പാലക്കാട് : സിപിഎം പുറത്തുവിട്ട ദൃശ്യങ്ങൾക്ക് മറുപടിയുമായി രാഹുൽ മാങ്കൂട്ടത്തിൽ . സുഹൃത്തും, താനും രണ്ട് വാഹനത്തിലാണ് ഹോട്ടലിൽ പോയതെന്ന് സ്ഥിരീകരിച്ച രാഹുൽ താൻ കയറിയത് ഷാഫി പറമ്പിലിന്റെ കാറിലാണെന്നും , തന്റെ കാറിലാണ് സുഹൃത്ത് വന്നതെന്നും പറഞ്ഞു . ചില കാര്യങ്ങൾ പറയാനാണ് താൻ ഷാഫിയ്ക്കൊപ്പം കാറിൽ കയറിയത്.
സുഹൃത്ത് കൊണ്ടുവന്ന തന്റെ കാറിലേയ്ക്ക് പാലക്കാട് പ്രസ്ക്ലബിന് സമീപത്ത് വച്ച് മാറിക്കയറി. എന്നാൽ തന്റെ കാറിന് തകരാർ ഉണ്ടായി. പിന്നീട് പാലക്കാട് കെ ആർ ടവറിന് സമീപം വച്ച് യൂത്ത് കോൺഗ്രസ് പ്രവർത്തകന്റെ കാറിൽ കയറി കോഴിക്കോട്ടേയ്ക്ക് പോയി .അസ്മ ടവറിൽ കാറിൽ ചെന്നിറങ്ങുന്ന ദൃശ്യവും രാഹുൽ പുറത്തുവിട്ടു.
രാത്രി പാലക്കാട്ടെ കെപിഎം ഹോട്ടലിൽ നിന്ന് രാഹുൽ പുറത്തേക്ക് ഇറങ്ങുന്നതാണ് ഇന്നലെ പുറത്ത് വന്ന ദൃശ്യങ്ങളിലുള്ളത്. വസ്ത്രങ്ങളുമായി യാത്ര പോയെന്നായിരുന്നു രാഹുലിന്റെ വാദം. കള്ളപ്പണം നിറച്ച ബാഗാണെന്ന് ആരോപിക്കുന്ന നീലട്രോളി ഫെനി നൈനാൻ വെള്ള ഇന്നോവ കാറിൽ കയറ്റുന്നു. രാഹുൽ മാങ്കൂട്ടത്തിൽ മറ്റൊരു കാറിൽ കയറി പോകുന്നു. നീലട്രോളി എടുത്ത് ഫെനി കാറിൽ കയറ്റുമ്പോൾ രാഹുലും ഒപ്പമുണ്ട്.
കോഴിക്കോട് എത്തിയപ്പോൾ നീല ട്രോളി ബാഗ് കൈവശമുണ്ടായിരുന്നതായി രാഹുൽ പറഞ്ഞിരുന്നു. എന്നാൽ ബാഗ് ഒരു കാറിലും രാഹുൽ മറ്റൊരു കാറിലുമാണ് വന്നതെന്നാണ് ദൃശ്യങ്ങളിൽ നിന്ന് വ്യക്തമാകുന്നത് .രണ്ടായി സഞ്ചരിച്ചിട്ടും നീല ട്രോളി ബാഗ് എങ്ങനെ രാഹുലിന്റെ കൈയിൽ എത്തിയെന്നാണ് ചോദ്യം.
