ദുബായ്: ഏഷ്യാകപ്പിൽ പാകിസ്താനെതിരായ വിജയം സൈനികർക്കാണ് ടീം ഇന്ത്യ സമർപ്പിച്ചത് . ഇന്ത്യ -പാക് പോരാട്ടം ബഹിഷ്ക്കരികണമെന്ന ആഹ്വാനം ഉയർന്ന ഘട്ടത്തിലാണ് മത്സരം നടന്നത് . ടോസ് സമയത്ത് പാക് നായകൻ സൽമാൻ ആഘയ്ക്ക് കൈ കൊടുക്കാനും സൂര്യകുമാർ തയ്യാറായില്ല . മത്സരശേഷവും പാക് താരങ്ങളെ മൈൻഡ് ചെയ്യാതെ ഇന്ത്യൻ താരങ്ങൾ മടങ്ങുകയും ചെയ്തു.പാകിസ്ഥാൻ ടീം ഇന്ത്യൻ ഡ്രസ്സിംഗ് റൂമിലേക്ക് നടന്നപ്പോഴും വാതിലുകൾ അടച്ചിരുന്നു . ഇത് വലിയ വിവാദങ്ങൾക്ക് കാരണമായി . ഈ വിഷയത്തിൽ പ്രതികരണവുമായി എത്തിയിരിക്കുകയാണ് ബിസിസിഐ . ഇന്ത്യ ചെയ്തത് തെറ്റല്ലെന്ന് ബിസിസിഐ ഉദ്യോഗസ്ഥർ വ്യക്തമാക്കി.
കളിയുടെ അവസാനം കളിക്കാരെ ഹസ്തദാനം ചെയ്യാൻ നിർബന്ധിക്കുന്ന ഒരു നിയമവുമില്ലെന്നും ഇന്ത്യയും പാകിസ്ഥാനും തമ്മിലുള്ള വർദ്ധിച്ചുവരുന്ന രാഷ്ട്രീയ സംഘർഷങ്ങൾ കണക്കിലെടുക്കുമ്പോൾ, ഇന്ത്യൻ ക്രിക്കറ്റ് ടീം കളിക്കാർ ഹസ്തദാനം ചെയ്യുന്നതിലോ പാകിസ്ഥാൻ ക്രിക്കറ്റ് കളിക്കാരുമായി ഇടപഴകുന്നതിലോ അർത്ഥമില്ലെന്നും ബിസിസിഐ ഉദ്യോഗസ്ഥർ പറഞ്ഞു.
“നിങ്ങൾ നിയമപുസ്തകം വായിച്ചാൽ, എതിരാളികളുമായി ഹസ്തദാനം ചെയ്യുന്നതിനെക്കുറിച്ച് ഒരു സ്പെസിഫിക്കേഷനും ഇല്ല. ഇത് ഒരു സൗഹാർദ്ദ ആംഗ്യമാണെന്ന് നിയമവുമില്ല, ഒരുതരം കൺവെൻഷനുമാണ്, അത് കായിക സ്പെക്ട്രത്തിൽ ആഗോളതലത്തിൽ പിന്തുടരുന്നു. ഒരു നിയമവുമില്ലെങ്കിൽ, ഇന്ത്യൻ ക്രിക്കറ്റ് ടീം ഒരു എതിരാളിയുമായി കൈ കുലുക്കാൻ ബാധ്യസ്ഥരല്ല, പ്രത്യേകിച്ച് അവരുമായി ബന്ധം വഷളായ സാഹചര്യത്തിൽ ” ബിസിസിഐ ഉദ്യോഗസ്ഥൻ പറഞ്ഞു.
അതേസമയം പാകിസ്ഥാൻ ക്രിക്കറ്റ് ബോർഡ് (പിസിബി) സംഭവത്തിൽ അതൃപ്തി പ്രകടിപ്പിച്ചിട്ടുണ്ട് . ഏഷ്യൻ ക്രിക്കറ്റ് കൗൺസിലിൽ (എസിസി) ഔദ്യോഗികമായി പരാതി നൽകാനും തീരുമാനിച്ചു. “ഐസിസി പെരുമാറ്റച്ചട്ടത്തിന്റെയും ക്രിക്കറ്റ് സ്പിരിറ്റുമായി ബന്ധപ്പെട്ട എംസിസി നിയമങ്ങളുടെയും മാച്ച് റഫറിയുടെ ലംഘനങ്ങൾ സംബന്ധിച്ച് പിസിബി ഐസിസിയിൽ പരാതി നൽകിയിട്ടുണ്ട്. ഏഷ്യാ കപ്പിൽ നിന്ന് മാച്ച് റഫറിയെ ഉടൻ നീക്കം ചെയ്യണമെന്ന് പിസിബി ആവശ്യപ്പെട്ടു,” പിസിബി മേധാവി മൊഹ്സിൻ നഖ്വി ‘എക്സിൽ’ പറഞ്ഞു.
