കോട്ടയം: ശബരിമല വിഷയത്തിൽ പ്രധാനമന്ത്രി നരേന്ദ്രമോദിയ്ക്ക് കൃത്യമായ പദ്ധതികൾ ഉണ്ടെന്ന് കേന്ദ്രമന്ത്രി സുരേഷ് ഗോപി . പാലാ മേവട പുറക്കാട്ട് ദേവി ക്ഷേത്രത്തിൽ നടന്ന കലുങ്ക് സംവാദത്തിൽ സംസാരിക്കുകയായിരുന്നു അദ്ദേഹം.
‘ ഏകീകൃത സിവിൽ കോഡ് രാജ്യത്ത് വരും. ഓപ്പറേഷൻ സിന്ദൂരത്തിന്റെ വിജയത്തിനുശേഷം, ഏകീകൃത സിവിൽ കോഡ് നടപ്പിലാക്കുന്നതിനെക്കുറിച്ച് അമിത് ഷാ സംസാരിച്ചിരുന്നു. ഞങ്ങൾ അതിൽ ഉറച്ചു വിശ്വസിക്കുന്നു.
അതിനു പിന്നാലെ കേന്ദ്രതല ദേവസ്വം സംവിധാനം വരും. രാജ്യത്തുടനീളമുള്ള എല്ലാ ക്ഷേത്രങ്ങളും ഏകീകൃത രീതിയിൽ പ്രവർത്തിക്കും. ദേവസ്വങ്ങളുടെ എല്ലാം അവസാനമായിരിക്കും അന്ന് . ഇത് വാഗ്ദാനമല്ല, ഉറപ്പാണ്. പിന്നെ വരാൻ പോകുന്നത് ഹിന്ദു റിലീജിയസ് കൺസോർഷ്യം, ഹിന്ദു റിലീജിയസ് അഡ്മിനിസ്ട്രേഷൻ പോലെ ദേശീയമായ ഒരു സംവിധാനമായിരിക്കും ശബരിമല മാത്രമല്ല ഒരുപാട് ക്ഷേത്രങ്ങൾ ഇതു പോലെയുണ്ടെന്നും അദ്ദേഹം പറഞ്ഞു.
എയിംസ് വന്നാൽ, അത് കേരളത്തിന്റെ വഴിത്തിരിവായിരിക്കും. എനിക്ക് അത് ഉറപ്പാക്കാൻ കഴിയുന്നില്ലെങ്കിൽ, വോട്ട് തേടാൻ ഞാൻ ഇനി വരില്ല. ഇതിനായി സംസ്ഥാന സർക്കാർ സഹകരിക്കണം. ആലപ്പുഴയിൽ സ്ഥലം അനുവദിക്കണമെന്ന് ഞാൻ മുഖ്യമന്ത്രിയോട് നേരിട്ട് പറഞ്ഞു. അദ്ദേഹം എന്നെ ഹെലികോപ്റ്ററിൽ അനുഗമിച്ചാൽ, 300 ഏക്കർ ഉദയ സ്റ്റുഡിയോ ഭൂമിയും സമീപത്തുള്ള മറ്റൊരു 300 ഏക്കർ ഭൂമിയും എനിക്ക് കാണിക്കാൻ കഴിയും. എയിംസ് അയൽ ജില്ലകൾക്കും ഗുണം ചെയ്യും, കൂടാതെ കുമരകത്തെ ടൂറിസം വളർത്തുകയും ചെയ്യും,കോട്ടയത്ത് നിന്ന് കുമരകം വഴി മധുരയിലേക്ക് യാത്ര ചെയ്യുന്നവർക്കും ഇത് ഗുണം ചെയ്യും ” അദ്ദേഹം പറഞ്ഞു.
പാലാ പൂവരണി പിഎച്ച്സി റോഡിലെ നിർമ്മാണം കരാറുകാർ ഏറ്റെടുക്കാത്തതിനാൽ സ്തംഭിച്ചിരിക്കുകയാണെന്ന് ചൂണ്ടിക്കാട്ടിയ വാർഡ് അംഗത്തിനും അദ്ദേഹം മറുപടി നൽകി . “ഇത് പ്രധാനമന്ത്രി ഗ്രാമസഡക് യോജനയുടെ കീഴിലാണെങ്കിൽ, ഈ പരാതിയുടെ ഉത്തരവാദിത്തം ഞാൻ ഏറ്റെടുക്കും.” സെപ്റ്റംബർ 26 ന് തൃശൂരിൽ നടക്കുന്ന നിഷ മീറ്റിംഗിൽ ഈ വിഷയം ചർച്ച ചെയ്യുമെന്ന് അദ്ദേഹം ഉറപ്പുനൽകി.തൃശൂർ ജില്ലയ്ക്ക് പുറത്ത് നടന്ന ആദ്യത്തെ കലുങ്ക് സംവാദമായിരുന്നു ഇത്.
.
