ജയ്പൂർ ; ഇന്ത്യ- പാകിസ്ഥാൻ സംഘർഷങ്ങൾക്കിടയിൽ, ‘മൈസൂർ പാക്ക്’ ഉൾപ്പെടെ മധുരപലഹാരങ്ങളുടെ പേരുകൾ മാറ്റി ജയ്പൂരിലെ കടകൾ . എല്ലാ മധുരപലഹാരങ്ങളുടെയും പേരിൽ നിന്ന് ‘പാക്’ എന്ന വാക്ക് നീക്കം ചെയ്ത് ‘ശ്രീ’ എന്നാക്കിയാണ് മാറ്റിയത് . മൈസൂർ പാക്ക് ഇനി മൈസൂർ ശ്രീ എന്നാകും അറിയപ്പെടുക.
“ഞങ്ങളുടെ മധുരപലഹാരങ്ങളുടെ പേരിൽ നിന്ന് ‘പാക്’ എന്ന വാക്ക് നീക്കം ചെയ്തു. ‘മോത്തി പാക്ക്’ എന്നതിന്റെ പേര് ‘മോത്തി ശ്രീ’ എന്നും, ‘ഗോണ്ട് പാക്ക്’ എന്നതിന്റെ പേര് ‘ഗോണ്ട് ശ്രീ’ എന്നും, ‘മൈസൂർ പാക്ക്’ എന്നതിന്റെ പേര് ‘മൈസൂർ ശ്രീ’ എന്നും പുനർനാമകരണം ചെയ്തു,” കടയുടമ പറഞ്ഞു.
അതേസമയം മൈസൂർ പാക്ക് എന്നാൽ കന്നഡയിൽ മൈസൂർ മധുരം എന്നാണ് അർത്ഥമാക്കുന്നത്. എന്നാൽ, പേര് മാറ്റണമെന്ന് ഉപഭോക്താക്കൾ ആവശ്യപ്പെട്ടതായി ബേക്കറി ഉടമകൾ പറയുന്നു. കഴിഞ്ഞ മാസം ജമ്മു കശ്മീരിലെ പഹൽഗാമിൽ നടന്ന ഭീകരാക്രമണത്തെത്തുടർന്ന് ഇന്ത്യയും പാകിസ്ഥാനും തമ്മിലുള്ള സംഘർഷം വർദ്ധിച്ചുവരുന്ന സാഹചര്യത്തിലാണ് ഈ നീക്കം.മൈസൂർ ‘പാക്’ എന്ന പേര് മൈസൂർ ‘ഭാരത്’ എന്ന് പുനർനാമകരണം ചെയ്യണമെന്ന് മറ്റു ചിലർ ആവശ്യപ്പെട്ടിട്ടുണ്ട്.
