തിരുവനന്തപുരം: ശബരിമല സ്വർണ്ണ മോഷണത്തിൽ പങ്കുണ്ടെന്ന് പ്രവാസി വ്യവസായി ആരോപിക്കുന്ന ഡി മണിയുടെ (ബാലമുരുകൻ) വീടും സ്ഥാപനവും പ്രത്യേക അന്വേഷണ സംഘം (എസ്ഐടി) റെയ്ഡ് ചെയ്യുന്നു. ദിണ്ടിഗൽ സ്വദേശിയാണ് ഡി മണി . സ്വർണ്ണ മോഷണത്തിലെ ഇടനിലക്കാരനായ വിരുതുനഗർ സ്വദേശി ശ്രീകൃഷ്ണന്റെ വസതിയിലും റെയ്ഡ് നടക്കുന്നുണ്ട്.
തിരുവനന്തപുരം വിജിലൻസ് കോടതിയിൽ നിന്ന് സെർച്ച് വാറണ്ട് ലഭിച്ചതിനെത്തുടർന്ന് ഡിവൈഎസ്പിയുടെ നേതൃത്വത്തിലുള്ള സംഘം കഴിഞ്ഞ ദിവസം ദിണ്ടിഗലിലും വിരുതുനഗറിലും എത്തിയിരുന്നു. തമിഴ്നാട് പോലീസിന്റെ സഹായത്തോടെയാണ് റെയ്ഡ് നടത്തുന്നത്. ഡി മണിയെയും ശ്രീകൃഷ്ണനെയും എസ്ഐടി സംഘം ചോദ്യം ചെയ്യുകയാണ്. റവന്യൂ ഉദ്യോഗസ്ഥരുടെ സാന്നിധ്യത്തിൽ ഡിണ്ടിഗലിൽ രണ്ട് സ്ഥലങ്ങളിലും വിരുതുനഗറിൽ ഒരു സ്ഥലത്തും റെയ്ഡ് നടക്കുന്നു.
ഡി മണി ഡിണ്ടിഗലിലെ ബാലമുരുഗനാണെന്ന് കഴിഞ്ഞ ദിവസം അന്വേഷണ സംഘം സ്ഥിരീകരിച്ചിരുന്നു. അന്താരാഷ്ട്ര മാഫിയയുമായി ബന്ധമുള്ള ഒരു സംഘം കേരളത്തിൽ നിന്ന് പഞ്ചലോഹ വിഗ്രഹങ്ങൾ ഉൾപ്പെടെയുള്ള വസ്തുക്കൾ കടത്തിയതായി വ്യവസായി മൊഴി നൽകി. ഇതിന്റെ സത്യാവസ്ഥ വ്യക്തമാക്കുന്നതിനാണ് ചോദ്യം ചെയ്യൽ.
ശബരിമലയ്ക്ക് പുറമേ, പത്മനാഭസ്വാമി ക്ഷേത്രത്തിലെ വിഗ്രഹങ്ങളും സംഘം ലക്ഷ്യമിട്ടതായി പ്രവാസി വ്യവസായി പറഞ്ഞു. മുൻ തമിഴ്നാട് മുഖ്യമന്ത്രി ജയലളിതയുമായി ബന്ധമുള്ള ആളുകളാണ് മണിയെയും സംഘത്തെയും പരിചയപ്പെടുത്തിയതെന്നാണ് പ്രവാസി വ്യവസായിയുടെ മൊഴി.
