ശ്രീനഗർ ; ജമ്മു കശ്മീരിലെ രജൗരിയിൽ 17 പേരുടെ മരണത്തിന് കാരണമായത് കാഡ്മിയം വിഷബാധ . കേന്ദ്രമന്ത്രി ജിതേന്ദ്ര സിംഗാണ് ഇക്കാര്യം വെളിപ്പെടുത്തിയത് . 14 കുട്ടികൾ ഉൾപ്പെടെ ബുധാൽ ഗ്രാമത്തിൽ കഴിഞ്ഞ ഒരു മാസത്തിനിടെ ഉണ്ടായ മരണങ്ങൾ വ്യാപകമായ പരിഭ്രാന്തി സൃഷ്ടിച്ചിരുന്നു. ഇതിന്റെ കാരണം അന്വേഷിക്കാൻ ഒരു കേന്ദ്ര സംഘത്തെയും രൂപീകരിച്ചിരുന്നു.
ലഖ്‌നൗവിലെ ഇന്ത്യൻ ഇൻസ്റ്റിറ്റ്യൂട്ട് ഓഫ് ടോക്സിക്കോളജി റിസർച്ചിൽ നടത്തിയ പരിശോധനകളിൽ മരണപ്പെട്ടവരുടെ ശരീരത്തിൽ കാഡ്മിയത്തിന്റെ സാന്നിധ്യം സ്ഥിരീകരിച്ചു. “ശരീരത്തിൽ കാഡ്മിയം എങ്ങനെ കണ്ടെത്തി എന്നത് ഇപ്പോഴും അന്വേഷണത്തിലാണ്,” ജിതേന്ദ്ര സിംഗ് പറഞ്ഞു. മറ്റ് അണുബാധകളുടെ സാഹചര്യവും അദ്ദേഹം തള്ളിക്കളഞ്ഞു.
വളരെ വിഷാംശമുള്ള ലോഹമായ കാഡ്മിയം മലിനമായ വായു, വെള്ളം അല്ലെങ്കിൽ ഭക്ഷണം വഴി ഉള്ളിൽ ചെന്നാൽ മനുഷ്യശരീരത്തെ അപകടത്തിലാക്കും. ഇത് പലപ്പോഴും ന്യൂറോടോക്സിസിറ്റി ഉൾപ്പെടെയുള്ള ഗുരുതരമായ ആരോഗ്യ പ്രശ്‌നങ്ങൾക്ക് കാരണമാകുന്നു.
