ന്യൂഡല്ഹി : ഡൽഹിയിലുണ്ടായ ഭൂചലനത്തിന് പിന്നാലെ ബീഹാറിലും ഭൂചലനം . രാവിലെ 8 മണിയോടെ ബീഹാറിലെ സിവാനിലാണ് ഭൂചലനമുണ്ടായത് . റിക്ടർ സ്കെയിലിൽ 4.0 രേഖപ്പെടുത്തിയ ഭൂചലനമാണുണ്ടായതെന്നാണ് ദേശീയ ഭൂകമ്പ പഠന കേന്ദ്രം വ്യക്തമാക്കിയത് .
ഡൽഹിയിലുണ്ടായ ഭൂകമ്പത്തെ തുടർന്ന് ആളുകൾ പരിന്ത്രാന്തരായിരുന്നു. വലിയ മുഴക്കത്തോടൊപ്പമാണ് പ്രകമ്പനങ്ങൾ ഉണ്ടായത് . ഇതേ തുടർന്ന് ആളുകൾ വീട് വിട്ട് തുറസായ സ്ഥലങ്ങളിലേയ്ക്ക് ഓടി മാറി. ഇത്രയും വലിയ മുഴക്കം മുൻപ് കേട്ടിട്ടില്ലെന്നാണ് പലരും പറഞ്ഞത്.
ഡൽഹിയിലും,സമീപ പ്രദേശങ്ങളിലുമുണ്ടായ ഭൂചലനത്തിന്റെ പ്രഭവകേന്ദ്രം ഡൽഹിയിൽ തന്നെയായിരുന്നു. ധൗള കൂആമിലെ ദുര്ഗാബായി ദേശ്മുഖ് കോളേജ് സ്ഥിതി ചെയ്യുന്ന പ്രദേശത്ത് ഭൂ നിരപ്പിൽ നിന്ന് അഞ്ച് കിലോമീറ്റർ ആഴത്തിലായിരുന്നു ഭൂചലനത്തിന്റെ പ്രഭവകേന്ദ്രം . ഡല്ഹി, നോയ്ഡ, ഗ്രേറ്റര് നോയ്ഡ, ഗാസിയാബാദ് തുടങ്ങിയ സ്ഥലങ്ങളിലാണ് ഭൂചലനമനുഭവപ്പെട്ടത്.
