ഗുവാഹത്തി : മാർച്ച് 31-നകം രാജ്യത്ത് നിന്ന് നക്സലിസം തുടച്ചുനീക്കുമെന്ന് കേന്ദ്ര ആഭ്യന്തരമന്ത്രി അമിത് ഷാ . 87-ാമത് സിആർപിഎഫ് ദിന പരേഡിനെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം .
വടക്കുകിഴക്കൻ മേഖലയിലെ ആദ്യത്തെ സിആർപിഎഫ് ദിന പരേഡാണ് നടന്നത് . ജമ്മു കശ്മീരിൽ സൈന്യം നിർണ്ണായക നടപടികൾ എടുത്തുവെന്നും അവിടെ കല്ലെറിയൽ സംഭവങ്ങളുടെ എണ്ണം പൂജ്യമായി കുറഞ്ഞുവെന്നും, മണിപ്പൂരിലെ വംശീയ അക്രമങ്ങൾ കൈകാര്യം ചെയ്യുന്നതിനും മാവോയിസ്റ്റുകളുടെ കോട്ട തകർക്കുന്നതിനും സൈന്യം വിന്യസിക്കപ്പെട്ടിട്ടുണ്ടെന്നും അദ്ദേഹം പറഞ്ഞു.
‘ രാജ്യത്തെ 12 സംസ്ഥാനങ്ങളിലും എണ്ണമറ്റ ജില്ലകളിലും നക്സലിസം വ്യാപിച്ചു. കേന്ദ്രം ഈ ഭീഷണിയെ പിഴുതെറിയാൻ തീരുമാനിച്ചപ്പോൾ, സിആർപിഎഫും കോബ്ര സേനയും ഈ ശ്രമത്തിൽ ഏറ്റവും നിർണായക പങ്ക് വഹിച്ചു.ഇത്രയും വലുതും സങ്കീർണ്ണവും ബുദ്ധിമുട്ടുള്ളതുമായ ഒരു ദൗത്യം വെറും മൂന്ന് വർഷത്തിനുള്ളിൽ പൂർത്തിയാക്കി.
സിആർപിഎഫ് ഉദ്യോഗസ്ഥരുടെ സഹായത്താൽ, 2026 മാർച്ച് 31 ഓടെ രാജ്യം നക്സലിസത്തിൽ നിന്ന് പൂർണ്ണമായും മുക്തമാകുമെന്ന് നമുക്ക് ആത്മവിശ്വാസത്തോടെ പറയാൻ കഴിയും. 2025 ഏപ്രിൽ-മെയ് മാസങ്ങളിൽ 31 നക്സലുകൾ കൊല്ലപ്പെട്ടയിടമാണ് ഛത്തീസ്ഗഢ്-തെലങ്കാന അതിർത്തിയിലെ കരേഗുട്ട കുന്നുകൾ. ഇവിടെ നടത്തിയ ഓപ്പറേഷൻ ബ്ലാക്ക് ഫോറസ്റ്റിന് സേനയെ എത്ര അഭിനന്ദിച്ചാലും മതിയാകില്ല.
45 ഡിഗ്രി സെൽഷ്യസ് താപനില സഹിച്ചുകൊണ്ട്, വളരെ വെല്ലുവിളി നിറഞ്ഞ ഭൂമിശാസ്ത്രപരമായ സാഹചര്യങ്ങളിൽ, സിആർപിഎഫ് ഉദ്യോഗസ്ഥർ 21 ദിവസങ്ങളിലായി ഓപ്പറേഷൻ നടത്തി. നക്സലൈറ്റുകളുടെ ശക്തികേന്ദ്രം ഇല്ലാതാക്കി . അസാധാരണമായ ധൈര്യം പ്രകടിപ്പിച്ചുകൊണ്ട്, വളരെ ഉയർന്ന താപനിലയാൽ ചൂടേറിയ പാറക്കെട്ടുകളിൽ ആ 21 ദിവസം പ്രവർത്തിച്ചപ്പോൾ സിആർപിഎഫ് ജവാൻമാർ ഒരു ഇഞ്ച് പോലും പിന്നോട്ട് പോയില്ല, ഒടുവിൽ നക്സലൈറ്റുകളുടെ തന്ത്രപ്രധാനമായ അടിത്തറ തകർത്തു.“ അമിത് ഷാ പറഞ്ഞു.
അസം മുഖ്യമന്ത്രി ഹിമന്ത ബിശ്വ ശർമ്മ, സിആർപിഎഫ് ഡയറക്ടർ ജനറൽ ജി പി സിംഗ് എന്നിവരും പരിപാടിയിൽ പങ്കെടുത്തു.
