കൽപ്പറ്റ : സ്വകാര്യ ആശുപത്രിയിൽ പ്രാക്ടീസ് നടത്തിയ മെഡിക്കൽ കോളേജ് ഡോക്ടർക്കെതിരെ വിജിലൻസ് കേസെടുത്തു.മാനന്തവാടിയിലെ സർക്കാർ മെഡിക്കൽ കോളേജിലെ അസോസിയേറ്റ് പ്രൊഫസറും കാർഡിയോവാസ്കുലർ സർജനുമായ ഡോ. ശിവപ്രസാദിനെതിരെയാണ് സേവന നിയമങ്ങൾ ലംഘിച്ചുവെന്നാരോപിച്ച് കോഴിക്കോട് വിജിലൻസ് യൂണിറ്റ് കേസ് രജിസ്റ്റർ ചെയ്തത്.
സർക്കാർ മെഡിക്കൽ കോളേജ് ആശുപത്രിയിൽ നിന്ന് പ്രതിമാസം 3 ലക്ഷം രൂപ ശമ്പളം ലഭിക്കുന്ന ഡോ. ശിവപ്രസാദ് കോട്ടക്കലിലെ ആസ്റ്റർ മിംസ് ആശുപത്രിയിൽ സ്വകാര്യ പ്രാക്ടീസും നടത്തിയിരുന്നു. അവിടെ നിന്ന് പ്രതിമാസം ഏഴ് ലക്ഷം രൂപയാണ് പ്രതിഫലമായി കൈപ്പറ്റിയിരുന്നത് . ജൂണിലാണ് ശിവപ്രസാദിനെ വിജിലൻസ് പിടികൂടിയത്.
ഡോക്ടറുടെ സർവീസിൽ ഗുരുതരമായ ക്രമക്കേടുകൾ കണ്ടെത്തിയതായി അന്വേഷണ ഉദ്യോഗസ്ഥർ പറഞ്ഞു. ഈ കണ്ടെത്തലുകളുടെ അടിസ്ഥാനത്തിലാണ് അദ്ദേഹത്തിനെതിരെ വിജിലൻസ് കേസ് രജിസ്റ്റർ ചെയ്തത് . സർക്കാർ ഡോക്ടർമാരുടെ അനധികൃത സ്വകാര്യ പ്രാക്ടീസിനെതിരെ വ്യാപകമായ നടപടി സ്വീകരിക്കുന്നതിന്റെ ഭാഗമായാണ് നടപടിയെന്ന് ഉദ്യോഗസ്ഥർ പറഞ്ഞു. സമാനമായ രീതികളിൽ ഏർപ്പെടുന്ന കേരളത്തിലുടനീളമുള്ള 200 ഓളം സർക്കാർ ഡോക്ടർമാരെ ഇപ്പോൾ വിജിലൻസ് നിരീക്ഷണത്തിലാക്കിയിട്ടുണ്ട്.
