കൊച്ചി : പെണ്കുഞ്ഞ് ജനിച്ചതിന്റെ പേരില് യുവതിയ്ക്ക് ഭര്ത്താവില്നിന്ന് ക്രൂരപീഡനം നേരിടേണ്ടി വന്നതായി പരാതി. അങ്കമാലിയിലാണ് സംഭവം. കുഞ്ഞ് ജനിച്ച് 28-മത്തെ ദിവസം യുവതിയെ കട്ടിലില്നിന്ന് വലിച്ചുതാഴെയിട്ട് തലയ്ക്കടിച്ചുവെന്നും ഭര്ത്താവിനെതിരെ കേസുമായി മുന്നോട്ടുപോകുമെന്നും യുവതിയും കുടുംബവും വ്യക്തമാക്കി. യുവതിയുടെ പരാതിയില് അങ്കമാലി പോലീസ് കേസെടുത്തു.
2020 ലായിരുന്നു ഇവരുടെ വിവാഹം നടന്നത്. ഒരു കൊല്ലത്തിനുശേഷമാണ് കുഞ്ഞ് ജനിച്ചത്. അതിനുശേഷമാണ് യുവതിയ്ക്ക് അന്ധവിശ്വാസിയായ ഭര്ത്താവില്നിന്ന് മർദ്ദനം നേരിടേണ്ടി വന്നത്. വീട്ടുകാരുമായി ബന്ധപ്പെടാതിരിക്കാന് പലതവണ യുവതിയ്ക്ക് വീട്ടുകാര് വാങ്ങിനല്കിയ മൊബൈല് ഫോണുകള് നശിപ്പിക്കുകയും ചെയ്തു.
തലയ്ക്കടിച്ച് പരിക്കേല്പിച്ച് ആശുപത്രിയിലെത്തിച്ച ഇയാള് യുവതിയ്ക്ക് അപസ്മാരമുണ്ടായപ്പോള് ചുമരില് തലയിടിച്ചാണ് പരിക്കേറ്റതെന്നാണ് അശുപത്രി അധികൃതരോട് പറഞ്ഞത്. വടിയുപയോഗിച്ചും ഇരുമ്പ് ദണ്ഡുപയോഗിച്ചും പല തവണ മർദ്ദിച്ചതായും യുവതി പരാതിയില് വ്യക്തമാക്കി.
