പാലക്കാട് : പ്രണയം നിരസിച്ചതിന് പതിനേഴുകാരിയുടെ വീടിന് നേരെ പെട്രോൾ ബോംബെറിഞ്ഞ യുവാക്കൾ അറസ്റ്റിൽ . എറിഞ്ഞ ബോംബ് പൊട്ടാത്തതിനാൽ വലിയൊരു അപകടം ഒഴിവായി. പാലക്കാട് കുത്തന്നൂരിലാണ് സംഭവം. പുതുശ്ശേരി സ്വദേശി രാഹുലും തോലന്നൂർ സ്വദേശി അഖിലുമാണ് അറസ്റ്റിലായത്. ആക്രമണത്തിൽ പെൺകുട്ടിയുടെ കിടപ്പുമുറിയുടെ ജനൽച്ചില്ലുകൾ തകർന്നു.
പെൺകുട്ടി നേരത്തെ രാഹുലുമായും അഖിലുമായും സൗഹൃദത്തിലായിരുന്നു. ചില പ്രശ്നങ്ങൾ കാരണം പെൺകുട്ടി അവരിൽ ഒരാളുമായുള്ള ബന്ധത്തിൽ നിന്ന് പിന്മാറിയിരുന്നു. ഇതിനുശേഷം, ഇരുവരും ബൈക്കിൽ എത്തി വീടിന് നേരെ പെട്രോൾ ബോംബെറിയുകയായിരുന്നു .
ആദ്യം വീടിന്റെ ജനൽച്ചില്ല് തകർത്തു. പിന്നീട് പെട്രോൾ ബോംബ് കത്തിച്ച് എറിഞ്ഞെങ്കിലും മഴ പെയ്തതിനാൽ അത് കത്തിയില്ല. തുടർന്ന് ആക്രമണം നടന്ന ഉടൻ ഇരുവരും ബൈക്കിൽ രക്ഷപ്പെട്ടു. സിസിടിവി ദൃശ്യങ്ങളുടെ അടിസ്ഥാനത്തിൽ നടത്തിയ അന്വേഷണത്തിലാണ് ഇരുവരെയും അറസ്റ്റ് ചെയ്തത്. അറസ്റ്റിലായ യുവാക്കളിൽ ഒരാൾ കഞ്ചാവ് കേസുകളിൽ പ്രതിയാണ്.
