കൊച്ചി: സേവ് ബോക്സ് ആപ്പ് നിക്ഷേപ തട്ടിപ്പ് കേസിൽ കൂടുതൽ ചോദ്യം ചെയ്യലിനായി എൻഫോഴ്സ്മെന്റ് ഡയറക്ടറേറ്റ് (ഇഡി) തനിക്ക് സമൻസ് അയച്ചിട്ടുണ്ടെന്ന വാർത്ത നിഷേധിച്ച് നടൻ ജയസൂര്യ . ഇഡി തനിക്ക് സമൻസ് അയച്ചിട്ടുണ്ടെന്നും ഏഴാം തീയതി വീണ്ടും ഹാജരാകണമെന്നുമുള്ള വാർത്ത തെറ്റാണെന്നും ജയസൂര്യ പറഞ്ഞു. കഴിഞ്ഞ രണ്ട് ദിവസമായി ചാനൽ വഴി സമൻസ് ലഭിച്ചതല്ലാതെ തനിക്കും ഭാര്യയ്ക്കും ഇഡിയിൽ നിന്ന് നേരിട്ടുള്ള നിർദ്ദേശങ്ങളൊന്നും ലഭിച്ചിട്ടില്ലെന്ന് ജയസൂര്യ പരിഹസിച്ചു.
“സമൻസ് പ്രകാരം ഡിസംബർ 24 നും 29 നും ഞാൻ ഇഡിക്ക് മുന്നിൽ ഹാജരായി. എന്നാൽ, ഏഴാം തീയതി വീണ്ടും ഹാജരാകാനുള്ള സമൻസ് എനിക്ക് ലഭിച്ചിട്ടില്ല. പരസ്യ ആവശ്യങ്ങൾക്കായി ഞങ്ങളെ സമീപിക്കുന്നവർ നാളെ എന്ത് തരത്തിലുള്ള തട്ടിപ്പുകൾ നടത്തുമെന്ന് ആർക്കെങ്കിലും ഊഹിക്കാൻ കഴിയുമോ? നിയമപരമായി മാത്രം സാമ്പത്തിക ഇടപാടുകൾ നടത്തുകയും പൊതു ഖജനാവിലേക്ക് നികുതി അടയ്ക്കുകയും ചെയ്യുന്ന ഉത്തരവാദിത്തമുള്ള ഒരു സാധാരണ പൗരൻ മാത്രമാണ് ഞാൻ . “ ജയസൂര്യ പറഞ്ഞു.
സേവ് ബോക്സ് ആപ്പ് നിക്ഷേപ തട്ടിപ്പ് കേസിൽ ഇ.ഡി വീണ്ടും ജയസൂര്യയെ വിളിച്ചുവരുത്തിയതായി റിപ്പോർട്ടുകൾ ഉണ്ടായിരുന്നു. ഓൺലൈൻ ലേലത്തിലൂടെ കുറഞ്ഞ വിലയ്ക്ക് ഇലക്ട്രോണിക് ഉപകരണങ്ങൾ വാങ്ങുന്നതിന്റെ പ്രചാരണത്തോടെയാണ് 2019 ൽ സേവ് ബോക്സ് ആപ്പ് ആരംഭിച്ചത്. ജയസൂര്യ ഉൾപ്പെടെയുള്ള സിനിമാതാരങ്ങൾ ആപ്പ് ലോഞ്ചിൽ മുഖ്യാതിഥികളായിരുന്നു.
സേവ് ബോക്സിന്റെ ബ്രാൻഡ് അംബാസഡറാകാൻ ജയസൂര്യയ്ക്ക് കരാർ ഉണ്ടായിരുന്നതായി ഇ.ഡിയ്ക്ക് സൂചനകൾ ലഭിച്ചിരുന്നു. കരാറിന്റെ ഭാഗമായി ജയസൂര്യയ്ക്ക് ലഭിച്ച പണം കമ്പനി നടത്തിയ ഒരു തട്ടിപ്പിൽ നിന്നാണെന്ന് ഇ.ഡി കണ്ടെത്തി. ജയസൂര്യയെ കൊച്ചി ഇ.ഡി ഓഫീസിലേക്ക് വിളിച്ചുവരുത്തി നേരത്തെ ചോദ്യം ചെയ്തിരുന്നു. ഭാര്യ സരിതയെയും അദ്ദേഹത്തോടൊപ്പം ചോദ്യം ചെയ്തു. ജയസൂര്യയുടെ സാമ്പത്തിക കാര്യങ്ങൾ കൈകാര്യം ചെയ്യുന്നത് ഭാര്യയായതിനാലാണ് സരിതയെയും ഇഡി ചോദ്യം ചെയ്തത് .
