ന്യൂഡൽഹി ; യുഎൻ പൊതുസഭയിൽ പങ്കെടുക്കുന്നതിനായി പ്രധാനമന്ത്രി നരേന്ദ്ര മോദി അടുത്ത മാസം അമേരിക്ക സന്ദർശിക്കും . വ്യാപാര ബന്ധങ്ങളിലെ ഉലച്ചിനിടയിൽ വ്യാപാര പ്രശ്നങ്ങൾ പരിഹരിക്കുന്നതിനായി യുഎസ്പ്രസിഡന്റ് ഡൊണാൾഡ് ട്രംപുമായി മോദി കൂടിക്കാഴ്ച നടത്തിയേക്കുമെന്നും സൂചനയുണ്ട്.
ട്രംപിന് പുറമേ, ഉക്രേനിയൻ പ്രസിഡന്റ് സെലെൻസ്കി ഉൾപ്പെടെയുള്ള വിദേശ നേതാക്കളുമായും പ്രധാനമന്ത്രി മോദി ഉന്നതതല കൂടിക്കാഴ്ചകൾ നടത്തും. സെപ്റ്റംബറിൽ ന്യൂയോർക്ക് സിറ്റിയിലാണ് യുഎൻജിഎ ഉച്ചകോടി നടക്കുക. സെപ്റ്റംബർ 23 മുതൽ ആരംഭിക്കുന്ന ഉച്ചകോടിയിൽ ആഗോള നേതാക്കൾ എത്തിത്തുടങ്ങും.
കൂടിക്കാഴ്ച യാഥാർത്ഥ്യമായാൽ, ഈ വർഷം ഫെബ്രുവരിയിൽ മോദി വൈറ്റ് ഹൗസ് സന്ദർശിച്ചതിന് ശേഷം ഏഴ് മാസത്തിനുള്ളിൽ ഇരു നേതാക്കളുടെയും രണ്ടാമത്തെ കൂടിക്കാഴ്ചയായിരിക്കും ഇത്.ജൂണിൽ പ്രധാനമന്ത്രി ജി 7 ഉച്ചകോടിയിൽ പങ്കെടുക്കാൻ കാനഡയിൽ ആയിരുന്നപ്പോൾ ട്രംപ് മോദിയെ യുഎസ് സന്ദർശിക്കാൻ ക്ഷണിച്ചിരുന്നു. എന്നാൽ ആ സമയത്ത് യുഎസിലുണ്ടായിരുന്ന പാകിസ്ഥാൻ ആർമി മേധാവി അസിം മുനീറുമായി കൂടിക്കാഴ്ച നടത്താൻ ട്രംപ് ആവശ്യപ്പെട്ടേക്കുമെന്നതിനാൽ മോദി ക്ഷണം നിരസിച്ചു.
കൂടിക്കാഴ്ച ഫലപ്രദമായി നടന്നാൽ, ഒക്ടോബറിൽ നടക്കാനിരിക്കുന്ന ക്വാഡ് ഉച്ചകോടിക്കായി ഇന്ത്യ സന്ദർശിക്കാൻ പ്രധാനമന്ത്രി മോദി ട്രംപിനെ നേരിട്ട് ക്ഷണിക്കുമെന്ന് സർക്കാർ വൃത്തങ്ങൾ പറഞ്ഞു. ഓസ്ട്രേലിയയും ജപ്പാനുമാണ് ക്വാഡിലെ മറ്റ് അംഗങ്ങൾ.
അതേസമയം ഇന്ത്യൻ ഉൽപ്പന്നങ്ങൾക്കുള്ള ട്രംപിന്റെ 50% താരിഫുകളുടെ പകുതി ഓഗസ്റ്റ് 7 ന് പ്രാബല്യത്തിൽ വന്നു. ബാക്കിയുള്ളവ ഓഗസ്റ്റ് 27 ന് പ്രാബല്യത്തിൽ വരും. ആ സമയപരിധിക്ക് മുമ്പ്, ഇന്ത്യയും യുഎസും തമ്മിൽ വ്യാപാര കരാറിൽ ഏർപ്പെടുന്നതിനുള്ള തിരക്കേറിയ ചർച്ചകൾ നടക്കുകയാണ് .
