തിരുവനന്തപുരം: ഡൽഹിയിലെ ജന്തർ മന്തറിൽ നടന്ന പ്രതിഷേധത്തിൽ പങ്കെടുത്ത വിദ്യാർത്ഥികൾക്കെതിരെ അധിക്ഷേപകരമായ പരാമർശം നടത്തിയെന്നാരോപിച്ച് ടിജി മോഹൻദാസിനെ പോലീസ് കസ്റ്റഡിയിലെടുത്തു. എറണാകുളം മട്ടാഞ്ചേരിയിലെ വസതിയിൽ എത്തിയാണ് തിരുവനന്തപുരം സിറ്റി സൈബർ ക്രൈം പോലീസ് മോഹൻദാസിനെ കസ്റ്റഡിയിലെടുത്തത്.
ഡൽഹിയിലെ ജന്തർ മന്തറിൽ പ്രതിഷേധിക്കുന്നവരെ വെടിവച്ചുകൊല്ലണമെന്നായിരുന്നു മോഹൻദാസിന്റെ വിവാദ പരാമർശം . പ്രതിഷേധത്തിൽ പങ്കെടുത്ത സ്ത്രീകൾക്കെതിരെയും അധിക്ഷേപകരമായ പരാമർശങ്ങൾ നടത്തിയെന്നാണ് ആരോപണം . കേസിൽ ആദ്യം പരാതി നൽകിയത് എഐവൈഎഫ് സംസ്ഥാന സെക്രട്ടറി ടിടി ജിസ്മോനാണ്. തുടർന്ന് നിരവധി പേർ പരാതിയുമായി രംഗത്തെത്തി.
കേസിൽ മോഹൻദാസിനെ ചോദ്യം ചെയ്യാൻ വിളിക്കുകയോ അറസ്റ്റ് ചെയ്യുകയോ ചെയ്തിരുന്നില്ല. കലാപത്തിന് പ്രേരിപ്പിക്കൽ ഉൾപ്പെടെയുള്ള വകുപ്പുകൾ ചുമത്തി പോലീസ് 10 ദിവസം മുമ്പ് കേസ് രജിസ്റ്റർ ചെയ്തു. മോഹൻദാസ് വിദ്യാർത്ഥികൾക്കെതിരെ ആക്ഷേപകരമായ പരാമർശങ്ങൾ നടത്തിയതായി ആരോപിക്കപ്പെടുന്നു. അശ്ലീലവും അപമാനകരവുമായ പരാമർശങ്ങൾ അടങ്ങിയ അദ്ദേഹത്തിന്റെ വീഡിയോകൾ വ്യാപകമായ പ്രതിഷേധങ്ങൾക്ക് കാരണമായിരുന്നു. കലാപം ഉണ്ടാക്കുക എന്ന ഉദ്ദേശ്യത്തോടെ ഒരു യൂട്യൂബ് ചാനൽ വഴി വീഡിയോ പ്രചരിപ്പിച്ചതായി എഫ്ഐആറിൽ ആരോപിക്കുന്നു.
