തിരുവനന്തപുരം: എൽഡിഎഫ് സർക്കാർ ഒരു കാലത്തും പിഎം ശ്രീ നടപ്പിലാക്കിയിരുന്നില്ലെന്ന് പ്രതിപക്ഷ നേതാവ് പിണറായി വിജയൻ . ഭരണം കിട്ടിയതോടെ യുഡിഎഫ് ഇക്കാര്യത്തിൽ മലക്കം മറിഞ്ഞു . എൽഡിഎഫ് സർക്കാർ കാവി വത്കരണത്തിന് തയ്യാറായിരുന്നില്ല. എംഒയു ഒപ്പിട്ടത് പിഎം ശ്രീ പദ്ധതി നടപ്പാക്കാൻ ആയിരുന്നില്ല. ഇതുമായി ബന്ധമില്ലാത്ത ഫണ്ട് റിലീസ് ചെയ്യുന്നതിനായിരുന്നു എംഒയു ഒപ്പിട്ടതെന്നും പിണറായി വിജയൻ വാർത്താ സമ്മേളനത്തിൽ പറഞ്ഞു.
‘ സ്കൂൾ പാഠ്യപദ്ധതിയിൽ സംഘപരിവാർ പ്രത്യയശാസ്ത്രം അടിച്ചേൽപ്പിക്കാനുള്ള ശ്രമമാണിത് . പദ്ധതി മതേതര മൂല്യങ്ങളുമായി പൊരുത്തപ്പെടുന്നതല്ല. യുഡിഎഫ് യോഗം ചില പ്രധാന തീരുമാനങ്ങൾ എടുത്തു, പിഎംശ്രീ പദ്ധതി പ്രധാന വിഷയങ്ങളിലൊന്നായിരുന്നു. പിഎംശ്രീ പദ്ധതി വഴി, രാജ്യമെമ്പാടും ബിജെപി പ്രത്യയശാസ്ത്ര അജണ്ട അടിച്ചേൽപ്പിക്കാൻ ശ്രമിക്കുകയാണ്. മതേതരത്വം ഉയർത്തിപ്പിടിക്കുന്നവർക്ക് അത്തരമൊരു നീക്കം അംഗീകരിക്കാൻ കഴിയില്ല. കോൺഗ്രസ് നയിക്കുന്ന സംസ്ഥാന സർക്കാരുകൾ പദ്ധതി അംഗീകരിച്ചിരുന്നു. എന്നാൽ കേരളത്തിലെ എൽഡിഎഫ് സർക്കാർ അംഗീകരിച്ചില്ല.
പദ്ധതി നടപ്പിലാക്കാനോ പദ്ധതിയുടെ ഭാഗമായി വിദ്യാഭ്യാസ മേഖലയിൽ എന്തെങ്കിലും മാറ്റങ്ങൾ വരുത്താനോ എൽഡിഎഫ് ഒരിക്കലും തയ്യാറായിരുന്നില്ല. സംഘപരിവാർ പ്രത്യയശാസ്ത്രം പാഠപുസ്തകങ്ങളിലും പാഠ്യപദ്ധതിയിലും കൊണ്ടുവരാനുള്ള ശ്രമമാണിത്. ധാരണാപത്രവുമായി ബന്ധപ്പെട്ട വിഷയം ഞങ്ങൾ ഇതിനകം വ്യക്തമാക്കിയിട്ടുണ്ട്. പദ്ധതി നടപ്പിലാക്കുന്നതിന്റെ ഭാഗമായിട്ടല്ല ഇത് ഒപ്പിട്ടത്. പതിവായി നൽകിയിരുന്നതും എന്നാൽ തടഞ്ഞുവച്ചിരുന്നതുമായ ഫണ്ടുകൾ വിതരണം ചെയ്യുന്നത് ഉറപ്പാക്കാൻ മാത്രമാണ് ധാരണാപത്രത്തിൽ ഒപ്പിട്ടത്.അന്ന് ആ പദ്ധതിക്കെതിരെ യുഡിഎഫ് ശക്തമായ നിലപാട് സ്വീകരിച്ചിരുന്നു. സർക്കാർ മാറുന്നതുവരെ യുഡിഎഫ് അതേ നിലപാട് തന്നെ തുടർന്നു. എന്നാൽ അധികാരത്തിൽ വന്നതോടെ അവരുടെ നിലപാട് മാറി” എന്നും പിണറായി വിജയൻ പറഞ്ഞു.
