മൂന്നാർ: ഓർഡർ നൽകിയിട്ടും ഭക്ഷണം നൽകാത്തത് ചോദ്യം ചെയ്ത യുവാവിനെ തട്ടുകടയുടമ ആക്രമിച്ചു. വിനോദസഞ്ചാരിയായ യുവാവിനെ കടയുടമ ഇരുമ്പ് ചട്ടുകം കൊണ്ട് തലയിൽ അടിയ്ക്കുകയായിരുന്നു . പരിക്കേറ്റ കൊല്ലം സ്വദേശി എം ഷംനാദ് (33) ടാറ്റ ടീ ആശുപത്രിയിൽ ചികിത്സയിലാണ്. ബുധനാഴ്ച രാത്രി 10 മണിയോടെ പോസ്റ്റ് കവലയിലെ കടയിലാണ് സംഭവം.
രാത്രിയിൽ ഭക്ഷണം കഴിക്കാൻ യുവാവും സുഹൃത്തും കടയിലെത്തി. ഓർഡർ നൽകി കാത്തിരുന്നിട്ടും ഇവർക്ക് ഭക്ഷണം ലഭിച്ചില്ല. ഇവർക്ക് പിന്നാലെ വന്നവർക്കെല്ലാം ഭക്ഷണം നൽകുകയും ചെയ്തു . ഇതേത്തുടർന്നുണ്ടായ തർക്കത്തിൽ, കടയുടമ ഇരുമ്പ് ചട്ടുകം കൊണ്ട് യുവാവിനെ അടിക്കുകയായിരുന്നു . തലയിലും മുഖത്തും പരിക്കേറ്റ സുഹൃത്തിനെ സുഹൃത്തും നാട്ടുകാരും ചേർന്ന് ആശുപത്രിയിലേക്ക് കൊണ്ടുപോയി. സംഭവത്തിൽ പോലീസ് കേസെടുത്തു.
Discussion about this post
