വാഷിംഗ്ടൺ : താരിഫുമായി ബന്ധപ്പെട്ട സുപ്രീം കോടതിയുടെ തീരുമാനത്തിന് പിന്നാലെ ട്രംപ് ഭരണകൂടവുമായി വ്യാപാര കരാറുകൾ ഉണ്ടായിരുന്ന ഇന്ത്യ ഉൾപ്പെടെയുള്ള പങ്കാളികൾക്ക് 10 ശതമാനം തീരുവ ചുമത്തുമെന്ന് വൈറ്റ് ഹൗസ് . ട്രംപിന്റെ ഏകപക്ഷീയമായ താരിഫുകൾ യുഎസ് സുപ്രീം കോടതി റദ്ദാക്കിയതിനെ തുടർന്നാണ് ഈ തീരുമാനം . പുതിയ താരിഫ് ഉത്തരവിൽ ഒപ്പുവച്ച ശേഷം, അത് “ഉടൻ തന്നെ പ്രാബല്യത്തിൽ വന്നതായി” ട്രംപ് സോഷ്യൽ മീഡിയയിൽ പറഞ്ഞു.
വ്യാപാര കരാറിൽ ഇതിനകം ഒപ്പുവച്ചതോ സമ്മതിച്ചതോ ആയ എല്ലാ രാജ്യങ്ങൾക്കും ഇപ്പോൾ ഏകീകൃത താരിഫ് 10% ചുമത്തുമെന്ന് യുഎസ് ഭരണകൂടം വ്യക്തമാക്കി. നേരത്തെ, വ്യാപാര കരാറിന് കീഴിൽ, ഇന്ത്യൻ ഉൽപ്പന്നങ്ങൾക്ക് 18% താരിഫ് ചുമത്തുന്നതിനെക്കുറിച്ച് യുഎസ് സംസാരിച്ചിരുന്നു, അതും ഇപ്പോൾ 10% ആയി കുറച്ചിരിക്കുന്നു.
സുപ്രീം കോടതി വിധിക്ക് ശേഷം വൈറ്റ് ഹൗസിൽ സംസാരിച്ച ട്രംപ്, ഇന്ത്യ-യുഎസ് വ്യാപാര കരാർ ഇപ്പോഴും തുടരുകയാണെന്നും പറഞ്ഞു. “ഇന്ത്യയുമായുള്ള എന്റെ ബന്ധം മികച്ചതാണെന്ന് ഞാൻ കരുതുന്നു, ഞങ്ങൾ ഇന്ത്യയുമായി ബിസിനസ്സ് ചെയ്യുന്നു,” അദ്ദേഹം പറഞ്ഞു. സുപ്രീം കോടതിയുടെ തീരുമാനം ഇന്ത്യയുമായുള്ള വ്യാപാര കരാറിൽ എന്തെങ്കിലും സ്വാധീനം ചെലുത്തുമോ എന്ന് ചോദിച്ചപ്പോൾ “ഒന്നും മാറില്ല, അവർ താരിഫ് നൽകും, ഞങ്ങൾ താരിഫ് നൽകില്ല. ഇന്ത്യയുമായുള്ള കരാർ അവർ താരിഫ് നൽകുമെന്നാണ്. ഇന്ത്യയുമായുള്ള കരാർ തുടരുന്നു… എല്ലാ കരാറുകളും തുടരുകയാണ്.“ എന്നായിരുന്നു ട്രമ്പിന്റെ മറുപടി.
കഴിഞ്ഞ ദിവസമാണ് മറ്റ് രാജ്യങ്ങൾക്ക് മേൽ ചുമത്തിയ താരിഫുകൾ നിയമവിരുദ്ധമാണെന്ന് യുഎസ് സുപ്രീം കോടതി വ്യക്തമാക്കിയത് . നിരവധി രാജ്യങ്ങൾക്ക് മേൽ താരിഫ് ചുമത്തി ട്രംപ് തന്റെ അധികാരപരിധി ലംഘിച്ചുവെന്ന് കോടതി വിധിയിൽ പറയുന്നു .താരിഫ് ചുമത്താൻ പ്രസിഡന്റിനല്ല, പാർലമെന്റിനാണ് അധികാരമെന്നും കോടതി നിരീക്ഷിച്ചു. കോൺഗ്രസിന്റെ അംഗീകാരമില്ലാതെ ഏകപക്ഷീയമായി താരിഫ് ചുമത്തുന്ന ആദ്യത്തെ പ്രസിഡന്റാണ് ട്രംപ്.
കോടതിയുടെ ഈ തീരുമാനം യുഎസ് സമ്പദ്വ്യവസ്ഥയ്ക്കും, ഉപഭോക്താക്കൾക്കും, പ്രസിഡന്റിന്റെ വ്യാപാര നയത്തിനും ദൂരവ്യാപകമായ പ്രത്യാഘാതങ്ങൾ ഉണ്ടാക്കും. സുപ്രീം കോടതിയിലെ പരാജയം ഗവൺമെന്റ് മറ്റ് രാജ്യങ്ങളുമായുള്ള വ്യാപാര കരാറുകൾ പിൻവലിക്കുന്നതിനും ഇറക്കുമതിക്കാർക്ക് ഗണ്യമായ റീഫണ്ട് നൽകുന്നതിനും ഇടയാക്കുമെന്ന് ട്രംപ് ഭരണകൂടം പ്രസ്താവിച്ചിരുന്നു.
