തിരുവനന്തപുരം: അടിയന്തര സാഹചര്യങ്ങളിൽ ശാസ്ത്രീയമായും സുരക്ഷിതമായും പാമ്പുകളെ പിടിക്കുന്നതിനുള്ള പരിശീലനം കേരളത്തിലെ സ്കൂൾ അധ്യാപകർക്ക് നൽകാൻ വനം വകുപ്പ് ഒരുങ്ങുന്നു . ഓഗസ്റ്റ് 11 ന് പാലക്കാട്ട് ഇത് സംബന്ധിച്ച ഏകദിന പരിശീലനം നടക്കും. പാലക്കാട് സോഷ്യൽ ഫോറസ്ട്രിയിൽ നിന്ന് ഇതിനായി വിദ്യാഭ്യാസ വകുപ്പിന് കത്ത് അയച്ചു.
സ്കൂൾ തുറപ്പ് സമയത്ത് സ്കൂളുകളിൽ വനം വകുപ്പ് നടത്തിയ സുരക്ഷാ പരിശോധനയ്ക്കിടെ പാലക്കാട് നിന്നുള്ള അധ്യാപകരാണ് ഈ ആവശ്യം ഉന്നയിച്ചത്. സ്കൂൾ പരിസരങ്ങളിലും ക്ലാസ് മുറികളിലും അടുത്തിടെ പാമ്പുകളെ കണ്ടതും പാമ്പ് പിടിത്ത പരിശീലനം നൽകുന്നതിന് കാരണമായി.
സ്കൂൾ സമയത്ത് പാമ്പിനെ കണ്ടാൽ SARPA ടീം എത്തുന്നത് വരെ കാത്തിരിക്കാതെ എത്രയും വേഗം പാമ്പിനെ പിടികൂടുക എന്നതാണ് ലക്ഷ്യം. പാലക്കാട്ട് പരീക്ഷണാടിസ്ഥാനത്തിൽ ആരംഭിക്കുന്ന പദ്ധതി വിജയിച്ചാൽ മറ്റ് ജില്ലകളിലേക്കും വ്യാപിപ്പിക്കുമെന്ന് SARPA (സ്നേക്ക് അവയർനെസ് റെസ്ക്യൂ ആൻഡ് പ്രൊട്ടക്ഷൻ ആപ്പ്) മിഷന്റെ നോഡൽ ഓഫീസർ വൈ. മുഹമ്മദ് അൻവർ പറഞ്ഞു.
