തിരുവനന്തപുരം: ഗുരുപൂജ നടത്തിയതിന്റെ പേരിൽ കാസർകോട്, മാവേലിക്കര എന്നിവിടങ്ങളിലെ രണ്ട് സ്വകാര്യ സ്കൂളുകളിൽ നിന്ന് പൊതുവിദ്യാഭ്യാസ മന്ത്രി വി. ശിവൻകുട്ടി വിശദീകരണം തേടി. ഇത്തരം ആചാരങ്ങൾ “അങ്ങേയറ്റം അനുചിതവും” ജനാധിപത്യപരവും പുരോഗമനപരവുമായ വിദ്യാഭ്യാസ സമ്പ്രദായത്തിന്റെ മൂല്യങ്ങൾക്ക് വിരുദ്ധവുമാണെന്ന് ശിവൻകുട്ടി പറഞ്ഞു.
സിബിഎസ്ഇയുമായി അഫിലിയേറ്റ് ചെയ്തിരിക്കുന്നതും ഭാരതീയ വിദ്യാ നികേതൻ നടത്തുന്നതുമായ കാസർകോട് ബന്തഡ്കയിലെ സരസ്വതി വിദ്യാലയത്തിലും ആലപ്പുഴയിലെ മാവേലിക്കരയിലെ വിദ്യാധിരാജ വിദ്യാപീഠം സൈനിക സ്കൂളിലുമാണ് ഗുരുപൂജ നടന്നത്.
“സർക്കാർ ഈ സംഭവങ്ങളെ അതീവ ഗൗരവത്തോടെയാണ് കാണുന്നത്. ഇത്തരം പ്രവൃത്തികൾ അസ്വീകാര്യമാണ്, പൊതു അപലപനം അർഹിക്കുന്നു. വിദ്യാഭ്യാസം ഒരു ശാസ്ത്രീയ മനോഭാവവും പുരോഗമന ചിന്തയും വളർത്തിയെടുക്കണം. വിദ്യാർത്ഥികൾക്കിടയിൽ ഫ്യൂഡൽ അല്ലെങ്കിൽ അടിമത്ത മനോഭാവം പ്രോത്സാഹിപ്പിക്കുന്ന പ്രവൃത്തികൾ പിന്തിരിപ്പൻ സ്വഭാവമുള്ളവയാണ്.
ഒരു സാഹചര്യത്തിലും അംഗീകരിക്കാൻ കഴിയില്ല. ബന്ധപ്പെട്ട സ്കൂളുകളിൽ നിന്ന് അടിയന്തര വിശദീകരണം തേടാൻ പൊതുവിദ്യാഭ്യാസ ഡയറക്ടറോട് നിർദ്ദേശിച്ചിട്ടുണ്ടെന്നും “ മന്ത്രി പറഞ്ഞു.
“വിദ്യാഭ്യാസം അറിവും ആത്മാഭിമാനവും പകരാൻ ഉദ്ദേശിച്ചുള്ളതാണ്. വിദ്യാർത്ഥികളെ പ്രതീകാത്മകമായി കീഴ്പ്പെടുത്തുന്ന ഒരു രീതിയും ഞങ്ങൾക്ക് അനുവദിക്കാൻ കഴിയില്ല. ജാതി അടിസ്ഥാനമാക്കിയുള്ള വിവേചനത്തിന് അതീതമായി എല്ലാവർക്കും വിദ്യാഭ്യാസ അവകാശങ്ങൾ നേടിയെടുക്കാൻ ഈ രാജ്യം കഠിനമായി പോരാടി. കഠിനാധ്വാനം കൊണ്ട് നേടിയെടുത്ത ആ അവകാശം ഒരിക്കലും ആരുടെയും കാൽക്കീഴിൽ ചവിട്ടിമെതിക്കപ്പെടരുത്.”ശിവൻകുട്ടി പ്രസ്താവനയിൽ പറഞ്ഞു.
ഇത്തരം സംഭവങ്ങൾ ആവർത്തിക്കാതിരിക്കാൻ കർശന നടപടി സ്വീകരിക്കുമെന്നും വിദ്യാഭ്യാസ അവകാശ നിയമത്തെയും മറ്റ് അനുബന്ധ മാനദണ്ഡങ്ങളെയും ലംഘിക്കുന്ന ഏതൊരു സ്ഥാപനത്തിനെതിരെയും, അത് പിന്തുടരുന്ന സിലബസ് പരിഗണിക്കാതെ, നടപടിയെടുക്കാൻ വിദ്യാഭ്യാസ വകുപ്പിനെ ചുമതലപ്പെടുത്തിയിട്ടുണ്ടെന്നും ശിവൻ കുട്ടി കൂട്ടിച്ചേർത്തു.
അതേസമയം ഗുരുപൂർണിമയോടനുബന്ധിച്ച് നടത്തുന്ന വാർഷിക ഗുരുപൂജ ആഘോഷങ്ങളുടെ ഭാഗമായിരുന്നു ചടങ്ങ് എന്ന് മാവേലിക്കരയിലെ വിദ്യാധിരാജ വിദ്യാപീഠം സൈനിക് സ്കൂൾ, വ്യക്തമാക്കി. “ഞങ്ങൾ എല്ലാ വർഷവും ഗുരുപൂജ നടത്തുന്നു. ഇത്തവണ ഭാരത് ബന്ദിനോട് അനുബന്ധിച്ചായിരുന്നു ഗുരുപൂജ, അതിനാൽ ആഘോഷം അടുത്ത ദിവസത്തേക്ക് മാറ്റിവച്ചു. പൂജ ഞങ്ങളുടെ സാംസ്കാരിക മൂല്യങ്ങളുടെ ഭാഗമാണ്, ഈ മൂല്യങ്ങൾ ഞങ്ങളുടെ വിദ്യാർത്ഥികളിൽ വളർത്തുക മാത്രമാണ് ഞങ്ങൾ ചെയ്യുന്നത്,” സ്കൂൾ ജീവനക്കാരനായ ബാലു പറഞ്ഞു.
“എല്ലാ വിദ്യാർത്ഥികളും അവരുടെ മാതാപിതാക്കളും സ്വമേധയാ പങ്കെടുക്കുന്നു. ആരും ഒന്നും ചെയ്യാൻ നിർബന്ധിക്കുന്നില്ല. അവർ വീട്ടിൽ നിന്ന് സ്വന്തം പൂജാസാമഗ്രികൾ കൊണ്ടുവന്ന് സ്വന്തം ഇഷ്ടപ്രകാരം ആചാരങ്ങൾ ചെയ്യുന്നു. വിവാദം രാഷ്ട്രീയ പ്രേരിതമാണ്. ഇത് ഒരു രാഷ്ട്രീയ അജണ്ടയാൽ വളർത്തിയെടുക്കുന്ന അനാവശ്യ പ്രശ്നമാണ്. ഞങ്ങളുടെ സ്കൂൾ മാത്രമല്ല, ഒരേ മാനേജ്മെന്റിന് കീഴിലുള്ള നിരവധി സ്ഥാപനങ്ങളും സമാനമായ ഗുരുപൂജ ആചരണങ്ങൾ നടത്തുന്നു,” അദ്ദേഹം പറഞ്ഞു.
