കോഴിക്കോട്: മലപ്പുറം ചേളാരിയിലെ 11 കാരിയ്ക്ക് അമീബിക് മസ്തിഷ്ക ജ്വരം സ്ഥിരീകരിച്ചു. കുട്ടി കോഴിക്കോട് മെഡിക്കൽ കോളേജ് ആശുപത്രിയിൽ ചികിത്സയിലാണ്. കടുത്ത പനി ബാധിച്ച കുട്ടിയെ ഇന്നലെയാണ് ആശുപത്രിയിൽ പ്രവേശിപ്പിച്ചത്.
രോഗലക്ഷണങ്ങൾ കണ്ടതിനെ തുടർന്ന് ഇന്നലെ രാത്രി കുട്ടിയുടെ സാമ്പിളുകൾ ശേഖരിച്ച് മെഡിക്കൽ കോളേജിലെ മൈക്രോബയോളജി ലാബിൽ പരിശോധന നടത്തിയാണ് രോഗം കണ്ടെത്തിയത് . രോഗത്തിന്റെ ഉറവിടം കണ്ടെത്താനുള്ള പരിശോധനകൾ ഉടൻ നടത്തുമെന്ന് ആരോഗ്യ വിദഗ്ധർ പറഞ്ഞു. അമീബിക് എൻസെഫലൈറ്റിസ് ബാധിച്ചവരുടെ എണ്ണം അടുത്തിടെ വർദ്ധിച്ചുവരികയാണ്.
അതേസമയം, അമീബിക് എൻസെഫലൈറ്റിസ് ബാധിച്ച് മരിച്ച താമരശ്ശേരിയിലെ ഒമ്പത് വയസ്സുകാരി അനയയുടെ സഹോദരന്റെ സ്വാബ് പരിശോധനാ ഫലങ്ങൾ നെഗറ്റീവ് ആണ്. സർക്കാർ മെഡിക്കൽ കോളേജിലെ മൈക്രോബയോളജി ലാബിൽ നടത്തിയ പരിശോധനയിൽ കുട്ടിക്ക് അമീബിക് എൻസെഫലൈറ്റിസ് ഇല്ലെന്ന് കണ്ടെത്തി. വൈറൽ പനിയെ തുടർന്ന് തിങ്കളാഴ്ച കുട്ടിയെ മെഡിക്കൽ കോളേജിലെ മാതൃശിശു സംരക്ഷണ കേന്ദ്രത്തിൽ പ്രവേശിപ്പിച്ചു. കുട്ടിയുടെ ആരോഗ്യനില നിലവിൽ തൃപ്തികരമാണെന്ന് ആശുപത്രി അധികൃതർ അറിയിച്ചു.
താമരശ്ശേരി ആനപ്പാറയിൽ സനൂപിന്റെ മകൾ അനയ വ്യാഴാഴ്ചയാണ് അമീബിക് എൻസെഫലൈറ്റിസ് ബാധിച്ച് മരിച്ചത്. മരിച്ച അനയയും സഹോദരങ്ങളും മൂന്നാഴ്ച മുമ്പ് വീടിനടുത്തുള്ള ഒരു കുളത്തിൽ നീന്തൽ പരിശീലനം നടത്തിയിരുന്നു. ഈ കുളമാണ് രോഗത്തിന്റെ ഉറവിടമെന്നാണ് ആരോഗ്യ വകുപ്പിന്റെ പ്രാഥമിക വിലയിരുത്തൽ. രോഗമുണ്ടെന്ന് സ്ഥിരീകരിച്ചതിനെത്തുടർന്ന് മെഡിക്കൽ കോളേജിൽ ചികിത്സയിൽ കഴിയുന്ന മൂന്ന് മാസം പ്രായമുള്ള കുഞ്ഞിനും 40 കാരനും തീവ്രപരിചരണ വിഭാഗത്തിൽ ചികിത്സ തുടരുകയാണ്.
