ന്യൂഡൽഹി ; ബംഗാളിലെ വൻ വിജയത്തിന് പിന്നാലെ പ്രധാനമന്ത്രി നരേന്ദ്ര മോദി നടത്തിയ പ്രസംഗം വൈറലാകുന്നു. 2025 നവംബറിൽ, ബിഹാറിലെ ബിജെപിയുടെ വൻ വിജയത്തെ അഭിസംബോധന ചെയ്തുകൊണ്ടാണ് “ഗംഗാ നദി ബീഹാർ വഴി ബംഗാളിലേക്ക് ഒഴുകുന്നു” എന്ന് മോദി പറഞ്ഞത്. മാസങ്ങൾക്ക് ശേഷം, ആ പരാമർശം പശ്ചിമ ബംഗാളിൽ അർത്ഥവത്താകുകയാണ്.
“ഗംഗാ നദി ബീഹാർ വഴി ബംഗാളിലേക്ക് ഒഴുകുന്നു. നദി പോലെ ബിഹാറിലെ വിജയം ബംഗാളിലെ നമ്മുടെ വിജയത്തിന് വഴിയൊരുക്കും,” പ്രധാനമന്ത്രി മോദി തന്റെ പ്രസംഗത്തിനിടെ പറഞ്ഞു. ബീഹാർ തിരഞ്ഞെടുപ്പിൽ 243 സീറ്റുകളിൽ 202-ലധികം സീറ്റുകൾ അന്ന് നാഷണൽ ഡെമോക്രാറ്റിക് അലയൻസ് (എൻഡിഎ) തൂത്തുവാരി, ബിജെപി ഏറ്റവും വലിയ ഒറ്റ പാർട്ടിയായി ഉയർന്നു.
“നിങ്ങളുടെ പ്രതീക്ഷകളാണ് എന്റെ പ്രതിജ്ഞ, നിങ്ങളുടെ സ്വപ്നങ്ങളാണ് എന്റെ പ്രചോദനം. ബിജെപിയെ സംബന്ധിച്ചിടത്തോളം പാർട്ടി പ്രവർത്തകരാണ് അവരുടെ ശക്തി,” ബീഹാറിലെ മികച്ച പ്രകടനത്തിന് ‘കാര്യകർത്താക്കളെ’ പ്രശംസിച്ചുകൊണ്ട് പ്രധാനമന്ത്രി മോദി പറഞ്ഞിരുന്നു. പ്രതിപക്ഷ സഖ്യമായ മഹാഗത്ബന്ധന്റെ തകർച്ചയെ പരാമർശിച്ചുകൊണ്ട്, പശ്ചിമ ബംഗാളിൽ നിന്നും ‘ജംഗിൾ രാജ്’ പിഴുതെറിയാൻ പ്രധാനമന്ത്രി മോദി അഭ്യർത്ഥിച്ചു.
“ബംഗാളിൽ മാത്രമല്ല, ഈ വിജയം ദക്ഷിണേന്ത്യയിലെ നമ്മുടെ പ്രവർത്തകർക്കും പ്രചോദനമാകും,” എന്നും മോദി പറഞ്ഞു. ഇന്ന് 293 സീറ്റുകളിൽ 194 എണ്ണത്തിലും ബിജെപി തൃണമൂൽ കോൺഗ്രസിനെക്കാൾ മുന്നിലെത്തിയപ്പോൾ, മമത ബാനർജിയുടെ കാളിഘട്ട് വസതിക്ക് പുറത്ത് പാർട്ടി അനുയായികൾ ഒത്തുകൂടി “ജയ് ശ്രീറാം” മുദ്രാവാക്യങ്ങൾ ഉയർത്തി. സംസ്ഥാനമെമ്പാടും വോട്ടെണ്ണൽ പുരോഗമിക്കുമ്പോൾ തന്നെ ആഘോഷങ്ങൾ ആരംഭിച്ചതോടെ അന്തരീക്ഷം ആവേശഭരിതമായി.
നോർത്ത് 24 പർഗാനാസ്, നാദിയ, സൗത്ത് 24 പർഗാനാസിന്റെ ചില ഭാഗങ്ങൾ എന്നിവിടങ്ങളിൽ വ്യാപിച്ചുകിടക്കുന്ന നിർണായകമായ ഒരു തിരഞ്ഞെടുപ്പ് മേഖലയായ മതുവയിൽ നിരവധി മണ്ഡലങ്ങളിലും ബിജെപി മുന്നിലാണ്.
