ഈരാറ്റുപേട്ട: പൂഞ്ഞാറിൽ കനത്ത നാശനഷ്ടം വിതച്ച് മഴ . ബിജെപി നേതാവ് പിസി ജോർജിന്റെ വീട്ടിൽ അടക്കം വെള്ളം കയറി. വീട്ടിലും ഭാര്യയുടെ കടയിലും വെള്ളം കയറിയതിനെ തുടർന്ന് 40 ലക്ഷത്തോളം രൂപയുടെ നഷ്ടം സംഭവിച്ചതായി പി സി ജോർജ് പറഞ്ഞു.
“ഞാൻ ഇവിടെ 40 വർഷമായി താമസിക്കുന്നു. ഇത്തരമൊരു സാഹചര്യം മുമ്പൊരിക്കലും ഉണ്ടായിട്ടില്ല. എന്റെ വീട്ടിൽ ഇങ്ങനെ വെള്ളം കയറുന്നത് ഞാൻ കണ്ടിട്ടില്ല. ഇന്നലെ പുലർച്ചെ 2 മണിക്ക്, സമീപത്ത് താമസിക്കുന്ന ബാങ്ക് ഉദ്യോഗസ്ഥൻ വീട്ടിലെത്തി വാതിലിൽ മുട്ടി. അപ്പോഴാണ് പെട്ടെന്നുള്ള വെള്ളപ്പൊക്കം ഞാൻ അറിഞ്ഞത്.
പുലർച്ചെ 2.30 ഓടെ വെള്ളം വീട്ടിലേക്ക് വെള്ളം കയറി അത് മൂന്നര അടി വരെ ഉയർന്നു. ആ സമയത്ത് എന്റെ ഭാര്യ ഉഷയും ഇളയ മകൻ ഷെയ്നും വീട്ടിലുണ്ടായിരുന്നു. ഞങ്ങൾ ഉടൻ തന്നെ വീടിന്റെ മുകളിലത്തെ നിലയിലേക്ക് മാറി. വെള്ളം കയറി നിരവധി വീട്ടുപകരണങ്ങൾ നശിച്ചു. രണ്ട് ഫ്രിഡ്ജുകളും ഒരു ടിവിയും പോയി. വീട്ടിൽ മാത്രം ഏകദേശം 10 ലക്ഷം രൂപയുടെ നഷ്ടം സംഭവിച്ചു. രണ്ട് ഇന്നോവ കാറുകളും വെള്ളത്തിനടിയിലായി.
മാത്രമല്ല, പൂഞ്ഞാറിലെ എന്റെ ഭാര്യയുടെ സ്ഥാപനവും വെള്ളത്തിനടിയിലായി. എല്ലാ സാരികളും നശിച്ചു. അവയിൽ പലതും വിലകൂടിയ വസ്ത്രങ്ങളായിരുന്നു. ഏകദേശം 30 ലക്ഷം രൂപയുടെ നഷ്ടം സംഭവിച്ചു. ചിലർക്ക് ഇതിലും വലിയ നഷ്ടം സംഭവിച്ചിട്ടുണ്ട്. അതിനാൽ എനിക്ക് സംഭവിച്ച നഷ്ടത്തെക്കുറിച്ച് പറയുന്നത് ബുദ്ധിയല്ലെന്ന് എനിക്കറിയാം, ”പിസി ജോർജ് വ്യക്തമാക്കി.
