരിപ്പിച്ചതായി റിപ്പോർട്ടുണ്ട്.
“ജപ്പാൻ വ്യാപാര കരാറിൽ ഒപ്പുവെച്ചതോടെയും പ്രസിഡന്റ് എക്സിക്യൂട്ടീവ് ഉത്തരവിൽ ഒപ്പുവെച്ചതോടെയും, ഞങ്ങൾ ഒരു പ്രധാന തടസ്സം മറികടന്നു, അടുത്ത തലമുറയ്ക്ക് ബാറ്റൺ കൈമാറാൻ ഞാൻ ആഗ്രഹിക്കുന്നു.” – ഇഷിബ പറഞ്ഞു.
പ്രധാനമന്ത്രി എന്ന നിലയിൽ ഇഷിബയുടെ അവസാനത്തെ പ്രധാന നീക്കം അമേരിക്കയുമായുള്ള ഒരു വ്യാപാര കരാർ അന്തിമമാക്കുക എന്നതായിരുന്നു. 550 ബില്യൺ ഡോളറിന്റെ ജാപ്പനീസ് നിക്ഷേപങ്ങൾക്ക് പകരമായി ട്രംപിന്റെ ജാപ്പനീസ് ഉൽപ്പന്നങ്ങളുടെ താരിഫ് 25% ൽ നിന്ന് 15% ആയി കരാർ കുറച്ചു. സഖ്യത്തിൽ ഒരു “സുവർണ്ണ കാലഘട്ടം” ഉണ്ടാകുമെന്ന് പ്രത്യാശ പ്രകടിപ്പിച്ചും ജപ്പാൻ സന്ദർശിക്കാൻ ക്ഷണിച്ചും അദ്ദേഹം ട്രംപിന് സ്വകാര്യ കത്തും അയച്ചിരുന്നു.
