ന്യൂഡൽഹി : ഇന്ത്യയും പാകിസ്ഥാനും തമ്മിലുള്ള സംഘർഷങ്ങൾക്ക് അയവ് വന്നിട്ടുണ്ടെങ്കിലും വെടിനിർത്തൽ പ്രഖ്യാപിച്ചിട്ടുണ്ടെങ്കിലും, ഇരു രാജ്യങ്ങളും തമ്മിലുള്ള രഹസ്യ ഏറ്റുമുട്ടലുകൾക്ക് ഇതുവരെ ശമനമായിട്ടില്ല. അതേസമയം, പാകിസ്ഥാന്റെ ജീവിതനിലവാരം വെളിപ്പെടുത്തി ഐക്യരാഷ്ട്രസഭയുടെ റിപ്പോർട്ട് പുറത്ത് വന്നു . പാകിസ്ഥാനിൽ 11 ദശലക്ഷത്തിലധികം ആളുകൾ കടുത്ത പട്ടിണി അനുഭവിക്കുന്നവരാണ് റിപ്പോർട്ടിൽ പറയുന്നു. പലരും പട്ടിണിയുടെ വക്കിലാണ്. പ്രതിസന്ധി ഘട്ടത്തിൽ ആഗോള ഭക്ഷ്യ വിതരണക്കാരായി ഉയർന്നുവന്ന ഇന്ത്യയ്ക്ക് വിപരീതമാണ്, പാകിസ്ഥാന്റെ അവസ്ഥ.
ഐക്യരാഷ്ട്രസഭയുടെ ഭക്ഷ്യ-കാർഷിക സംഘടന മെയ് 16 വെള്ളിയാഴ്ച പുറത്തിറക്കിയ ഗ്ലോബൽ റിപ്പോർട്ട് ഓൺ ഫുഡ് ക്രൈസസ് 2025 ലെ കണ്ടെത്തലുകളാണിവ. പാകിസ്ഥാനിലെ, പ്രത്യേകിച്ച് ബലൂചിസ്ഥാൻ, സിന്ധ്, ഖൈബർ പഖ്തൂൺഖ്വ തുടങ്ങിയ സംഘർഷബാധിതവും ദരിദ്രവുമായ പ്രദേശങ്ങളിലെ ഭക്ഷ്യ അരക്ഷിതാവസ്ഥയുടെ ഭീകരമായ ചിത്രം റിപ്പോർട്ട് വരച്ചുകാട്ടുന്നു.
ഈ റിപ്പോർട്ട് അനുസരിച്ച്, 1.1 കോടി ആളുകൾ ഭക്ഷ്യ അരക്ഷിതാവസ്ഥ നേരിടുന്നു. 2024 നെ അപേക്ഷിച്ച് ജനസംഖ്യാ കവറേജിൽ 10% വർദ്ധനവാണ് ഈ കണക്കുകൾ പ്രതിനിധീകരിക്കുന്നത്. പാകിസ്ഥാന്റെ ഭക്ഷ്യപ്രതിസന്ധി അനുദിനം വഷളാകുകയാണെന്നും ഇതിൽ സൂചിപ്പിക്കുന്നു.
കാലാവസ്ഥ വ്യതിയാനം , വെള്ളപ്പൊക്കം, ദാരിദ്ര്യം, രാഷ്ട്രീയ അവഗണന എന്നിവയാൽ വലയുന്ന 68 പ്രദേശങ്ങളിലെ ഗ്രാമീണ ജില്ലകളിലാണ് ഈ പ്രതിസന്ധിയുടെ ഭൂരിഭാഗവും വേരൂന്നിയിരിക്കുന്നത്. ഈ മേഖലകളിലെ ജനസംഖ്യയുടെ ഏകദേശം 22% പേർ പട്ടിണിയുടെ വക്കിലാണ്.ബലൂചിസ്ഥാനിലെയും സിന്ധിലെയും തെക്കൻ പ്രവിശ്യകളിൽ പോഷകാഹാരക്കുറവ് ഒരു ശക്തമാണ്. ആഗോള ആരോഗ്യ മാനദണ്ഡങ്ങൾ അനുസരിച്ച് ഈ നിരക്ക് ജീവന് ഭീഷണിയായാണ് കണക്കാക്കപ്പെടുന്നത്.
