തിരുവനന്തപുരം: കേരളത്തിലെ എല്ലാ സർക്കാർ ആശുപത്രികളിലും കുറഞ്ഞ നിരക്കിൽ ഗുണമേന്മയുള്ള മരുന്നുകൾ ലഭ്യമാക്കുന്നതിനായി അഞ്ച് സംസ്ഥാനങ്ങളിലെ മെഡിക്കൽ സർവീസസ് കോർപ്പറേഷനുകളുമായി ചേർന്ന് കൺസോർഷ്യം രൂപീകരിക്കാൻ ആരോഗ്യവകുപ്പ് നടപടികൾ ആരംഭിച്ചു . മരുന്ന് സംഭരണത്തിൽ നിന്ന് ലാഭമുണ്ടാക്കുന്ന ഇടനിലക്കാരെ ഒഴിവാക്കുകയാണ് നീക്കത്തിന്റെ ലക്ഷ്യം.
ന്യായമായ വിലയ്ക്ക് മരുന്നുകൾ സംഭരിക്കുന്ന തമിഴ്‌നാട്, രാജസ്ഥാൻ, ഹിമാചൽ പ്രദേശ്, ഒഡീഷ, ഗുജറാത്ത് എന്നീ സംസ്ഥാനങ്ങളിലെ മെഡിക്കൽ കോർപ്പറേഷനുകളുമായി സഹകരിക്കാനാണ് വകുപ്പ് പദ്ധതിയിടുന്നത്. ഈ കൂട്ടായ്മയിലൂടെ, പ്രസ്തുത സംസ്ഥാനങ്ങളിൽ പ്രവർത്തിക്കുന്ന മരുന്ന് നിർമ്മാതാക്കളുമായി നേരിട്ട് ഇടപാടുകൾ നടത്താൻ സാധിക്കും. ഇതുവഴി കേരളത്തിനും അതേ നിരക്കിൽ മരുന്നുകൾ വാങ്ങാൻ കഴിയും.
വൻതോതിലുള്ള ഓർഡറുകൾ ലഭിക്കുന്നതിനാൽ, കമ്പനികൾ വിലയിൽ കാര്യമായ കുറവ് വരുത്തുമെന്നാണ് പ്രതീക്ഷിക്കുന്നത് . ഇടനിലക്കാർ വഴി ഉയർന്ന വിലയ്ക്ക് വൻതോതിൽ മരുന്നുകൾ വാങ്ങിയിരുന്നതായും, ഇതിൽ ഗുണനിലവാരമില്ലാത്ത മരുന്നുകളും ഉൾപ്പെട്ടിരുന്നതായും റിപ്പോർട്ടുകളുണ്ട്. കോടിക്കണക്കിന് രൂപയുടെ അഴിമതി നടന്നെന്ന റിപ്പോർട്ടുകളുടെ അടിസ്ഥാനത്തിൽ, വിജിലൻസ് അന്വേഷണത്തിന് ഉത്തരവിടാൻ ആരോഗ്യമന്ത്രി കെ. മുരളീധരൻ തീരുമാനിച്ചിരുന്നു.
