ബെംഗളൂരു : രാജ്യത്തെ രണ്ടാമത്തെ വലിയ സ്റ്റേഡിയം ബെംഗളൂരുവിൽ ഉയരും . ബൊമ്മസാന്ദ്രയിലെ സൂര്യ സിറ്റിയിൽ 80,000 സീറ്റുകളുള്ള ക്രിക്കറ്റ് സ്റ്റേഡിയം ഉൾപ്പെടെ അത്യാധുനിക സ്പോർട്സ് സമുച്ചയം നിർമ്മിക്കാനുള്ള കർണാടക ഹൗസിംഗ് ബോർഡിന്റെ (കെഎച്ച്ബി) നിർദ്ദേശത്തിനാണ് മുഖ്യമന്ത്രി സിദ്ധരാമയ്യ അംഗീകാരം നൽകിയത് . സംസ്ഥാനത്ത് നിർമ്മിക്കുന്ന ഈ സ്റ്റേഡിയം രാജ്യത്തെ രണ്ടാമത്തെ വലിയ സ്റ്റേഡിയമാകും . നിലവിൽ 1,32,000 പേർക്ക് ഇരിക്കാൻ കഴിയുന്ന അഹമ്മദാബാദിലെ നരേന്ദ്ര മോദി സ്റ്റേഡിയമാണ് രാജ്യത്തെ ഏറ്റവും വലിയ ക്രിക്കറ്റ് സ്റ്റേഡിയം
സംസ്ഥാനത്ത് ക്രിക്കറ്റ് മത്സരം നടക്കുമ്പോഴെല്ലാം ആതിഥേയത്വം വഹിച്ചിരുന്നത് ബെംഗളൂരുവിലെ എം ചിന്നസ്വാമി സ്റ്റേഡിയമായിരുന്നു. വെറും 17 ഏക്കർ വിസ്തൃതിയിൽ വ്യാപിച്ചുകിടക്കുന്ന ചിന്നസ്വാമി സ്റ്റേഡിയത്തിൽ 32,000 പേർക്ക് ഇരിക്കാനുള്ള സൗകര്യമേയുള്ളൂ. ക്രിക്കറ്റിന്റെ വർദ്ധിച്ചുവരുന്ന ജനപ്രീതി കണക്കിലെടുക്കുമ്പോൾ, സമീപഭാവിയിൽ ചിന്നസ്വാമി സ്റ്റേഡിയത്തിന് പ്രധാന ടൂർണമെന്റുകൾക്ക് ആതിഥേയത്വം വഹിക്കാൻ കഴിയുമെന്ന് തോന്നുന്നില്ലെന്നാണ് സർക്കാരിന് ലഭിച്ച റിപ്പോർട്ടുകൾ.
കൂടാതെ, ജൂൺ 4 ന് ആർസിബി ആഘോഷങ്ങൾക്കിടെയുണ്ടായ തിക്കിലും തിരക്കിലും പെട്ട് 11 പേർ മരിക്കുകയും 50 ലധികം പേർക്ക് പരിക്കേൽക്കുകയും ചെയ്തിരുന്നു. അതിനുശേഷം, സർക്കാർ തല അന്വേഷണം നടത്തിയിരുന്നു. ഈ അന്വേഷണ റിപ്പോർട്ട് അനുസരിച്ച്, ബെംഗളൂരുവിലെ എം ചിന്നസ്വാമി സ്റ്റേഡിയം വലിയ പരിപാടികൾ സംഘടിപ്പിക്കാൻ അനുയോജ്യമല്ലായിരുന്നു.
ഇക്കാരണത്താൽ, മഹാരാജ ടി20 ടൂർണമെന്റും ബെംഗളൂരുവിൽ നിന്ന് മൈസൂരിലേക്ക് മാറ്റി. മാത്രമല്ല, സെമി ഫൈനൽ ഉൾപ്പെടെയുള്ള വരാനിരിക്കുന്ന വനിതാ ഏകദിന ലോകകപ്പിന്റെ ഉദ്ഘാടന മത്സരം ചിന്നസ്വാമി സ്റ്റേഡിയത്തിൽ നടക്കേണ്ടതായിരുന്നു. എന്നാൽ ആ മത്സരങ്ങളെല്ലാം ബെംഗളൂരുവിലാകും നടക്കുക .
ബൊമ്മസാന്ദ്രയിലെ സൂര്യ സിറ്റിയിൽ 100 ഏക്കർ സ്ഥലത്ത് ഒരു സ്പോർട്സ് സെന്റർ നിർമ്മിക്കുന്നതിനുള്ള നിർദ്ദേശം കെഎച്ച്ബി സംസ്ഥാന സർക്കാരിന് സമർപ്പിച്ചിട്ടുണ്ട്. സ്റ്റേഡിയത്തിന് ഏകദേശം ₹1,650 കോടി ചിലവാകും, സംസ്ഥാന സർക്കാരിന്റെ സാമ്പത്തിക സഹായമില്ലാതെ ഇത് നിർമ്മിക്കാൻ കർണാടക ഹൗസിംഗ് ബോർഡ് തീരുമാനിച്ചതായാണ് സൂചന.
ക്രിക്കറ്റ് ഉൾപ്പെടെ എട്ട് ഇൻഡോർ, എട്ട് ഔട്ട്ഡോർ കായിക വിനോദങ്ങൾക്കുള്ള സൗകര്യങ്ങൾ സ്പോർട്സ് സെന്ററിൽ ഉണ്ടായിരിക്കും. അത്യാധുനിക ജിമ്മുകൾ, പരിശീലന സൗകര്യങ്ങൾ, നീന്തൽക്കുളം, ഗസ്റ്റ് ഹൗസുകൾ, ഹോസ്റ്റലുകൾ, 3-സ്റ്റാർ, 5-സ്റ്റാർ ഹോട്ടലുകൾ, അന്താരാഷ്ട്ര സെമിനാറുകൾ നടത്താൻ കഴിയുന്ന ഒരു കോൺഫറൻസ് ഹാൾ എന്നിവയും കേന്ദ്രത്തിൽ ഉണ്ടായിരിക്കുമെന്ന് സർക്കാർ വൃത്തങ്ങൾ അറിയിച്ചു.
