ന്യൂഡൽഹി ; ഇന്ത്യ നടത്തിയ ഓപ്പറേഷൻ സിന്ദൂർ തടയാൻ യുഎസ് ഇടപെട്ടതായി കോൺഗ്രസ് എംപി ജയറാം രമേശ് . 2025 മെയ് 10 ന് യുഎസ് സ്റ്റേറ്റ് സെക്രട്ടറി മാർക്കോ റൂബിയോയുമായി ബന്ധം സ്ഥാപിച്ചതിനുശേഷമാണ് സംഘർഷം അവസാനിച്ചതെന്നും ജയറാം രമേശ് സോഷ്യൽ മീഡിയ പോസ്റ്റിൽ ചൂണ്ടിക്കാട്ടി.
ഓപ്പറേഷൻ സിന്ദൂറിൽ താൻ മധ്യസ്ഥം വഹിച്ചുവെന്ന യുഎസ് പ്രസിഡന്റ് ഡൊണാൾഡ് ട്രമ്പിന്റെ വാദം പല തവണ ഇന്ത്യ നിരസിച്ചിരുന്നു. അതിനു പിന്നാലെയാണ് ഇപ്പോൾ കോൺഗ്രസ് നേതാവും ഇതേ അവകാശവാദം ഉന്നയിക്കുന്നത് .
യുഎസ് പ്രസിഡന്റ് ഡൊണാൾഡ് ട്രംപ് ഇന്ത്യ-പാകിസ്ഥാൻ സംഘർഷം നിർത്തിവയ്ക്കാൻ ഇടപെട്ടതായി അവകാശവാദങ്ങൾ ആവർത്തിച്ചതിന് ശേഷം ബിജെപി നേതൃത്വത്തിലുള്ള സർക്കാരിനെ ജയറാം രമേശ് മുമ്പ് വിമർശിച്ചിരുന്നു.
ഏപ്രിൽ 22-ന് ജമ്മു കശ്മീരിലെ പഹൽഗാമിൽ നടന്ന ഭീകരാക്രമണത്തിൽ 26 പേർ കൊല്ലപ്പെട്ടതിന് പ്രതികാരമായി മെയ് 7-ന് ന്യൂഡൽഹി പാകിസ്ഥാനിലെയും പാകിസ്ഥാൻ അധിനിവേശ ജമ്മു കശ്മീരിലെയും ഒമ്പത് ഭീകര ക്യാമ്പുകളിൽ നടത്തിയ ആക്രമണമാണ് ഓപ്പറേഷൻ സിന്ദൂർ.
ഇതിനു പിന്നാലെ, അതിർത്തിയിൽ പാകിസ്ഥാൻ ഇന്ത്യൻ ഭാഗത്തേക്ക് ഷെല്ലാക്രമണം നടത്തി, തുടർന്ന് ഇന്ത്യ പാകിസ്ഥാന്റെ 11 സൈനിക, വ്യോമ താവളങ്ങൾ ആക്രമിച്ചു, ഇത് ഇസ്ലാമാബാദിലെ സൈനിക കേന്ദ്രങ്ങൾക്ക് കാര്യമായ നാശനഷ്ടമുണ്ടാക്കി.
ഇന്ത്യയും പാകിസ്ഥാനും തമ്മിലുള്ള സംഘർഷങ്ങൾ കുറയ്ക്കുന്നതിൽ പ്രധാന പങ്ക് വഹിച്ചെന്ന തന്റെ അവകാശവാദങ്ങൾ യുഎസ് പ്രസിഡന്റ് ആവർത്തിച്ചുകൊണ്ടിരുന്നു, സംഘർഷങ്ങൾ തടയുന്നതിൽ വ്യാപാരവും തീരുവയും യുഎസിന് നിർണായകമാണെന്ന് വാദിച്ചു.
മൂന്നാം കക്ഷിയുടെ ഇടപെടലില്ലാതെ ഡയറക്ടർ ജനറൽസ് ഓഫ് മിലിട്ടറി ഓപ്പറേഷൻസ് (ഡിജിഎംഒ) വഴി ഉഭയകക്ഷിപരമായി വെടിനിർത്തൽ കൊണ്ടുവന്നതാണെന്ന് വ്യക്തമാക്കി ട്രംപിന്റെ അവകാശവാദങ്ങളെ ഇന്ത്യ നിരന്തരം നിരാകരിച്ചു.
ജമ്മു കശ്മീരുമായി ബന്ധപ്പെട്ടവ ഉൾപ്പെടെ പാകിസ്ഥാനുമായുള്ള ഏത് പ്രശ്നങ്ങളും ഇരു രാജ്യങ്ങളും തമ്മിൽ ഉഭയകക്ഷിപരമായി പരിഹരിക്കപ്പെടണമെന്ന ദീർഘകാല നിലപാട് ഇന്ത്യ ആവർത്തിക്കുകയും ചെയ്തു.
