ന്യൂഡൽഹി : ഇന്ത്യൻ അതിർത്തിയിൽ കൂടുതൽ നിർമ്മാണ പ്രവർത്തനങ്ങളുമായി ചൈന. ടിബറ്റിലെ ചൈനയുടെ ലുൻസെ വ്യോമതാവളത്തിൽ ഇപ്പോൾ 36 ഹാർഡ്എയർക്രാഫ്റ്റ് ഷെൽട്ടറുകൾ, പുതിയ അഡ്മിനിസ്ട്രേറ്റീവ് ബ്ലോക്കുകൾ, ഒരു പുതിയ ഏപ്രൺ എന്നിവയാണ് സജ്ജമാക്കിയിരിക്കുന്നത് . അരുണാചൽ പ്രദേശ് മേഖലയിൽ ഇന്ത്യയ്ക്കും ചൈനയ്ക്കും ഇടയിലുള്ള അതിർത്തി അടയാളപ്പെടുത്തുന്ന മക്മഹോൺ രേഖയിൽ നിന്ന് ഏകദേശം 40 കിലോമീറ്റർ വടക്കായിട്ടാണ് ഇത് സ്ഥിതി ചെയ്യുന്നത്. പുതിയ ഹാർഡ്എയർ ഷെൽട്ടറുകൾ സജ്ജമാക്കിയതോടെ ചൈനയ്ക്ക് ഇപ്പോൾ യുദ്ധവിമാനങ്ങളും വിവിധ ഡ്രോൺ സംവിധാനങ്ങളും ഉടനടി വിന്യസിക്കാൻ കഴിയും.
അരുണാചൽ പ്രദേശിലെ തന്ത്രപരമായി പ്രധാനപ്പെട്ട പട്ടണമായ തവാങ്ങിൽ നിന്ന് ഏകദേശം 107 കിലോമീറ്റർ അകലെയാണ് ഈ സ്ഥലം. അരുണാചൽ പ്രദേശിലെയും അസമിലെയും ഇന്ത്യൻ വ്യോമതാവളങ്ങൾക്കും ഇത് ഭീഷണിയാണ്. “ അവരുടെ സൈന്യത്തെ പിന്തുണയ്ക്കുന്നതിനായി പ്രവർത്തിക്കുന്ന അവരുടെ തന്ത്രപരമായ യുദ്ധവിമാനങ്ങളും ആക്രമണ ഹെലികോപ്റ്ററുകളും ലുൻസെയിൽ തന്നെ ആയിരിക്കുമെന്ന് ഇത് വ്യക്തമായി സൂചിപ്പിക്കുന്നു. ഭൂഗർഭ തുരങ്കങ്ങൾ ഇതിനകം ഇന്ധനവും വെടിക്കോപ്പുകളും കൊണ്ട് നിറഞ്ഞിരിക്കാമെന്നും “ മുൻ ഇന്ത്യൻ വ്യോമസേനാ മേധാവി എയർ ചീഫ് മാർഷൽ ബിഎസ് ധനോവ പറഞ്ഞു .
ഈ വ്യോമതാവളങ്ങളുടെ നിര്മാണവും നവീകരണവും ഭാവിയിലെ ചൈനീസ് യുദ്ധ പദ്ധതികള്ക്ക് വലിയ സഹായകമാകുമെന്നതിനാല് ഇന്ത്യയ്ക്കുമേല് ഗുരുതരമായ ഭീഷണിയാണ് നിലനില്ക്കുന്നതെന്ന് വ്യോമസേനയുടെ മുന് വൈസ് മേധാവി എയര് മാര്ഷല് അനില് ഖോസ്ലയും പറഞ്ഞു.
ഏറ്റവും പുതിയ ഫോട്ടോകൾ പ്രകാരം, ലുൻസെയിലെ ടാർമാക്കിൽ സിഎച്ച്-4 ഡ്രോണുകളും കാണപ്പെടുന്നു. ടിബറ്റ് മേഖലയിൽ ഉപയോഗിക്കാൻ കഴിയുന്ന ഒരു ഉപയോഗപ്രദമായ ആക്രമണ പ്ലാറ്റ്ഫോമാണ് സിഎച്ച്-4 ആളില്ലാ ആകാശ വാഹനം. ഉയർന്ന ഉയരത്തിലുള്ള ദൗത്യങ്ങൾക്കായി നിർമ്മിച്ചതാണിത്. കൂടാതെ പതിനാറായിരം അടിയിൽ കൂടുതൽ ഉയരത്തിൽ നിന്ന് ഹ്രസ്വ-ദൂര എയർ-ടു-സർഫസ് മിസൈലുകൾ തൊടുക്കാൻ കഴിയും.
ഇന്ത്യയുടെ തവാങ് സെക്ടറിന് കുറുകെ ഈ വിമാന ഷെൽട്ടറുകളുടെ ദ്രുതഗതിയിലുള്ള നിർമ്മാണം, ചരിത്രപരമായി സെൻസിറ്റീവ് ആയ ഒരു പ്രദേശത്ത് അതിന്റെ വ്യോമ ശക്തി വർദ്ധിപ്പിക്കാനുള്ള ചൈനയുടെ ശ്രമമായാണ് വിലയിരുത്തപ്പെടുന്നത്. . ചൈന നിലവിൽ ഹിമാലയൻ അതിർത്തിയിൽ ആറ് പുതിയ വ്യോമ താവളങ്ങൾ നവീകരിക്കുകയാണ്, അതിൽ ലുൻസെ സൗകര്യവും ഉൾപ്പെടുന്നു. ഇന്ത്യയുടെ പ്രതിരോധ സംവിധാനങ്ങൾക്ക് സമീപമായാണ് ഈ സ്റ്റേഷനുകൾ സ്ഥിതി ചെയ്യുന്നത്.
