ന്യൂഡൽഹി : സുപ്രീം കോടതിയിൽ നാടകീയ രംഗങ്ങൾ. വാദം കേൾക്കുന്നതിനിടെ ചീഫ് ജസ്റ്റിസ് ബി.ആർ. ഗവായിക്ക് നേരെ അഭിഭാഷകൻ ഷൂ എറിയാൻ ശ്രമിച്ചു. മധ്യപ്രദേശിൽ തകർന്ന വിഷ്ണു വിഗ്രഹം പുനഃസ്ഥാപിക്കുന്നതുമായി ബന്ധപ്പെട്ട ഹർജി പരിഗണിക്കുന്നതിനിടെ ചീഫ് ജസ്റ്റിസ് നടത്തിയ വിവാദപരമായ “ദൈവത്തോട് തന്നെ ചോദിക്കൂ” എന്ന പ്രസ്താവനയ്ക്ക് വ്യാപക വിമർശനം ഉയർന്നതിന് ശേഷമാണ് ഇന്നത്തെ സംഭവം.
അഭിഭാഷകനെ കോടതി മുറിയിൽ നിന്ന് പുറത്തേക്ക് കൊണ്ടുപോകുമ്പോൾ, “സനാതന ധർമ്മത്തെ അപമാനിക്കുന്നത് ഇന്ത്യ സഹിക്കില്ല“ എന്ന് അദ്ദേഹം വിളിച്ച് പറയുന്നുണ്ടായിരുന്നു. അതേസമയം ചീഫ് ജസ്റ്റിസ് ഗവായി ശാന്തനായി തുടരുകയും നടപടിക്രമങ്ങൾ തടസ്സമില്ലാതെ തുടരുകയും ചെയ്തു.”ഇതെല്ലാം കേട്ട് ശ്രദ്ധ തിരിക്കരുത്. ഈ കാര്യങ്ങൾ എന്നെ ബാധിക്കുന്നില്ല. വാദം കേൾക്കൽ തുടരുക,” എന്നാണ് അദ്ദേഹം പറഞ്ഞത്.
ഷൂ എറിഞ്ഞയാളുടെ കൈവശം സുപ്രീം കോടതിയിലെ അഭിഭാഷകർക്കും ക്ലാർക്കുമാർക്കും നൽകുന്ന ഒരു പ്രോക്സിമിറ്റി കാർഡ് ഉണ്ടായിരുന്നുവെന്ന് അറിയുന്നു. പ്രോക്സിമിറ്റി കാർഡിൽ കിഷോർ രാകേഷ് എന്ന പേരാണ് ഉള്ളത്. ചീഫ് ജസ്റ്റിസിനെ ലക്ഷ്യം വച്ചതിന് പിന്നിലെ അദ്ദേഹത്തിന്റെ ഉദ്ദേശ്യം അറിയില്ല, കൂടുതൽ അറിയാൻ സുരക്ഷാ ഏജൻസികൾ അദ്ദേഹത്തെ ചോദ്യം ചെയ്യുകയാണ്. ആ വ്യക്തിക്കെതിരെ ഒരു നടപടിയും സ്വീകരിക്കരുതെന്ന് ചീഫ് ജസ്റ്റിസ് രജിസ്ട്രിയോട് ആവശ്യപ്പെട്ടിട്ടുണ്ടെന്നാണ് വിവരം.
സംഭവത്തെക്കുറിച്ച് സമഗ്രമായി അന്വേഷിക്കണമെന്ന് മുതിർന്ന നിയമജ്ഞ ഇന്ദിര ജെയ്സിംഗ് പറഞ്ഞു. “അഭിഭാഷകന്റെ പേര് വെളിപ്പെടുത്തുകയും അദ്ദേഹത്തിനെതിരെ നിയമനടപടി സ്വീകരിക്കുകയും വേണം.“ എന്നും ഇന്ദിര ജെയ്സിംഗ് പറഞ്ഞു.
ഖജുരാഹോയിൽ തകർത്ത 7 അടി ഉയരമുള്ള വിഷ്ണു വിഗ്രഹം പുനർനിർമ്മിക്കുന്നതിന് ജുഡീഷ്യൽ ഇടപെടൽ ആവശ്യപ്പെട്ടുള്ള പൊതുതാൽപ്പര്യ ഹർജി പരിഗണിക്കാൻ വിസമ്മതിച്ച ചീഫ് ജസ്റ്റിസ്, “പോയി ദൈവത്തോട് തന്നെ എന്തെങ്കിലും ചെയ്യാൻ ആവശ്യപ്പെടുക” എന്ന് പറഞ്ഞതായി റിപ്പോർട്ടുണ്ട്.
ഈ പരാമർശം വിമർശനത്തിന് കാരണമായി, വിഷ്ണു ഭക്തരുടെ വിശ്വാസത്തോട് ചീഫ് ജസ്റ്റിസ് അനാദരവ് കാണിച്ചുവെന്ന് പലരും ആരോപിച്ചു. എന്നാൽ “ഞാൻ നടത്തിയ പരാമർശങ്ങൾ സോഷ്യൽ മീഡിയയിൽ ഒരു പ്രത്യേക രീതിയിൽ ചിത്രീകരിച്ചിട്ടുണ്ടെന്ന് കഴിഞ്ഞ ദിവസം ആരോ എന്നോട് പറഞ്ഞു. എല്ലാ മതങ്ങളെയും ഞാൻ ബഹുമാനിക്കുന്നു.”എന്നാണ് ചീഫ് ജസ്റ്റിസ് പറഞ്ഞത്.
