തിരുവനന്തപുരം: മുഖ്യമന്ത്രിക്ക് നൽകുന്ന അധിക സുരക്ഷ ആവശ്യമില്ലെന്ന് നിയുക്ത മുഖ്യമന്ത്രി വി ഡി സതീശൻ . പൈലറ്റ്, എസ്കോർട്ട് വാഹനങ്ങൾ ഒഴികെ മറ്റ് വാഹനങ്ങൾ ആവശ്യമില്ലെന്നാണ് സതീശൻ വ്യക്തമാക്കിയിരിക്കുന്നത് . ഇത് സംബന്ധിച്ച് ഉന്നത പോലീസ് ഉദ്യോഗസ്ഥർക്കും നിർദ്ദേശം നൽകി .
മുഖ്യമന്ത്രി യാത്ര ചെയ്യുമ്പോൾ പൊതുജനങ്ങളെ ബുദ്ധിമുട്ടിക്കരുതെന്നും അദ്ദേഹം ആവശ്യപ്പെട്ടിട്ടുണ്ട്. ഉന്നത പോലീസ് ഉദ്യോഗസ്ഥരുമായുള്ള കൂടിക്കാഴ്ചയിൽ വി ഡി സതീശൻ സുരക്ഷയുമായി ബന്ധപ്പെട്ട നിർദ്ദേശങ്ങൾ നൽകി. പോലീസും എസ്കോർട്ടും ആവശ്യമില്ലെന്നാണ് അദ്ദേഹത്തിന്റെ നിലപാട്. എന്നാൽ, അത് നിർബന്ധമാണെന്നാണ് പോലീസ് ഉദ്യോഗസ്ഥർ അറിയിച്ചിരിക്കുന്നത് . മുൻ മുഖ്യമന്ത്രി പിണറായി വിജയന് ഇസഡ്-പ്ലസ് കാറ്റഗറി സുരക്ഷ നൽകിയിരുന്നു . ജീവന് ഭീഷണിയുള്ള സാഹചര്യം കണക്കിലെടുത്ത് അധിക സുരക്ഷയും ഏർപ്പെടുത്തിയിരുന്നു. ഏഴ് വാഹനങ്ങളുടെ വലിയ സംഘമായാണ് പിണറായി യാത്ര ചെയ്തിരുന്നത്.
പോലീസ് സംഘത്തിൽ മുപ്പത് മുതൽ നാല്പത് വരെ പോലീസ് ഉദ്യോഗസ്ഥരുണ്ടായിരുന്നു. കൂടാതെ, കമാൻഡോകളുടെ ഒരു സ്ട്രൈക്കർ ഫോഴ്സും അദ്ദേഹത്തോടൊപ്പമുണ്ടായിരുന്നു. മുഖ്യമന്ത്രി സഞ്ചരിക്കുന്ന വഴികളിലേക്കുള്ള റോഡുകൾ പോലീസ് അടച്ചിരുന്നു. അദ്ദേഹം ലക്ഷ്യസ്ഥാനത്ത് എത്തുന്നതുവരെ ഗതാഗത നിയന്ത്രണങ്ങളും പാർക്കിംഗ് നിയന്ത്രണങ്ങളും ഏർപ്പെടുത്തിയിരുന്നു. എന്നാൽ ഇതൊന്നും വേണ്ടെന്നാണ് സതീശന്റെ നിലപാട്.
മുഖ്യമന്ത്രിയുടെ നിർദ്ദേശമുണ്ടെങ്കിലും സുരക്ഷ പൂർണ്ണമായി ഒഴിവാക്കാനാകില്ലെന്ന നിലപാടിലാണ് ഡിജിപി. ഇന്റലിജൻസ് റിപ്പോർട്ടുകളുടെ അടിസ്ഥാനത്തിലാണ് മുഖ്യമന്ത്രിയുടെ സുരക്ഷാ ക്രമീകരണങ്ങൾ നിശ്ചയിക്കുന്നത്. എങ്കിലും, ജനങ്ങളെ ബുദ്ധിമുട്ടിക്കാതെ തന്നെ സുരക്ഷ ഉറപ്പാക്കാനുള്ള പുതിയ പ്രോട്ടോക്കോൾ പോലീസ് തയ്യാറാക്കും.
